Mizote leh mi dangte ṭanpui

Mizote hi mite ṭanpui ṭhin hnam, thilpek pe a thâ leh zung senga mi dangte nasa taka ṭanpui ṭhin hnam kan ni a. Tun hma aṭangin mi kan ṭanpui dan leh mi dang tan kan inpek dante danglam deuh mah se, tun thleng hian mi ṭanpui peih tak hnam kan la ni reng a; a vanneihthlak tak zet a ni. Tun hnaiah Krismas puala kan sum sem ral leh kan pek chhuah ngawt pawh hi chhinchhiah thlap ila, cheng vaibelchhe têl fê chu kan pe chhuak hial awm e.

Tun hma lama Mizote leh mi dangte ṭanpui

Mizo hnam hi mahni aia mi dangte dah pawimawh leh ngai pawimawh ṭhin hnam kan ni ti ila kan sawi sual awm lo ve. Kan nunphunga kan chhuanvawr ber, kan sawi chhuah fo ṭhin ‘Tlawmngaihna’ kan tih pawh hi mi dangte tana inpekna, mi dang ṭanpuina thil a ni. Kan ṭawngkamah pawh ‘Sem sem dam dam, ei bil thi thi’ tih te, ‘A thlum a al ei za’ tihte pawh kan nei a. Hei hian Mizote hi thil inpe tawn ṭhin hnam kan nihzia a tarlang.

Tun hma lam khan pawisa leh sum lam an nei lo va, an neih zinga hlu an sa awh leh kahte pawh insem dial dial ṭhin, an thlai tharte pawh mi dang sem ve ṭhin an ni. Mizo hnam kha hnam taima leh huaisen an ni satliah mai lo va, hnam thilphal tak an ni. Uikawm leh mahnia thil pumbilh ching nih te, vir nih te kha Mizo nuna thil zahthlak angah an ngai ṭhin. Heng zawng zawng en hian Mizote hi hnam thilphal tak ve tak, mi dangte pe ve ṭhin kan ni tih chiang takin a lang.

Mizo hnam hi thilpek kan pek bakah vantlang tana thâ thawh ṭhin kan ni. Thilpek lama pek tur kan ngah lo pawhin tha thawh zawngin nasa takin mi kan pui ṭhin. An khawtlang inawpnaah khan ṭangruala mi dang ṭanpuina kha an nun khaidingtu pawimawh ber a ni. Mizote hi hnatlang hnam kan ni emaw tih turin kan ṭangrual a, hnatlang ve lo, khawtlang tana thâ thawh ve lo chu rûnte pawh an inrûn hial ṭhin a nih kha. A huhoa vangtlang ṭhatna tura kan tih bakah khan mi harsa leh chhumchhiate ṭanpui ṭhin kan ni a. Mite ṭanpui hi Mizo hnama bet tlat, kan chhawm nun ṭhat em em mai a ni kan ti thei awm e.

Mi ṭanpui dan a inthlak chho

Mizo hnam pawh kan changkang chho ve zel a, tun hmaa eizawnna pakhat nei tlang ṭhin, lo neia eizawng vek ṭhin kha, Kumpinu-in min awp avangin lo neih chauh lo eizawnna dang a lo chhuak ve zel a, kan khawsak a inthlau chho ta viau mai. Sum hlutna a pung a, hausa leh neinung, thil hlu kan teh dan a dang chho a. Kan thlai leh ran vulhte pawh suma chantir kan lo thiam a, sem dur dur nun kha tlem chuan a bo deuh em aw tih tur a ni. Amaherawhchu, chawhmeh insuah tawn te, thlai thar inthartemte erawh kan phak ang tâwk leh theih ang tâwkin kan kalpui ve reng a. Mizote hi hun harsa leh khirh tak karah pawh mite ṭanpui ṭhin hnam kan ni a. Mizoram buai laia India sipaite’n an mangangpui ber pawh mipuite’n hnam sipaite ei leh in tur lama kan ṭanpui ṭhinna kha a ni.

Sum leh pai lamah hausa lo mah ila mi dangte ṭanpui tur hian kan thâ leh zung erawh kan sêng nasa viau tho mai. Khawtlang tan leh kohhran tan thâ kan sêng nasa em em a, hnatlang koh nikhua pawhin kal kan ṭha viau zel a ni. Chhiatna tâwk leh harsatna tâwk kan awm nikhua phei chuan mi dangte ṭanpui turin kan chhuak khawm sung sung zel ṭhin. In sa an awmte hian kan inpui luai luai a, slap chhunga rîk laih laih châng kha kan ngah ṭhin a nih kha.

