Ruihhlo do zel ang aw

Vanglaini October 5,2013 chhuakah khan Central YMA in ruihhlo do tura a din Central Anti-Drugs Squad ten April 9 - September 30, 2013 inkara ruihhlo an man te chu halral a nih thu leh ruihhlo man zawng zawng hi Rs. 39,10,310 hû a nih thu a lang.

Kum khat a ral chauha, Vanglaini-in October 4,2014-a an tarlan danin Excise & Narcotics department in January-September, 2014 inkar a zu leh ruihhlo dang Rs. 5,78,98,573 hû an man a. April 13, 2015-ah Cen­tral YMA in Supply Reduction Service (SRS) din rawtna an pawm thu a lo lang leh a. June 8,2015 Vanglaini chhuakah khan Supply Reduction Service (SRS)-te chuan April 1,2015 -June 8, 2015 inkarah ruihhlo Rs. 3,48,57,720 hû an man tawh tih leh SRS din thar hian Methamphetamine mûm 1,08,800, heroin gram 795, alprozelam strip 386, ganja kg. 4.1 zet an man tawh a ni.

Heti hian kum April 9,2013 leh June 8,2015 inkara ruihhlo man belhkhawm hlut zawng hi Rs 9,66,66,603 (Nuai zakua sawmruk) vel a ni. Man loha leng vel hi hetiang zat vel hi awm turah ngai ila, ruihhlo ngawlvei sim tura inenkawl mek pakhat chuan lei tur zawn chuan Aizawl khawilaiah pawh hian kan hmu thei a ti. Khing zawng zawng khi man lohin Zoram ṭhalaite han zem buai sela, kan chan chu a ropui lo viau ang. Veng pakhatah chuan Kohhran Upa nupui pawh ruihhlo zuarin a hmanhlel an ti.

Ruihhlo do hi YMA leh Excise depart­ment tihtur chauh niloin kohhran te, sports & youth ser­vices department te, school department te, KṬP, ṬKP, PYD, SAY,CṬP ten theihtawp chhuaha hma an lakna tur niin a lang ta. Hma­lak dan erawh chu a inang lo ang, hma pawh an la tawh hial mai thei. Mahse hei aia nasa hian tha thlah loa beihpui thlak a ngai tawh a ni.

Excise & Narcotics chhinchhiah danin kum 1984 aṭanga January 2015 thleng khan Mizo­ramah ruihhlo vanga thi mi 1,321an awm a, mipa 1,183 leh hmeichhia 138 an ni. Ruihhlo vanga thi zinga 1,162 chu proxyvon leh parvon spas vanga thi an ni a, heroin vanga thi mi 100 an ni. Zu vanga thi hi 1997 leh september 2014 inkarah mi 57 an awm a, mipa 50 leh hmeichhia 7 an ni.

Ruihhlo vanga Mizo ṭhalai 1,321 zetin nunna an chan hian ruihhlo do ṭul zia a lantir a. Ṭhalaite chhanchhuak tura CYMA a penchhuak ta hi a lawmawm tak zet a ni. Kohhran hrang hrang te pawhin an thlawp a niang, SRS hnenah ṭanpuina pawh an pe mek bawk. Ruihhlo doa fehchhuak te hian zan reh, khawchhia, nisa leh hmun hrehawm an paltlang fo ṭhin. Hei vang hian mipui thlawpna an hmuh ṭhat a ngai reng a ni.

Mipuiin kan thlawp rualin a do dan kawngah fimkhur taka kal thiam a ṭul ang. Thlawpna zawng zawng tibo thei khawpa firfiaka kal a hlauhawm a. Chuvangin ram hmangaihtu feh­chhuak te hi huaisen leh fimkhur takin kal se, hnehna hlado rawn chham ngei teh se.