Synod Higher Secondary School siamṭhat a ngai

Ni 3.12.2024 khan ka chhungte tlawh pahin remchang tak maiin ralkhata ka lo intihneihtu ve em em Synod Higher Secondary School, Mission Vengthlanga mi chu ka tlawh haw a. Tlai dar 2:00 bawr velah ka thleng a, an lo reh deuh diak mai. School bân hun a la ni si lo va, mak ka ti ang reng viau. Synod Inkhawmpui Mission Vengthlangin an thlen dawn avangin chawhnu lam an lo châwl a, a tuk aṭangin Synod inkhawmpui chhung zawng school an châwl dawn tih ka hriat phei chuan mak ka ti lehzual. Inkhawmpui chhung zawng mai zirlaite school chawlhtir ngawt mai hi zirna lama ṭhahnemngaihna mit aṭang chuan a mak hle.

A building a ṭhain a changtlung hle. A bul maiah Mizoram Christian College a lo awm reng nâ a, College lam chu ka tlawh ta lo. Zirtirtute ṭhutna lamah ka kal a, zirtirtu pakhat a lo la awm a, computer a lo khawih mawlh mawlh a. Amah tak ka va biak hmaa mak tih ka tawng leh a. Dawhkan a lo insi khup mai a, zirtirtu dawhkan chêp tak hian a lo inchhep khawm ni mai hian ka hmu a; sabji bazar tawt deuh a ang hle. Siam ṭhat a ngai tak zetin ka hria. Building an nei ṭha tho si a, awm khawm dul loin zirtirtuho ṭhu hrang ta se, an zahawmin zirlaite tan zirtirtute biakpawh zung zung a awlsam zawk awm si a. Zirtirtute kal kim ṭhap se la, a luh pawh ka lut ngam kher dawn emaw ni? Sawrkar school angin high school leh higher secondary school lam an lo inṭhen hrang lo a, an lo inawm pawlh vek a lo ni. A mak dawn nulh nulh khawpin ka hria. Ṭhen hran daih chi a ni. Zirlai tan pawh zirtirtute an zahawm lo ngawttein ka ring. A thawkate tan pawh a thawipikthlakin ka ring. Siam ṭhat theih ni se.

Chung awm khawm nulh ho chu Vice Principal-in a awp khawm ni ngei tur a ni. Kawngka pakhatah Vice Principal tih intar va mai ka hmu a. Sawrkar school-a awm ngai lo ka hmu leh nawlh chu mak ka ti leh. Ka zawt chiang a, Vice Principal chu high school headmaster ang a lo ni. Sawrkarah chuan high school zirtirtu tana kaisan theihna tawp ber a nih laiin, he school (ti tawh mai ila)-ah chuan high school headmaster-in higher secondary school-a lecturer-te (a senior ho phei chu amah aia hlawh sang daih an ni mai thei) a enkawl tihna a lo ni dawn a; a letling hu mai a ni.

Tin, vice principal an lo nih chuan principal ni ve mai tura inngaihna an nei lian hle thei bawk dawn a. Principal an lo nih chuan tling lo chung tlinga pawm ni mai lovin, vawi khatah promotion vawi thum vel hmu ang a lo ni dawn a. Sawrkar department-a thawk ni se, kan phun nasa teh ang chu. Vice principal hming hi tihbo a, headmaster hming pek daih chi niin a lang. Thu an nei sawt ang a, an zahawm sawt bawk ang. High school lam bika thawk mek zirtirtute pawhin heti zawng hian an lo suangtuah veng veng ve fo ṭhinin ka ring. An tan sawi chhuah a nuam chiah si lo ang. Tuna mi ang hi chu a protocol a dik thei lo. Siam ṭhat theih ni se a duhawm hle.

Ka haw lamin office banga thawktuho thlalak intar ka en vang vang lai chuan thawktute zinga mi ni awm tak nen kan inbia a. Chu thlalak chu kum thar lama thlak mai tur a nih thu min hrilh a. Thawktu ṭhenkhat an pension dawn a, principal thar pawh Synod-in a ruat tawh thu ka hria a. Promotion-a kal mai tur niin ka lo ngai ve ngawt a. Ni danga ka hriat ngai loh thil hre thar ka nih avangin ka bengverh ta riau a, ka thiam tawkin ka chhui zui ta a. Ka thil hriatte hi a dik a nih si chuan he school hian siam ṭhat a lo ngai hle mai.

