Vanglaini ka chhiar a (Ka vei zawng)
Vanglaini ni 6 August 2016 chhuak, phek hmasa berah "Ruihhlo doin Sorkar leh YMA thawkho" tih thupui hmangin Sorkar leh YMA thawhho tur thu kan hmu a. Kan ramah ruihhlo a hluar a, kan ṭhalaiten an thihpui nasa hi a lungchhiat thlak takzet a ni. He thawhhona hian rah duhawm tak chhuah se a duhawm ngawt mai.
He issue-ah vek hian Police-in ruihhlo chi hrang hrang an man khawm chu Home Minister-in Mualpui 3rd Bn. MAP playground-ah a hal ral thu kan hmu. Hetianga ruihhlo man khawm hi hun leh hmun hrang hrangah hal ral a lo ni fo tawh ṭhin.
Heng ruihhlo man khawmsa, hman
ṭangkaina awm si lo thehthang dan ṭha ber chu hal ral hi em ni dawn le? Mizoram pollution control board leh COPTA dan buaipuitute lam hian engtin tak ngai ang maw! Boruak chhia kan tihchhuah khawvelin nasa takin kan buaipui mek nen hian a inpersan viau mai. State dangte ngaihtuah chuan kan ramah motor vehicle a la tlem a, mahse danin a phut avangin pollution under control certificate nei ngei turin kan intur bawk si. Thil in kalh tak tak hi kan ti leh mai ṭhin.
Editoral-ah "GST atan inbuatsaih a ngai e" tih kan hmu bawk a. Tunlai chu India ramah na na na chuan subject pawimawh ber a ni awm e. India ramin bung thar pawimawh tak a chuangkai dawn a ni a; state tinte kan lo inbuatsaih a, he dan thar hi kan bel hle a ngai reng dawn a ni. Mipuite hnena hrilhfiah leh zirtirna kawngah pawh chanchinbu mite hi a thawh hlawk berte zinga mi an ni ngeiin a rinawm. "Kum khata cheng nuai nga aia tam la lutten service tax an chawi a ngai tawh dawn" han tih ngawt pawh kha a dik tluantling lo deuh. He danin a huam ve loh tur (taxable person ni ve lo) an awm ṭeuh tho mai.
GST hi Sorkar laipuiin a buaipuina a rei tawh a. Helam buipuitu tur Mizorama kan department official-te pawh hian an hre viau tawh turah a ngaih theih ang. Ni 10.5.2007 khan Empowered Committee of State Finance Minister in Joint Working Group an lo din tawh a. GST Law pass a nih hma daihin Draft Model GST Law pawh peih fel a ni a, ni 14 June, 2016 khan Ministry of Finance website-ah tarchhuah a ni. Kan official-te pawh hre viau tawh turah an ngaih theih ang.
Editorial-a kan hmuh ang khan State Goods and Service Tax kan hman ve tur hi kan ngaihven a, IT lam thlenga kan inbuatsaih ṭhat loh chuan kan state-in nasa takin kan tuar thei dawn.
- C. Lalchhuanmawia
Lily veng,
Chaltlang North