MI TAK TAK

Hun eng emaw chen aṭang khan kan ramah hian mi tak tak aiin mi tak tak lote’n hmun an luah zau viau ta mai a. Kan maichâmte pawh mi tak takte’n second hand kamiz var nghawng hmuar iar iar nen, thlarau lam qualification nen ûp leh zahawm taka an luah ṭhin ang kha a ni zo ta lo deuh niin a hriat theih lek lek mai. Hair gel leh khiangkawi ipte, second hand blazer te hi pulpit qualification emaw kan ti ta mai emaw ni!

Pa valai hi a tirah khan ṭha hi ka han ti em em khawp a. Thlawhhma kawng sah hnatlangah pawh hruaitute lu tihaitu ni ziah ṭhin pa valai rualin an sam an rawn khuih pial a, ipte chei nen biak in an pan ta kha kan ram tan a ṭha mang e ka ti ṭhin. A ṭha lo ve ka ti ta ni chuang lovin, piangthar ang deuhva drama channa platform a nih erawh chu ka hlau leh deuh si. Eng pawh ni se, kan sakhaw hotute’n hemi hi chuta piang chu a ni a, saw mi saw chuta piang chu a ni tih an hmuh ṭhelh lo’ng chu!

Assembly liam ta pathum vel aṭang khan kan ram hruainaah hian mi tak takte thâwm aiin mi tak tak lote thâwm a ri ringin, kan ram politics leh sorkar an thunun ta zawk emaw tih mai turin thil a awm deuh niin a hriat theih. Kan hriat theih ve china Mizorama rorelna chang rei deuh ber Mizoram Congress-ah khan rei tak chu mi tak tak an lâr ṭhin a. Chutiang bawkin PC sorkar leh MNF sorkar hmasa lamah pawh khan mi tak takin hmun sang an chang ṭhin.

MNF sawi takah chuan, an sorkar tirh lam kha Shillong lama kan awm lai a ni a. Ram rualrema han awm ngar ngar hnua Durtlang khâm kara bus liana han chuan kha chu mawng a za duh ṭhin khawp mai. MNF sorkarin Durtlang kawng te, Chaltlang kawng te thlamuanawm deuh maia an han siam kha chu kan va lawm tak em ve aw! ‘A neitute’n kan ram an enkawl dawn ta’ tiin kan thla a muang teh asin! Khatih lai khan mi tak takin an hruai niin ka hre ṭhin.

Rev. Zalawma (L), Lunglei aṭanga Aizawla UPC General Headquarters-a hotu pakhat ni tura ruat a nih khan, Headquarters Office-a a thusawiah, ‘Finrâwl thil tih hi ka ngaina lo’ tih thu a sawi kha ka hre reng ṭhin. Kohhranah meuh pawh hian a depdê leh finrâwla thil tih ching an hlawhtling riau mai ang tih hi thil hlauhawm tak a ni thei ta hial mai. Chutiang bawkin ram hruaina hnaah pawh, a phakar leh a verther apiang hlawhtlinna ram, mi tak tak aia tak tak lo dinchanna ramah kan siam ang tih hi thil hlauhawm tak a ni.

Kohhran, NGO leh ram hruaitu atan mi tak tak kan thlan hram hram a pawimawh hle. Kan ramah hian kohhran, NGO leh party, pawl chi hrang hrang kan awm a. Heng zinga zirtirna kal fuh ber leh Mizo thinlung hneh ber hi eng pawl nge ni ang, tiin ka ngaihtuah ṭhin a. YMA hi a zirtirnaah leh pawl thiltum leh nihnaah a chiangin, a hlawhtling ber niin ka hre ṭhin. YMA nula leh tlangval kal khawmin hruaitu atana an thlan chhuahte hi an mi tak tak riau zel a. Hruaitu ṭha tih zawng zawnna kawnga sawi neuh neuh awm ve bawk ṭhin mah se, a tlinga te pawh, tling lova te pawh an mi tak tak viau zel. Mi tak tak lovin YMA hruaitu nihna hi an hnàr thûk lutuk ngam lo niin ka hmu. YMA-ah hi chuan hruaitu atana thlan tak lohvate pawh, an hming han ri pha chin hi chu hruaitu tlak an ni tlangpui; mi puarpawlêng deuh pahnih khat sawi tur chu an awm ve bawk mahna le!

Social media a lo chak tak hnu phei hi chuan mi tak tak lo tan kawng a inhawng zau zual hle ta mai. A tak lote hian ho an ngahin, an thil tih leh hnathawh pho chhuah an thiam emaw tih mai tur a ni a. A tak lote hovin status an nei ril ṭha thei tawh.

Tunlaia kan buaina tam tak hi kan tak loh rah a nih duh hmel hle mai. Ngaihsan tur dik ngaisang ila, chawisan tur dik chawi sang ila, fak tur dik fak ila, kan value system dik se la, Mizo Kristian dik tak, Mizo khawtlang dik tak, Mizoram leh hnam politics dik tak nei lêt leh turin ṭan i la ang u!

- Rev. Jh. Za Hluna