Facebook-a ka Mizo Nula hmuh kha

Facebook hi zei lo chung chungin account ka nei ve a, Mizo nula ruak ngalngata thlala ka hmuh khan min barakhaih hle a ni. Tute emaw che sual lai lo la ru deuh leh tute thlalak 'leak' emaw ang kha a ni ve lova, photographer hmaah a inphelh ruak a, light-te uluk taka remin thla a la a ni.

Kha Mizo nula kha tu nge a nih ka hre lova, a nu leh pa ka hriat loh ang bawkin an kohhran lawina pawh ka hre lova, Yoga lam timi a nih leh nih loh ka hre lova, ka dem daih zawk chu khatianga ti tura 'thlemtu' kha a ni. Amahin, "Khawngaihin ka inphelh ruaklai thla min lo laksak ta che," a ti a nih chuan sawi zui tur ka nei lova, tuten emaw "I taksa a nalh si a, ka
ṭhianpa hi thlala thiam a ni a, i inphelh ruaklai thla laktir teh a," an tih chuan chu pa chu ka dem ang.

Photographer-in, "Lo kal rawh, studio-ah i thla la ang. A zahthlak loh. Inphelh ruak la, i hmai leh i serhlang lo chiah chiahin i in pose dawn a nia, hetiang hi 'art' a ni a, Sapho phei chuan an ching a, Mizo hi kan la naupang a, thil hi kan sawisel a, hetianga saruak thlalak hi chu a 'changkang' a nia. Chubakah i hmel a lang dawn lova tumahin an hre dawn chuang lo. I ngam phawt chuan ṭha takin kan la ang a, a zahthlak miah lo a nia," a ti a nih chuan, he hmeichhe thlalak phena awm thlaltu hi kei chuan na takin ka dem.

Engvangin nge i dem? min tih chuan ka chhanna tur chu, "He nula hian hlawh a nei lo. Eng magazine-ah mah a lang lo. Mi inphelhruak ve chuan hlawh an nei a, hlawh nei lova nula inphelh ruahtir tu hi ka dem lo thei lo a ni," ka ti ang. A tawpah chuan a thlemtu chu Evi pawh ni se, Adam-a kha theirah lotu a nih vangin kan dem tel lo thei lo.

Tu pawhin lo fuihpawrhin lo inphelhtir pawh ni raw sek sek, he nula, hlawh nei lova lo inphelh ruak ve hi ka dem viau dawn a, ngaihtuah chian erawh chuan a khawngaihthlak a ni. I khawngaih ang u. Hei hi 'art' a ni lova 'ât' sona dik tak a ni si a.

- Ramtea K.