Decentralisation of Power in School Education

Govt of Assam (Mizo district) hun lai aṭangin superannuation pension 30.09.2014 thleng Education Department-ah ME school headmaster, high school headmaster, higher secondary school principal, School Education joint director hna ka thawk a. Thawhpui ṭha tak takte leh thiam takte zarah vawi khat mah ning lo leh ‘Ni a rei mang e’ ti lovin ka thawk a, Pathian min hruainaah leave la lo leh MR bill lovin ka thawk chhuak a, ka lawm hle. Ministry hrang hrang ka hrawn a, Director of Education leh officer hrang pawh ka hrawn tam viau. Director of Public Instruction, Govt of Assam (DPI Shillong) erawh kha chuan ka school a tlawh lo.

Education-ah hian politics a inrawlh nasa hle tih chu District Council hun aṭanga vawiin thlengin mi tin hriat a ni a. MDC-te pawh kha appointment, posting leh transfer-ah an thu hle ṭhin a, tunlaia kan MLA-te ai mahin thuneihna an nei sang hial awm e. Hei hi kan ram Education ṭhanmawhbâwk leh piansualna a ni e, lo ti hial an awm pawh hi a mawh lo ve. UT sorkar kan nih lai hun eng emaw chen kha chu department officer-te’n pawimawhna neiin, inspecting officer-te’n school an tlawh (visit)-te khan lukhâwng (effectiveness) a neih avangin hotute tlawh nih kan nghakhlel a, anni tlawhtute lahin phur takin an thawk ṭhin.

Kum 40 vel lai a ni ta, inspecting officer-te’n note an ziakin kori a tu ta meuh lo. Negative impression lam hawia ziakte chuan bawhzui a hlawh deuh pawh a ni thei e. Headmaster ka thawh ve chhungin chuti lam negative note ka schoolah ka tawng miah lo va, sawi thui lo mai ila. M/S leh H/S headmaster ka thawh chhung khan visiting officer ka tawng tam hle a, a tawng tam ber ka ni hialin ka ring a; hlawkpui vek lem lo mah ila a lawmawm ka ti e.

KAN INRELBAWL DAN HI

Directorate:

Director hnuaiah additional director, joint director, deputy director leh supporting officer-te kan nei. Anni ho hian office hna an thawh bakah an hun tam tak chu visiting officer hna thawk thei leh thawk ṭhin an ni. Office-a ṭhu lova school an tlawh apiangin notes mumal tak an ziak ngei ṭhin a, an notes ziahte erawh chuan awmzia a nei thui viau lo tlat. A chhan chu, Ministry thu lo chuan engmah a kaltlang thei tlat lo. Chuti a nih si chuan anni tan ṭul leh ṭha ti mah se la, zin chhuah chu a chakawm tlat lo. An tlawh school-te lahin lukhâwng nei lo tlawh chu an ngaisang lo zui a, khual ṭhate riahna leh ei tur tuihnai lo buatsaih hautak chiah an chan a ni mai. Decentralisation of Powers a taka kalpui ni se la chuan hmasawn leh hmasawn leh zelna tur kalkawng a ni ngei tur a ni.

District-a kan kalphung: District 11 kan neihah district education officer an awm a, anni hi high school, higher secondary school bitumtu ber an ni a, an district chhunga sub-divisional education officer-te viltu leh uaptu an ni. Anni hi H/S leh HSS-ah te inspection & supervision a taka kalpuitu, hre chiangtu tur, viltu, fuihtu, kaihruaitu an ni. Anni ho aia hre chiang tur beisei leh phut tur an awm lo.

DEO-te’n an enkawl school-te tlawhin an hmuh dan, an mamawh, siamrem/siamṭhat ngaite pawh notes-ah fiah takin an ziak a; chumi copy chu concerned headmaster/principal-te’n true sopy siamin directorate, under secretary (PS to Minister thleng pawhin) an thawn a, bawhzui ngai apiangte bul tumtu tur siama thawh tur a ni. Mahse maw… DEO-te notes chu eng ang pawh lo ni se la, a lu ber Ministry-ah barah khawn a nih loh chuan DEO-te thawhrimna kha a thlawnah changin, meikhu angin a zâm ral mai ṭhin. Chuti a nih si chuan rim taka thawh chhuah fo chu DEO-te tan a phûrawm lo chauh ni lovin, mahni inteitêtna lek a ni thei. An tlawh school-te lahin power nei hauh lo visiting officer chu an fak theih loh bakah, hnawksak ang leka ngaihna an nei ru thei.

