A ṭha zawnga inher rem

Mizote hi hnam naupang tak kan la nih avangin kan rilru sukthlek, ṭawngkam, nunphung, duh zawng, leh nitina kan chetziaah puitling tawk lohna kan ngah hle. Kan kalphung a ṭha zawnga kan her rem ṭulna tlem han tarlang ila.

Ruah sur dek dek a, leimin, lei tlahniam, luah ngam loh khawpa in chhia, in tlusawp, road block a awm fo mai. Leimin chhan tam taka a mawhphurtu ber chu keini a chhunga chengte hi kan ni.

Tin, Traffic chung­chang pawh sorkar leh mipuiten kan vei viau laiin traffic jam lohna tura kan nitin nunphung thlak danglam tura sorkarin thu a chhuah meuh chuan kan duh lo leh hle si. Thil ṭha leh dik nia kan hriatte hi kan zawmin kan ti leh peih tak tak si lo.

Kan fimkhur tawk loh rah, motor accident avanga nunna kan chan fo mai te hi a pawi hle. Zoram mipuite hian harsatna kan tawh changin ngaihtuahna fim nei miah loa sorkar sawichhiat kan duh ṭhin a. Ṭul hlei loah mi puitling tak taka ngaihte pawhin chet an thawh vak zel.

Chhungkua awp lum hma lo lekin program hrang hrangah kan inrawlh ṭhin te hi a ṭha zawnga inher rem a hun ta.

Sorkar tha nei tur chuan khua leh tui ṭha (good citizen) sor­karin a mamawh a, khua leh tui ṭha nei tur chuan sorkar ṭha kan mamawh bawk. Local Cable TV channel hrang hranga pavalai, nu valai, officer leh naupang thlengin Pathian fak hla saa kan lam mup mup han lai hian kan nitin nunah erawh sualna leh hlemhletna a pung thur thur tho - kan kristianna nen a inmil lo mang e.

Zoram hian a ṭul hun apianga a ṭha zawnga inher rem thei sorkar leh mipui a mamawh a. Hemi pahnih kan neih kawp phawt chuan rorelna ṭha (Good Governance) kan nei ang. IT nen kan ṭang kawp ang a, e-Governance ṭha tak kan nei thei bawk ang. Zoram nuam siam turin kan zavaiin a ṭha zawnga inher rem kan mamawh e.