Zu kan buaipui dan thlak ang u

A duh lo lam tan chuan zu avanga buai nuaih nuaih rin pawh kha thil awm lo a ni lo. An theih ang anga sorkarin zu zawrh a phal tur an dodal pawh kha a mak lo e. Ral aṭanga thlir chuan zu zawrh a nih chuan zu avanga kan buai nuaih nuaih rin kha thil awm tak a ni reng a ni.

Mi tam zawkah chuan zu hi a ṭhatna aiin a ṭhat lohna a tam zawk tih hi chu phat rual a ni lo. Zu in mi tam zawk hi chu ruih duh avanga in an ni a, an duh ang ngeiin an rui ṭhin.

Tunah chuan mi tam takin an nghah­hleh em em leh mi tam takin an huphurh ngawih ngawih chu a lo thleng ta. Sorkar phalna thlapin March 16, 2015 aṭangin Aizawl khawpuiah chuan zu zawrh ṭan a ni. Dan anga zu zawrh hnu leh phal loh laia zu zawrh laia zu in ṭhinte dinhmun leh kan khawpui dinhmun chu kan hre ta.

Zu zawrh avangin kan buai tak nuaih nuaih ka hre loa, zu zawrh avanga khawlaia zu rui an pun tak vak pawh ka hre hek lo. Zu avanga buai, zu avanga chhungkuaa harsatna siam, khawlaia zurui an awm lo ka tihna a ni hauh lo. Heng kan sawi angte hi chu dan anga zu zawrh hma pawh khan an awm tho. Mi ṭhenkhatin phalna hnuaia zu zawrh a nih hnuah an suangtuahnaa thleng tur an sawi tam tak erawh chu a thleng ta hauh lo tih hi zu zawrh duh lote pawhin an pawm ka ring.

Kohhran tan chuan zu zawrh hi engtik lai maha duh chi a ni hauh lo. Kohhran a din chhung chuan zu zawrh hi an pawm turah ka ngai loa, zu zawrh an pawm thlap a nih chuan kohhran hi an demawm zawkah ka ngai ang. Mahse, an zu do danah erawh an fimkhur a ngai hlein ka hria, pressure group ang maia zu hi an do a nih chuan mi tam takin kohhran an hmuh dan a dan phah a hlauhawmin ka hria.

Sorkarin zu zawrh hi phal lo pawh nise, kan duh emaw, duh lo emaw zu zuar hi chu an awm reng thoin keichu ka ring tlat. Zu hi do hneh chi a ni loa, a induhte chuan sorkarin zu zawrh a phal hma pawhin intur an hmu reng tho a nih kha. Zu hi a awm reng dawn tho a, chuvangin kan buaipui dan hi thlak a ṭulin ka hria.

Tuna zu kan buaipui dan luai luaiah hi chuan a la in lo tan pawh in a ti chak awmin, a in ṭhinte tan pawh wine shop kal a ti chakawm zawk emaw tih mai tur a ni. Zu in ṭhin leh a in ngai loin zu an buaipui luai luai hunlai kha a awm a, tunah chuan zu in ngai loin zu an buaipui nasa tawh zawkin ka hria. Zu in ṭhin chuan zu an lei a, duh duh huna lei tur a awm tawh avangin zu an buaipui ve vak tawh lo a ni.

Zu in hi thiam tak tak theih chu a ni hauh lo maithei mah se, tuna mi tam takin zu an indan aia indan ṭha zawk hi a awm ngei ang. Kan khap hneh chuang hauh lo tur a nih miau avang leh in duh mi tam tak an awm avangin, zu in dan inzirtir hi a pawimawh tak zet a ni.

Chaw ei dawn no hnih khat in duh tawk mai te, muttui na atana tlem a zawng in mai te, taksa a chauh deuh changa tlem a zawng in ṭhinte leh ṭhiante nena inkawm hlimna atana hmangte mi engemawzat an awm a ni. Vanglainiin Zoram Titi a buatsaih ṭum khan officer pension pakhat chuan zan tin zu a in ṭhin thu leh no khat vel bak a in ngai loh thu a sawi. Hepa hi keichuan zu inthiamah ka puang lo thei lo.

Keini aia u deuh nimahse, ka ṭhianpa tia ka chhal ngam pakhat chuan a pa in naupangte a nih laia zu a intir thu leh zu avanga a buai lohna tura a zirtir ṭhin thu min hrilh. Ka ṭhianpa hi tun thlengin zu a la ina, mahse a rui buai ka hmu ngai loa, zu a in avanga an chhungkua an buai phah pawh ka hre ngai hek lo. Pafaa zu in maite pawh sawi tur ka hria, chung ka hriatte chu zu avangin an chhungkua an buai ngai lo a, hnawksak khawpa zu in pawh an awm ngai hek lo.

Keichuan engtin nge zu in thiam turin kan inzirtir ang tih ka hre hauh lo mah se, mithiam tak tak engemawzat Mizoramah pawh kan nei tawh. Chungmite chuan, chhungkaw, khawtlang, tlawmngai pawl leh sorkarte'n miin zu thiam zawka an in theihna atana hma an lak dan tur chhawp chhuah tur an hre ṭeuhin ka ring.

Mahse, hei erawh theinghilh lo ila, eng ang pawhin inzirtir nasa ila, zu avanga buai tawk hi chu an awm reng tho ang. Hnam changkang leh upa zawkah pawh zu avanga buai tawk hi chu an la awm reng a nih hi. Hetiang mi hi chu eng ram leh hnamah pawh khawvel awm chhung chuan an awm rengin ka ring.

Tin, zu hi hriselna atana ṭha lo tak pawh a ni hek lo. Zu inthiam chuan an ṭhat pui zawk ti ila kan sawi sual awm lo e. Zu hi thil ṭha lo hulhual nise chuan doctor-te hian mi ṭhenkhat hi an chawhin ka ring hauh lo. A in dan chin tawk thiam lote'n an chhiatpui ṭhin. Hengte avang hian zu in dan inzirtir hi a ṭul tak zet zet a ni.

Zu hi ka fak loa, in loh theih tluka ṭha awmah ka ngai lo. Mah se, heti zat zu in duh an awm chhung hi chuan, zu hi a rem a rinawm lo. Eng ang pawha doa awm reng tur do vak vak ai hian, a in mite'n thiam zawka an in dan tur ngaihtuah leh zu kan buaipui dan thlak hi ka sawi tum ber chu a ni.