Pu David Thangliana leh Lalhnam sakhua
Vanglaini chanchinbu January ni 6, 2025 (Thawhṭanni) chhuakah khan chanchinbu vela thu ziak ṭhin langsar tak Pu David M. Thangliana'n 'Tunlai Titi' tih thupui hmanga thil chi hrang hrang a ziak ka lo chhiar ve a. Lalhnam sakhua chungchang a sawi zui dan kha ka ngaihdan leh pawm dan letling deuh thawk a nih avangin han tarlan ve ka duh a ni.
A hmasain Pu David M Thangliana hi Kristian a ni turah ka ngai ngawt a. Mahse, Bible hi a ring vek lem lo emaw, a chhiar chik viau ngai lem lo em ni aw ka ti a. Thu lakna atan Bible aiah Google emaw a ring zawk em ni chu aw ka ti rilru bawk a.
A thuziak aṭang kha chuan khawvela sakhua zawng zawng hi intluktlang vek, Kristian sakhua hi sakhaw dang aia chungnung bik lovah a ngai niin a lang. Sakhaw hrang hrang vuantute'n an sakhua ṭheuh dik bera an ngaih thu te, kan thih hnua kan awm dan tur tu mahin fiah tak leh chiang taka hria leh sawi thei kan awm loh thu te a ziak a. "He sakhua hi a dik ber a, he sakhua hi chu a dik lo, kan ti thei ngawtin a lang lo," tih te, "He sakhua hi a ṭha ber, he sakhua hi a chhe ber," tia sawi tur hi a awmin a lang lo, a ti bawk. Hetiang hi a rilru leh ngaihdan a nih chuan, a tan chuan Kristian nih a ngai lem lo a, Pathian hnena ṭawngṭai pawh a ṭul kher lo tihna a ni thei awm e.
Kei chuan Kristian sakhua leh sakhaw dangte chanchin thui tak ka hre lo va, an awm ṭan hun pawh ka ngaihtuah lo. Ka hriat leh pawm erawh chu kan Pathian hi 'Awma' a ni a, a bul leh a tawp a ni a, khawvel leh khawvel piah lam zawng zawng pawh a siam a ni, tih hi a ni.
Kristian (Christian) tih hming put ṭan hun leh sakhua ang tak taka sawi ṭan a nih hun chu eng pawh ni se, Kristian kan nih chhan kan Pathian hi engkim ti thei, lalte lal, pathiante Pathian, mihringte (Kristian ni lote pawh) leh thil dang zawng zawng siamtu a nih avangin Kristian sakhua hi sakhaw dang zawng zawng aia chungnung zawk leh dik zawk tih hi ka pawm thlap dan a ni. Kristian dangte pawhin an pawm dan a nih ngei ka ring. Hetiang hi kan pawm dan a nih loh chuan Kristian kan nih a ṭulna a awm lo kan ti thei ang.
Kristiante lehkhabu thianghlim chu Bible a ni a, hei hi Pathian kan rinna innghahna bulpui a ni. Bible hi kan ring a nih si chuan, kan Pathian hi pathian dangte aiin a chungnung tih pawh hi kan pawm dan tur a ni.
Kristiante zingah kohhran pawl (denomination) hrang hrang kan awm. Kohhran emaw, kohhran ni lovah pawh, pawl anga kan awm tawh chuan dan (inkaihhruaina dan) te, kalphung leh tih dante kan neih a ngai a, kohhran pawl hrang hrangte pawhin kan nei reng bawk a. Pawl hrang na nâ nâ chu, inang vek thei a ni lo tih chu kan hriat sa a ni awm e.
- Zoramchhana