PATHIANNI-A INRÀL THU
Aizawlah hian veng 83 emaw kan nei a, khaw khat ni si, khaw hrang hrang ni si kan ni. Khaw tinin khawtlang leh Kohhranah tih dan kan nei thliah a, mitthi ràl chungchangah pawh hian, kan tih dan a inang lo deuh hlawm chu niin a lang. Chuvangin, tum loh deuha awm ve theih a ni. Hetiang lama harsatna nei ve miah lo veng pawh a awm theih khawp ang a, mahse veng ṭhen-khatah chuan 'buai ru' hi a awmin ka hria!
Veng ṭhenkhatah hian mi an thih aṭanga Pathianni hmasa ber tlaiah Kohhranin an rál a, (a mitthi a zirin) a vawi hnihna-ah MUP-in, a vawi thumna-ah MHIP emaw, Civil Pensioners Association emaw... chutiang zelin. Pathianni vawi thumna emaw thleng lai hian tlaiah inràl programme hi a awm ta ṭhin a, mitthi hi, kan laina hnai tak tak an nih loh chuan, mahni hna ṭulte avangin Pathianni remchang hmasa, chawhnu inkhawm ban vel hi kan lèn theih hun a lo ni ve nual hlawm ṭhin bawk si. Kan va kal a, pawl inràl programme hi nan fuh a awl khawp mai. Chutiang a nih hlauh chuan chhiat tawkte nen pawha inbe mumal thei lova haw leh mai a ngai fo. Mi veng leh Kohhran tih dan va sawisel ngawt dan a awm bawk si lo! Lawm vak lo hian a awm theih!
Duhthu sam ta ila, veng chhung mite hi chuan Pathianni tlai hi ruat ve kher ta lo ila, MUP lamte pawh a tlangpuiin kan lo chak lo deuh tawh a nih pawhin, ni dang chawhnu her remchangte hi dap thiam ta ila, chutiang bawkin pawl dangte pawhin. Pathianni tlai hi chu veng danga ṭhenrual ṭha leh lainate duhsak chungin, ṭinsan kher chuang lovin pawl programme hi hmang lo ta ila chuan kan ziaawm ka ring deuh a, veng pawn lam aṭanga lo leng vete, pawna ngawi renga ṭhuttir loh dan hi ngaihtuah a ṭul ka ti angreng ngawt mai. A tuartu lamah hetiang hi ka tawng tawh a, a lènpuitu lamah ka tawng zauh zauh bawk.
A thu hrimah Pa-thianni tlai vawi 2/3-na thlenga programme kan siam hian, chhiat tâwk chhungkuate tihbuaina chin kan nei ve theiin ka hria a, ṭhutthleng ilo seng hawi te, pindan bang leh in chhung bungraw dang tihfelte an duh tawh hnuah pawh pawl hun ruat la awm kha thlirin ti hlei thei lovin kan siam ve thei.
Aizawlah hian kan ṭul deuh hlawm tawh avang leh, tun hma anga khawhar lènpui hun hi a rei tak tak theih tawh loh avang hian, zing kar leh chhun lamah phei chuan kan ruak hma angreng ṭhin a, chuti chunga 'hla taka mi' nghaka lo awm reng chu a buaithlak chin a awmin ka hria. Lo ngaihtuah ve chhin teh mah u!
- RK Lianzuala