Remna Ni sawi ve tawh teh ang
Kum 2016-a Remna Ni kan hman kha a hunlaiin sawi awm tak a ni a, keini ang pa dawihzep deuh chuan, 'Miin engtin nge an sawi zui?' tiin kan han nghak dai te te a, tunah hian ngaihdan kan sawi chhuak ve ngam dawn chauh a, tlai deuh tawh mahse sawi lova dah tawp chu ka ui ve deuh bawk a ni.
Remna Ni a huhova hman kha kei chuan 100% in ka thlawp a, a hmanna hmun kha 100% in ka dodal a, a programme kha 50% vel kha paih ka duh bawk a, chu chu ka ngaihdan dik tak a ni. Remna Ni a huhova kan hman loh vanga kan inchirh thehna leh kan inbeihna
ṭul lo tak takte tunah chuan a reh ṭan dawn ta a, Remna Ni khan remna ṭha tak a hring chhuakin ka hria a, a lawmawm ka ti khawp mai.
Aizawla a lawmna pui bera Lammual an hmang khan ṭhat lohna lian tak pali a nei. Pakhatnaah chuan inkhelhna atana phul phaha cheraw kan leh zaia lam vak vak chak tlat hnam hian kan khelmual chu kan tichhe ta a, mahni thil
ṭha a huhova in-thuruala tichhe duh hnam kan ni. Pahnihnaah chuan Lammualah kan thawl lutuk a, en pawh a hrehawm a, programme ṭha tak ni si entu nei mang lovin a thawl hul mai. Pathumnaah chuan Chapchar Kut ang chiahin kan hmang a, tunlai ṭawngin Chapchar Kut kha an copy-paste mai mai a, thusawi an belh a ni deuh mai lo maw? Palinaah chuan thusawi dah pawimawhna ber inkhawm hi chu hall chhungah ni se, open air lovah hian a dik zawkin a inhmeh a ni.
Kan programme-ah khan zai pahnih thum vel nen ti se a tawk tehlul nen, Anthurium Festival vela inhmeh tawk fashion show nen kan han bei a, kan ram hruaitu, sakhaw hruaitu leh tlawmngai pawl hruaitu rual hmaah nula feng chhing tak tak an rawn inlan a, anni lamin en lo anga lan duh si, en lo thei tak tak si lova an melh rulh rulhte pawh kan lo hmu thei a, a hun leh hmun a awm ngai. Chapchar Kut tlai lama rui bung bunga an zaia an lam ang maiin programme an han siam leh a, mipui an ṭhahnem lo nen duh angin an che thei ta lo mai pawh a, Remna Ni lawmna programme-ah chuan a inhmeh lo hle.
Mi ṭhenkhat ril-rua tai nei deuhvin CYMA hruaitute political platform zawnna mai mai anga an sawi kha chu a dik lova, ka pawm zawng a ni ve lo.
- Lalzarliana