Tin, Mizo hi hmun danga kan awm pawhin mi dang ṭanpui ṭhin, lo kal tharte lo buaipui leh ṭanpui nasa ṭhin kan ni a. A hnam ang pawhin hnam dangte ṭanpui nasa pawl tak pawh kan ni hial awm e. Tunah pawh hian a nâwlpui chuan kan thiamna leh theihna kawng hrang hrangah chuan rilru thianghlim tak nena mite ṭanpui bawrh bawrh ṭhin kan ni. Hei hian Mizo nun ze mawi tak kan lantir ṭhin kha kan la chhunzawm zel tih chiang takin a tarlang awm e.

Tunlaia mi dangte kan ṭanpui dan

Tunlai khawvel changkang chhoah hian mi dangte kan ṭanpui chhoh dan pawh a inthlak chho ta viau mai. Kan ei leh bar zawnna kawng a lo inthlak chho zel a. Mihring tha leh finna hmanga eizawnna kan uar a, sum lêngvâk a tam chho ve ta deuh a, sum leh pai hmanga mi ṭanpui pawh kan uar chho viau mai. Hetih rual hian, sum leh pai thawh chhuahna lama ṭhahnemngaihna avang te, sum hlutna leh thiltihtheihna kan hriat chian tak avang hian tun hma lama thâ leh zung thawha mi kan ṭanpuina lam erawh a tlahniam ta viau mai thung. Khawtlang leh kohhran ang pawhin hnatlang kan ko ṭha ngam ta meuh lo va; zana meng rei kan tam a, zing hnatlang phei chu koh ngam a ni ta meuh lo. YMA thlân lai tur pawh kan haihchham lek lek a, biak in sakah meuh pawh hnatlang chu a nazawng chuan kan ko ngam ta meuh lo. Hnatlanga thawh chhuah aia thawk thei tur rawihna tur sum thawh khawm mai kha thil tih awlsamah kan ngai chho mek a ni. In sa pawh thâ lama inṭanpui aiin hlawhfa rawihna tiin a sum lama inpuih kan uar ta zawk mah a nih hi.

Chutihrualin, Mizote hi mite ṭanpui kawngah nasa takin kan ṭhangharh em aw tih tur a ni. Sum leh pai thawh khawm zung zunga awlsam tak em avangte hian mite ṭanpui kawngah nasa takin kan ṭhangharh mek. Hetianga mite ṭanpui hi intihhmuhah kan la deuh lehnghal a, intihhmuhna ṭha tak ni pawhin a lang. Mite inhawnna lo dawngsawng a, mi dangte hnena hlan chhâwng tur intelkhawm pawlte pawh an awm ta hial a ni. Hengte hian social media kaltlangin mi dang ṭanpui ngaite an rawn sawi a, hun rei lo teah a nuai têl hi a tling khawm zung zung ta mai. Mi tam tak an ṭanpui tawh a, an ṭanpui mek a, an ṭanpui zelin a rinawm.

YMA ang te, kohhran angte pawhin tunah chuan mite ṭanpui kawngah chuan tun hma lam aiin nasa takin kan ṭhangharh zel a, a lawmawm tak zet zet a ni. Tunah chuan tlema hmingṭha deuh, zaithiam leh inkhel thiamte pawh a ngaisangtute’n inthurualin sum leh pai an thawh khawm zung zung a, tun hma lama mite nen ngaihtuah chuan vannei tak an ni.

Mizote hi Kristian zirtirna nena inhmeh tak mai nunphung ṭha tak nei hnam kan ni hi kan vannei hle. Tuna thilpek kawnga hma kan sawnna tam tak hi kan nunphung ṭha leh mawi a nih rualin, kan rinna hian min zirtir a nih tlat avang a ni kan ti lo thei lo ang. Rinna kawnga chak tak ni lo, inkhawm tam lem lo pawhin kan nunphung ṭha leh kan rinna avang hian mi dang kan ṭanpui ṭhin.

Thilpek kan pek hian Pathian thu anga pek kan zir zel pawh a ṭul awm e. Pathian hmangaihna nen, leia lawmman dawn beisei lo, mi dang hmuh loh leh hriat loh a pek te, kut dinglam thil tih hi vei lamin a hriat lohte pawh kan zir a tul viau mai. Chutianga kan tih chuan vanah ro kan khâwl khawm zel a ni. Kan Pathian thuin ‘Pe rawh u, tichuan pekin in awm ang’ a tih kha hre rengin, pe chhuak tam ila, tun ai hian a hnam ang pawhin malsawnna nasa leh zual kan dawng ngei ang.

- Dr C. Lalengkima