Principal tur hi Synod Executive Committee-in a thlang ṭhin a, Synod inkhawmpuiin a pawm ṭhin an ti. Tuna a thar an thlan hi Synod Office-a thawk lai an ti, mak ka ti ta deuh deuh. Ṭum dangah pawh hetiang hi an lo ruat fo a ni awm e. Mission field-ah zirtirtuin an awm a, headmaster-te pawh an ni awm e. Chu’ng mite chu an lo senior deuh a, Committee chuan a thlang ta mai ṭhin a ni awm e.

High school-a headmaster leh zirtirtu ni ṭhin, higher secondary school-a experience nei miah lo vawi leh khata principal han nih dawrh theih hi a dik lo hrim hrim mai. Sawrkar kalphungah chuan high school zirtirtu promotion-na tur chu high school headmaster a ni a. Higher secondary school zirtirtu promotion-na tur chu principal a ni. High school zirtirtu ni si, higher secondary school principal-a ruat a nih chuan vawi leh khatah vawi hnih vawi thum promotion a hmu tihna a ni a; a mak hle dawn a ni. Synod Recruitment Rules ka hre ve chiah lo a. Ka zawh kualin, a sawi uar deuhte phei chuan master degree nei, B.Ed. nei, primary headteacher pawh ni se, kum 15 tal zirtirna hna a lo thawh tawh hrim hrim chuan he school-ah hian principal nih theihna chance a awm an ti. Chutiang chu Synod Recruitment Rules-ah a lo awm a nih chuan a rang a ranga siam ṭhat chi niin a lang.

Thawk lai mekte zingah tling zo an awm lo nge maw ni dawn le, tih ka zawt kual a, an lo awm nual bawk si. Thawk laite duh loh hrim hrimnate hi a awm zawk nge ni? Tuna an thlan aia pension hmasa tur zawkte pawh an awm a ni âwm e. He school-a principal post hi missionary-a inpete promotion-na ang ziazânga ngaihna awm anga lang pawh thil dik ni theiin a lang lo. Missionary tura inpe chu missionary a ni tluan mai tur a ni lawm ni? He school-a zirtirtute hi mission field-a school-ah headmaster turin thlan ni ve ta se la emaw, a lo thawk mekte aia naupang emawte thlan ni se la, kan ngaithiam hlawm ang emaw chu le?

Sawrkar school a ni lo a, sawrkar school kal dan nen khaikhin diak diak chi a ni lo ve kan ti a nih pawhin heti zawng hian sawi ta ila, a fiah awm asin. ‘Synod office-a rei tak coordinator-a lo thawk tawh hi a senior ve tawh a, executive secretary-ah i ruat ve tawh ang u,’ tih nen a inang tlang âwm e.

Thawk mekte hi mi fel tak tak an ni hlawm a ni ang. Vawiin thlengin lungawi lo thâwm pawh kan hre lo. Amaherawhchu, mihring ve tho an nih avangin kan hriat mang loh hian thawh hona ṭha lo tak hi kan siamsak thei tlat a, an thathonate pawh kan tihhniamsak viau thei reng mai a lo ni.

He school hi Presbyterian kohhran ta a nih avang hian a neitu kan tam a, thuneitu leh sawisel thei apui kan tam bawk. Sawisel ringawta ramṭang loin, a ṭhatna tur hi tih tak zeta ngaihtuahpui an ngai. A thawktute tana thil sawi nuam tak ni lem lo tura ngaih, an rilrua an vei rûk ni ngei tura ka ngaih si te, zirna leh he school (ralkhat aṭanga kan lo chhuan ve em em) kal zel dan tur hmakhaw ngai chungin thiam ang tawkin ka rawn thai lang ve e. Tute pawi emaw sawi tumna lam ni loin, zirna atana ṭhahnemngaihna vangah min lo ngaihsak teh u.

- Lalbiakliana