Kum hlui ding rih rawh

Hun leh kumte hi mihringte hun tawn azirin kan ngaihluin kan ngaihlu lo thei a. Mi ṭhenkhat tan kum chhiat kum nìin, ral thuai thuai se kan duh a; nimahsela, mi ṭhenkhat tan erawh kum ṭhat kum, thil engkima bul ṭanna thar kan neih kum, hriat reng tlak thil ropui kan tih kum a ni a, ral mai lovin ding reng se kan duh ṭhìn.

Kum thar vêk hi kum hlui a nih ṭhin avàngin, lungáwi taka kum hlui kan thlah liam theih nan kum bul kan ṭan dànah rilru fím kan put a ngai ṭhin hle. Khuarèl chhiatna avang leh vanduaina avanga kan chunga thleng atana kan duh loh thil ṭha lo tam tak hi mihringte chunga thleng ṭhin a ni. Lei mîte chung thil thleng ṭhin hi Síamtu (Pathian) ruat ang zela thleng ṭhin a nih rualin, kan chunga thil ṭha lo lo thlengte leh kan bula chêngte tana thil ṭha lo kan thlentír chhan tam zawk erawh kan nun kan fimkhur tâwk loh vàng a ni fo. Kan fimkhur loh zár zovin mi dang kan tinâ a, natna ṭha lo kan kai chhâwn a, duh loh chung chungin beidawnna ruamah kan hnûk lût a. Keimahni avang vêkin thihna hial kan bula mîte chungah kan thlentír cháng pawh a awm ṭhìn.

Mi dang tána malsàwmna thlentu kan nih theih loh pawhin mi dangte tán harsatna siamtu nih tum lo ila. Mi dangte kan fak thei ngang lo a nih pawhin i sawisêl kher lo vang u. Kum hlui thlah liam harsa titute zînga kan hming a chuan ve theih nán mi dang tán malsàwmna thlentu nih kan tum zâwk tur a ni.

Ni khat chu pi tar kum 86-a upa hian chatuan ram a pan a. Têttê aṭanga hmangaih taka a lo enkawl sei len a tu leh fate chuan tawrh thiam har an tiin an ui êm êm a, mittui nen an thlah liam a ni. Kum tam a vei hnu pawh chuan hmangaih taka a lo enkawl tawhnate chu mitthláah a châm reng a, a tu leh fate chuan an theihnghilh tak tak thei rêng rêng lo mai a. Hun bîk a lo inher chhuah apiangin a thlànah kalin an ṭap an ṭap ṭhin. An ngai a, dinhmun rethei taka an din lai zawnga hmangaih taka lo enkawltu an pi chu dinhmun ṭhàa an din hnu-ah a thlàn mawi taka cheisak chauh chu an tih theih a nih avangin an rilru a na thar ṭhin a, an rilru chhúngril tak takah thlah liam harsa an ti ṭhin.

Keini pawh hun ṭha kan neih lai hian ṭanpui ngaite ṭanpui ila, kan tana thil ṭha min tihsaktute chungah thil ṭha ti ila. Kan chunga thil sual titute ngaihdam theihna nun nei bawk ila. Chu chuan nun a tinuam ang.

'Fam kan chang thei kum leh chuan...' tia hla siamtu'n a sawi angin, kumina kan hun hman mék hi kan khawvêl hun hnuhnung mai bâkah, kan hun tàwp pawh a nih theih avangin ngaihdam dìl ngaiin kan tùn hun hi hmang lo ila. Kan tùn hunah hian mîte thinlunga châm reng thei tur thil ṭha tih i tum zâwk ang u.

- Centenary C. Lalzahawma