Digital technology – Hmasawnna rahbi thar (NIELIT Deemed to be University)

India sorkar chuan digital technology lama zirna sang zawk kan neih theih nan chak takin hma a la reng a, awareness, training leh skill development pawh a kalpui nasa. Hemi kawnga rahbi pawimawh tak ni turin National Institute of Electronics & Information Technology (NIELIT) chu nikum 2024 khan Ministry of Education chuan Deemed to Be University status distinct category hnuaiah a pe (confer) a. NIELIT chu sorkar laipui Ministry of Electronics & Information Technology (MeitY) hnuaia university awm chhun leh hmasa ber a lo ni ta.

Gazette Notification 15th July 2024-a tarlan danin, NIELIT Ropar (Punjab) chu main campus a ni a, NIELIT centre 11–Aizawl, Agartala, Aurangabad, Calicut, Gorakhpur, Imphal, Itanagar, Kekri, Kohima, Patna leh Srinagar te chu constituent unit-ah dah a ni. January 3, 2025 (Zirtawpni) khan Ashwini Vaishnaw, Minister of Railways, Information & Broadcasting and Electronics & IT, Govt. of India chuan NIELIT Deemed University chu NIELIT, Guwahati-ah a hawng. Lakshman Prasad Acharya, Hon’ble Governor of Assam, Dr. Himanta Biswa Sarma, Chief Minister of Assam an tel bawk. India rama semiconductor skilling ecosystem tichak turin Dr. MM Tripathi, Director General of NIELIT leh Tata Electronics Private Limited aiawhten Memo-randum of Understanding an ziak nghal. Video conferencing hmangin NIELIT staff leh sorkar official-te’n state hrang hrangah an chhim bawk.

National Education Policy 2020 nena kal-pui turin NIELIT Univer-sity hnuaiah hian tech-nology changkang tak tak -artificial intel-ligence, machine learning, blockchain technology, Industry 4.0, semiconductor design & manufacturing, automotive electronics, drone technology, cybersecurity & forensics, bioinformatics, etc-ahte undergraduate, postgraduate, leh Ph.D. thleng zir theih tura ruahman a ni. Zirna ṭha (quality education) neih ngeina turin advanced technology virtual labs, immersive content, leh AI-driven personalized learning solutions nena zirna hi kalpui a ni bawk ang.

NIELIT hi Ministry of Electronics and Information Technology, Govt. of India hnuai awm a ni a, main office hi East Kidwai Nagar, New Delhi-ah a awm. IT lama eizawnna tlak thiamna nei tura mi chher chhuah hi a tum ber a ni. Tunah NIELIT, Aizawl, Zuangtuiah hian course chi hrang hrang–MCA, M.Sc. (Electronics), BCA leh Diploma (Electronics leh Computer Science) zirna bakah short term course leh Ph.D. zirna thlengin hawn mek a ni a; digital technology lamah higher education hawn belh zel a ni ang.

NIELIT hian Information, Electronics and Communication Technology-ah training leh skill development a buaipui nasa hle. Tunah hian centre 50 chuang, accredited institute 700 chuang leh facilitation centre 9,000 chuang nen India ram pumah a inzar pharh mek. Digital India program hlawhtlin nana hma latu ber zinga mi a ni a, tunlai technology thar ṭangkai taka kan hman thiam ve theih nan kum 5 chhungin zirlai maktaduai 3.7 training pe turin a inbuatsaih mek bawk.

IT lama India sorkar hmalakna zarah IT zirna university kan nei ve ta hi a lawmawm tak zet. Mizo ṭhalaite pawhin kan ram chhungah ngeia certificate course aṭanga Ph.D. thleng zirna kan nei ve ta hi a lawmawm hle. College-a kal mâwl tawp lo va, eizawnna ṭha zawk nei thei tura digital technology lama ke kan pên a, Mizoram sorkar leh mipuite’n NIELIT deemed university hi kan chhawr ṭangkai thiam phawt chuan IT lama hmasawnna thar duhawm tak kan nei ngeiin a rinawm.

- Er. Chhungpuia Renthlei,

Senior Technical Officer, NIELIT Aizawl