Kohhran duh loh MLPC leh MLTP Act

Hun rei tak a ta tawh tun thlengin zu hian titi a luah a. Tunlai phei chuan Zarkawt Kohhran, ti mai i la, an thawm a lian hle. An veng a zu zawrh a nih loh nan, sum tam tak seng tawhin tunah hian, an sawi dan chuan, Kohhran ngai pawimawh vak lo nen an inhmachhawn mek.

Veng tinah kohhranin zu a do a, hlauhna avangin khawi veng mahin an zuar ngam lo. Kohhran hlauh tur a awm lohna hmun, a ruka vote kan thlaknaah chuan thlamuang takin zu zawrh thlawptu leh thunun duhtu party kan vote tling mai. Mahse Veng dang ang bawkin Zarkawt veng pawhin zu zawrh an duh lo a, an Kohhranin an duh lo takzet tih a lanna chu heti ang hi a ni.

An duh lohzia pakhatna

A tirah Ahimsa Hotel hmun hi dahkhamin ZIDCO aṭangin loan lak a ni. Mihring chin hriat a ni lo a, vanduaina pawh tawh theih a nih vangin a rulh leh lamah harsatna a awm. Loan an pukna ZIDCO chuan hetiang deuh hian a ti a, kan pawisa in puk min pe leh thei si lo a, in dahkham Ahimsa Hotel chhuhsak lo che u hian zu zawrhna atan kan lo hmang zawk ang e. Kan luahman aṭanga in cut-in loan chu min rul mai dawn nia, tiin, khawngaihna nen Ahimsa Hotel neitunu Pi Mabiaki chu an dawr ta a. Loan rul thei remchang lo tan chuan a hahdam thlak mai bakah Loan an pukna ZIDCO te’na a rul thei lote hnena remchang an siam sak hi an fel hle a ni; Pi Mabiaki pawhin a pawm.

Amaherawhchu hetiang hi a ni. Zarkawt Kohhranin, chutianga MLPC Act hnuaia an venga zu zawrh a ni mai tur chu an lo duh lo nasa mai a. Ahimsa Hotel neitu Pi Mabiaki chu rang taka biain, Kohhran chuan hetiang deuh hian a dawr. Zarkawt veng chhunga zu zawrh ai chuan i loan puk nuai engemaw zat hi kan rulh sak che ang a, thlatin 12,000 chauhin min rul leh dawn nia, tiin. Chutiang chuan inremin Zarkawt Kohhran ṭhahnemngaihna leh hmalakna avang chauh pawh ni lo, a neitu nuin Kohhran duh loh zawnga awm a ngam loh avang chuan Ahimsa Hotel-ah zu zawrh a nih loh phah ta a ni. Kohhran ṭhahnem ngaihna a fakawm hle.

An duh lohzia pahnihna

Ahimsa Hotel chungchang chin fel a nih hnuah Kohhran hriat loh hlanin Pu Zalawma fate’n an in hnuaiah MAMCO zu an lo zawrh tir reng mai. A hmun tak chu Zarkawt Bus Stand aṭanga Chandmari lama in thumna saw a ni. Mipui titi leng vak aṭanga kan hriat dan chuan, a in neitute hian Kohhran pawna awm pawh pawi an ti lo a, Kohhran a in hmang lo leh inkhawm vak ngai lo, Sunday School erawh kal ve ṭhin an ni.

Zarkawt Kohhran chuan MLPC Act hnuaia zu zawrh chu duh loin, hma a la ta a. Zu an dozia lantir na’n Kohhran chuan June ni 1 aṭang khan zing dar 9 aṭanga tlai dar 5 thleng zu dawr bulah awm khawmin poster te an keng a. Zu lei turte hnenah lei lo turte’n ṭhahnem ngai takin an lo hrilh ṭhin a, an inpekna a fakawm hle. Chutiang chuan chhiat tawk an awm loh chuan nitinin MLPC Act hnuaia zu zawrh an duh lohzia an lantir ṭhin. Engatinge MLTP act zu khap burna dan kan hman lai khan hetiang hian an ti loh?

Hemi aṭanga kan hmuh theih chu. Kohhran hian MLPC Act hnuaia zu zawrh hi a duh lo hle a. MLTP Act hnuaia zu khap bur pawh a lo duh lo tih hi a ni. Han ti chiang leh zual hret ila. MLTP Act hnuaia zu khap bur a nih khan kan kawt kaiah leh kan veng chhungah a ruka zu zuar, mahse an zuar ngei a ni tih kan hriat an awm a. Kohhran erawhin tuna a do ang hian a do lo. Tuna Kohhranin a do dan hi, ‘do’ awmzia kan hriat dan a nih chuan, MLTP Act hman laia Kohhran kha chuan zu a lo do duh lo tihna a ni. Chuta ṭang chuan MLTP Act hnuaia zu khap bur pawh a lo duh lo tih a chiang hle. Kohhran hian a pawm thei ang em?

Chutianga zu khap bur laia Kohhranin zu a do duh si loh a, zawrh veleh a do leh bawk si a. Chuti chunga zu chu engtik lai pawha a do thu a sawi a nih chuan Kohhran chuan politics a khel kan ti thei ang. Politics a tui kohhran hruaitu a awm ve theih tawh tho si a, chutiang mite’n lang si loin Kohhran an nawr a ni thei ang em. Kohhran chakna hmang ṭangkai duh politics a tui a awm ve theih tih hriat a ṭha. Sawrkar ding lai tih buai hrim hrim tuma Kelkang boruak hmang ṭangkai pawh an awm thei ang.

Kohhranin tuna a do ang hian MLTP Act, zu khap burna dan kan hman lai khan do ve ta se, sawrkar hian MLTP Act a la hmang ngei ang. Chu chu Kohhranin a pawm a, ṭhahnem a lo ngai tawk lo tih a pawm a, insiamṭhat a tum takzet a nih chuan MLPC Act hi Kohhran hian tichak zawk rawh se. Police-in an mana vantlang hna an thawhtirte hi theihnghilh zui leh mai loin, zirtirna lo pe zel sela. Chutiang mite tan chuan Kohhran tinin Councelling Class te hawngin tih tak zetin sawrkar hi ṭanpui zawk se, kan ram hian hma a sawn zawk ngei ang.

MLTP Act-ah pawh ṭanpui lo a, MLPC Act-ah pawh Kohhran hian a ṭanpui lo leh zel dawn a nih chuan mipuiin Kohhran a hriat dan a danglam phah dawn. A ṭanpui zawngin Kohhran hi kal tawh hram se.