I hre chiang em?

Khawngaihna te, hmangaihna te, ngilneihna te, dimdawihna te, fimkhurna te chu mihring thinlunga inphûm, a taka kan lan chhuahpui turte an ni. Inthliarhranna te, elrêlna te, huatna te, thinrimna te, kutthlak duhna te chu mihring thinlunga awm, kan nunin a tihlan loh turte an ni.

Heng hringnun zia inpawlh buai nuaihte hian ni tinin kan nun chu hma lamah a nawr kal zel a. A lehlam panga mi a ṭha zawk kan hman chuan nun hlimna te, inpumkhatna te a thlen a. Nun ze ṭha lo zawk kan hman erawh chuan inhauhna te, kut inthlakna te, thisen inchhuahna te, thihna te, inṭhendarhna te a thlen ṭhin.

Thinlung ngaihtuahna, rilru kal dik lote hneh thei tur chuan mihringte hian tih theih kan nei tlem em em a, a tireh theitu chu Lalpa chuah a ni. Loh theih lohvin heng nun kal dik lote hi kan buaipui a ṭul chang a awm tho mai.

Thil tisualtua puhte chungah hma kan lak hunin rilru fim hmang lova danin a phal chin a ni em, tih pawh ngaihtuah lova hma kan lak buan buan mai chuan, chu chuan thisen chhuahna te, thihna te, inṭhendarhna te a thlen ṭhin a. Chutiangah chuan thil tisualtu ang thovin danin a chungah ro a relsak a ngai ve tho ṭhin.

Khawtlangah thil tisualtute chunga hma kan lakin, danin a phal chin kan hriat chian a ṭul a; chutiangah chuan mi tin tan hian dan leh hrai kan hriat chian a ṭul tak meuh. Mizo pasalṭhate chuan sa pêla an ram chhuahnaah hnungzuitu an nei ṭhin. An hnungzuituin sa kah tur hmu hmasa mah se, an kap hmasa thiang lo va, pasalṭhain kap tura thu a pek hunah chauh a kap ṭhin.

Thuneitu sang aṭanga thu engmah hmu si lova rinhlelh mante kut lo thlak a thiang lo va, tualchhung roreltute’n misualte man chhuaktu tura an ruatte zingah ruih theih thil ti mi te, thinram tak te, kut inthlak awlsam takte an dah tel chuan, chu mite chuan thil pawi tak an thlen ṭhin a; chutiang dinhmun chu a hlauhawm em em a ni.

Dan pâwna hnâwlte tih loh chu India ram mipui hi dan hnuaia awm vek kan ni. Roreltu te, danhremi te, politician te, sawrkar hnathawk te, sumdawng mi leh kut hnathawka eizawng te, kan zavai mai hian mahni awmna hmun ṭheuhvah kan nun dan leh kan thil tihte chu danin a phal chhungah a nih a ngai a, danin ramri a kham kan pêl thiang lo. Dan awm lohnaah chuan kan buai nuaih nuaih ṭhin a nih hi. Dan hian sualna a do va, misual a hrem a, buaina a tikiang a, râlmuanna a thlen a; mi tin tan kan mamawh huna kan koh theih chanchin ṭha chu a ni.

- H. Neihchungnunga, Durtlang North