NLUP leh a behbawm

Democracy hnuaiah chuan political party-te’n a hun laiin azir dan pawh a niang chu, ram ṭana ṭha tur nia an hriat policy neiin mipuite hmaah an zuar ṭhin a nih hi. A thupuia kan han hman NLUP kha Congress party policy pui ber a ni a, a tir phat aṭangin NLUP hi Congress chuan ṭha an ti a, mahse, party dang Congress ni ve lote’n ṭha lo an ti a ni mai.

Congress party chuan NLUP hi mi harsa zawk leh eizawnna nghet nei lote’n eng emaw ti tala an hma lam huna eizawnna mumal deuh an neih ve theihna tura ngaiin flagship programme-ah an lo nei tawh a. Kum 20 lai kan ram buaina leh ṭahna karah rethei em emin kan awm a, kan khuate sâwi khawmin, duh lo chung chungin, a khua a khuain min pêm luihtir a, eizawnna mumal nei loin kum 20 zet India sawrkarin min siam a. Kum 1986-ah MNF leh India sawrkarin remna an siam a, ram zalen, ram pangngai kan ni leh ta a. Hlim viau mah ila, khaw tin kha kan tlabalin kan rethei tak zet a; chuvangin, kan mi leh sa rethei te tete ṭanpuina tura duan a ni. Hausak thur thurna tura beisei tur a ni lo a, mi awmthei leh eizawnna mumal neite tan a ni bawk lo. Kan Chief Minister kal ta zahawm tak Pu Hawla dan takah, mi retheite a zawng a, chung mite tan a ni.

Engkim mai hian chhiatna lai leh ṭhatna lai an nei vek a. Party policy a nih miau avangin NLUP ṭhat lohna lai sawi thiam leh sawi tam ber chu Congress party president leh MP ni chunga kum 1986 March thlaa party chhuahsan ta Pu Lalduhoma kha a ni awm e. A ṭhatna lai sawi thiam ber pawh amah tho a ni ang. NLUP avanga political ball pet goal thei lo ber pawh amah tho. Kum 1987-2023, kum 36 chhunga sawrkar siamna tura policy, ṭum li ngawt sawrkarna hmanrua hlawhtling ber pawh NLUP a ni. Hengte hian eng nge a entir ni ta le? Kan Chief Minister kal ta zahawm tak Pu Lal Thanhawla khan a sawrkarin NLUP a kalpui dawn khan, Lal Isua thusawi, Mat. 25:40, "...heng ka unau te berte zinga mi pakhat chunga in tih chu ka chunga ti in ni..." tih a sawi kha kan la hre reng awm e. NLUP hi kan lal Isua zirtirna nen pawh a inrem em em a ni.

Tin, khawvel thil tak pawhin a ṭha a ni awm e. A chhan chu, democracy sawrkarna, welfare state hnuaiah chuan sawrkar hi mi chak lo leh hnuaihnung zawkte tan a ding tur a ni. Mimal deuh pawhin chhut ila, welfare sawrkar chuan mi hausa leh awmtheite aiin, chanhai zawkte ngaihsak hi a tih tur a ni.

Kum nga dana sawrkar thar lo piang ṭhin turah hian mi chanhai zawkte’n chanvo leh beisei an nei tur a ni. Sawrkar ta chu eng party sawrkar pawh ni se, chu sawrkar chu thawktu fel leh experience nei sate hnuaia programme chi hrang hrang leh tih tur duan sate thawk tur a ni. Chung devopment programme-te chu mi chuanhnuai zawkte tan ban phak an ni lo tlangpui. Chuvang chuan, NLUP ang policy nei party hi keini ram ang developing country/economy-ah chuan mipui nawlpui tan an hlu zual. Chutihlaiin, tuna kan sawrkar hian chutiang policy chu a nei lo a, Handholding Policy hian chung mite chu a thleng pha lo; he policy hi chu thawk thei, milian sa leh lehkha thiam sa tan lo chuan ban phak a harsa viau ang.

Chuvangin, mi chhumchhia leh chuanhnuai tan kan sawrkar hrawn laiah hian beisei tur a vang khawp mai. Chuvang chuan ni maw, phuahchawp deuhin kan Chief Minister hian special assistance (?) a tia maw ni, a duhsak zawng cheng nuai khat a pek theih dan tur kawng a hawng ta ringawt a nih awm hi. Hei hi an party-in a ṭhatpui aiin inthik kualna mai mai thlentu a nih a hlauhawm khawp mai.

NLUP kha Zoram mipuite hmasawnna lama min khairualtu policy pawimawh tak a lo ni reng a. Duhthu phei chu a sam lo mai thei. Vawinah hian kan chhehvel state dang, kan hnufualpuite nen a intehkhin ralah kan hmasawnna hi inkhairual tak a ni. A hmu fiah duh tan chuan hmuh theih a ni. 1986 MNF leh India inrem hnu khan kan ram hi a thei thei intlansiakna, ‘survival of the fittest’ hmun ni se la chuan khawpui leh thingtlang hi kan inthlau ngawt ang. Kum 2016-17 chho Congress sawrkarin NLUP a pek hnu aṭang phei kha chuan ṭawngna mah a, "Vai bawng chaw phur pawh an leng ang," tih kha a bo der tawh. Gurkhali bawng chaw phur ho takngial pawh khan scooter-in bawng chaw an phur tawh a ni. Vawiin thleng hian lo leh huan neia eizawngte pawh lirthei nen kan feh hlawm tawh a nih hi.

NLUP kha kan sawi tawh angina, tute emaw beisei anga rethei leh dinhmun tleu tawhte hausak thur thurna tur ni loin, mi chuanhnuai leh harsa zawkte’n eng emaw ti tala khaw êng an hmuh theih vena tur policy a lo ni zawk e.

Hetihlai hian, eng ang hmasawnna pawh nei mah ila, mi chhumchhia leh harsa hi kan awm reng ang. Welfare state chuan chung mite’n sawrkar zar an zo ve dan tur ruahman (policy) a nei ngei tur a ni.

"Heng ka unau te berte zinga mi pakhat chunga in tih chu ka chunga ti in ni... Heng mi te berte zinga mi pakhat chunga in tih loh chu ka chunga ti lo in ni," (Mat. 25: 40, 45).

- LTKA, MSV