Tun sawrkar hi sawrkar ṭha a ni em?

Kan thupuia zawhna hi Mizoram mipui hian chhang ṭheuh dawn ta ila, kan chhan dan a inang lo viau ngei ang. Political party mite chhan dan tur chu hriat sa a ni.

Sawrkar lai party mite chuan 'sawrkar ṭha a ni' an ti ang a, a ṭha lai sawi tur an nei ṭeuh ang. opposition party mite chuan 'sawrkar ṭha a ni lo' an ti thung ang a, a ṭhat lohna sawi tur an hre ṭheuh ang; an sawi ṭhin reng bawk a.

Ka hmuh ve phak chin aṭangin han chhang ve ila, tehna azirin chhanna danglam hret a awm.

Sawrkar kal tawh (kum 1990 hnu lam–Congress leh MNF sawrkar)-te aṭanga ka teh chuan ZPM sawrkar hi tun thleng hi chuan sawrkar ṭha a ni rih tih hi a ni. Ka duhthu an sam hauh lo va, mahse, Congress sawrkar leh MNF sawrkar ai chuan ṭha ka ti zawk hle. Ṭha ka tih zawkna chhan tam tak a awm a, sawi vek sen a nih loh avangin sawi lo law law mai ang.

Anmahni, ZPM ngau ngau, inthlan hma leh inthlan laia an inzawrh dan te, an thil tih tur leh tih loh tur an sawi hrang hrangte aṭanga ka teh erawh chuan ka beisei ang tak sawrkar ṭha chu an ni lo. Ka beisei san lutuk vang pawh a ni mai thei. ZPM sawrkar hi ṭha thawkhat, ka beisei ang erawh pha lo an ni.

Sawrkar lai ZPM hotu te, Chief Minister, Minister-te leh MLA-te hi an ṭan a ngai. Sawrkar ṭha an siam leh siam lohah hian sawrkar kal tawhte aṭanga teha 'an ziaawm zawk deuh e' tih hi sawrkar ṭha nihna a ni lo va, lungawina tur a ni lo. An lakah mipui beisei a sang bik a, mipui beisei ang taka sawrkar ṭha siam tur leh an intiamna zawng zawng tipuitling turin nasa zawka ṭan an lak a ngai a ni.

- Lalsangliana