Sub-division-a kan dinhmun:

Sub-divisional education officer (SDEO) 19 nei ṭhin kha Ngopa Sub-Division a lo piang a, tunah chuan SDEO pawh 20 lai kan nei ta (hei hian autonomus district council pathum a huam tel lo nual). SDEO-te hi an bial chhung middle school leh primary school tam tak enkawla viltu an ni. Khaw khatah pawh school 4-10 laite an awm avangin hna an ngah hle a, office staff erawh chu an nei tlem a, teacher attached nei lo thei lo khawpin an indaih lo reng a ni. CEO lah tun hma angin kan nei mumal ta lo va, kan SDEO-te hi an thawkrim lo thei lo.

Heti taka office hnaa ṭul chung hian an biala school tlawh a ṭul fo a, hah sawi thei an ni lo. School tlawhin–on the spot-ah emaw, inspection notes hmangin emaw DEO/Directorate-ahte thlen mah se la, Government/Ministry thlen a ngai a, ministry decision tel lo chuan an hmuh leh an notes-in awmzia a nei tak tak ngai lo. Urgency avanga order lo siam ṭulin lo thawk se la, anmahniin koh emaw explanation emaw an tawng mai ang.

DECENTRALISATION OF POWER CHU LE

Thu leh hla pawimawh thlen khawmna Directorate hian DEO/SDEO-te notes aṭangin action a la thei tlat lo zu nia. Hetiang hian kum 40 vel kan awm tawh tlat. MLA/Minister thutlukna ngat lo chuan a takin thil a kal ngai lo. Kum 40 vel chhunga Education Minister tu mahin primary, middle, high, higher secondary – school-te hre fiah zo an la awm ngai lo va; tuna kan Education Minister viak ṭha tak tan pawh tlin ziazâng a ni lo.

Posting:

Posting thu-ah hian a bialtu DEO/SDEO-te aṭangin school/khuate’n an mawmawh dan fel taka tarlangin proposal siam ni se la, chu chu Director hova sawiin, Minister consent/approval lak ni ṭhin se. Hetianga thawh a nih chuan tu tute’n emaw kan Minister an chirhtheh fonate a bo daih ang. Directorate-a thlitfim hnu Minister approval-ah chuan kan department hi nghet takin a ding ang a, Minister support ṭha duh lo officer an awm ngam hlek lo vang. Appointment erawh chu sorkarin competent authority a neihin just leh fair takin a thawk dawn si a.

Tuna kan kal dan (kum 40 vel ni tawh)-ah hi chuan DEO-te’n an bial chan (district) chhungah pawh thu an nei lo va, SDEO-te lahin chuti bawk chu.

Transfer:

Mihring kan ṭhahnem a, state capital aṭanga village-te leh kilkhawr ber thlengin teacher-te’n hmun pawimawh tak an luah. Transfer dilna chu mahni controlling officer kaltlangin proper channel-a dil tur ti mah ila, direct-a bialtu MLA/Minister hnena thlen ta mai an kat nuk reng a, chungte chu an tlatlum duh phian lehnghal. DEO-te hian an district chhunga transfer-ah thu nei se la, Minister-in ngaih pawimawh a neih pawhin DEO-ah direction pe mai ṭhin se. Inter-district transfer-ah erawh chuan Directorate-ah thlenin, Minister approval ngeiin kal se.

Towns & villages:

Primary school leh middle school hi khaw pakhatah pakhat aia tam awmna a awm nual a, hetianga khaw khata school 1, 2, 3, 4, etc-a mite transfer ṭulah phei chuan bialtu DEO/SDEO thutlukna angin kal mai ni se (anni tluka hre chiangtu an awm si lo va).

RATIONALISTION OF TEACHERS

Hei hi primary aṭanga higher secondary – school-teah a pawimawh hle. Sorkar kan hrawn tawh zawng zawngte khan ṭul leh ṭha ti siin puitlin zo an awm lo. Thil tih theih loh a ni lo ve: duhsak bik neih vang, vote hloh hlauh vang, party worker-te mitmei ven vang, sawipuitute hmaizah vang leh a dangte vang mai a ni. Kan sorkar hrawn mek hian han tipuitling se la chuan Education Department-ah chuan kalphung thar ṭha tak a ni ngei ang; theih loh a ni si lo va. Keima mimal thlirna aṭang chuan tuna kan Education Minister hian department-a officer-te nena ṭanghovin a puitlin theih beiseina sang tak ka nei.

Rationalisation hian transfer tam tak a kalpui ngei dawn a, heta kan hriat tel tur chu punitive transfer a ni. Transfer lo tawngtu chu tu pawh lo ni se la, hremna lama dah lovin, Mizoramah kalpui a ṭul miau vang a ni tih teacher-te leh an lainate’n hre mawlh rawh se. Decentalisation of Powers thupuiah a kaihhnawih kan sawi tel nual mai; sawi lan tel an ngai tlat atin a ni e.

- JH Biakmawia