Hnehtute pawhin hliam an tuar ve ṭhin

2024 kum hlui thlah zan chu halpuah leh halmawi a puak dawn tawh lo hial a ngaih a nih hnuah zanlai dar 12 a rîk meuh chuan a puak leh ta nual a nih kha. Social media lamah halpuah leh halmawi khap chungchanga sawrkar khapna leh, kohhran leh YMA ngenna sawiseltu an awm ve nual a, an ṭang na hlawm kher bawk a; chutia an puak ta chu an lawm hle tih hriat theih turin thu an post uar khawp mai.

Mizoram Pollution Control Board thuchhuah kan lo hmu ta a, Aizawl a boruak tehna Air Quality Index (AQI)-ah kum hmasa 2023-ah 597 a nih lain, tun kum hlui 2024 thlahnaah khan 115 a ni a, nasa takin a tlahniam ta a nih ber chu. Hma kan sawn nasa hle mai; lawmawm tak a ni.

Sawrkar, kohhran leh YMA engvak mahah ngai lo, mahni fing inti a, kohhran leh YMA-a inhman chu sawi loh, sawisel fo zawkte tan pawh boruak chhia chu a lo tlem ta deuh a, hmasawnna a lo awm ta a ni.

Halpuah leh halmawi hâltute hi mi tlemtê an ni tawh a, a hâl chhunte’n an hal uar deuh niin a lang. Mizoram pum thlir chuan a hâl ve miah lo hi zaah sawmkua panga chuang an nih hmel a; hlawhtling tak a ni ti ila, kan sawi sual awm lo e.

Theihtawp chhuaha hma latute an fakawm thlâwt a ni. Beidawng mai loin hun lo kal leh turah thâ thlah loin hma la chhunzawm zel ila, a reh ṭhak loh pawhin hma chu kan sawn lehzual sauh ngei ang.

TV-ah boxing hmuhnawm tak ka en a, boxer pakhat zawk hmel chu a vûng nasa hle a, thisen a luang chhuak nual a, a mit dinglam chu a phui a ni deuh ber a; chupa zawk chu a tawpah referee-in a bánah vuanin chung lamah a lek chho a, chak zawkah a puang ta a ni. Tunlai Israel indona hi kan hre ṭheuh awm e; an hmelmate chu an tlâwm duai duai a ni ber a, mi sing chuang an tihlum tawh chungin, anmahni Israel sipai leh civil mite sang chuang chu an thi ve tho mai.

Tun ṭumah halpuah puak ve nual mah se, hlawhtlinna nasa tak kan hmu a; kan hriat ṭheuh angin, ‘Hnehtute pawhin hliam an tuar ve ṭhin’ tih hi a ni.

- VL-a, TKS