Scooty

Kum eng emaw zat kal taah khan ka fanu naupang zawk college kal ve ṭan tur hian an college hla bawk si (PUC a nia) chhuanlamin scooty lei a ngen a. A ngen thiam khawp a, “A man ka thawk chhuak har dawn lo, zing leh tlaiah pânhnahte ka sem kual ang a,” te kha a tia. Kan leisak phah chuang lem lo va! A hnu fèah chuan a nei ve ta a, a ngen tirha leisak a nih loh vang nge, pânhnah sem lam chu a buaipui ta lem hlei lo va. Khalh a zir lai kan hriat hauh loh khan scooty khalh chu a thiam nâl hma khawp a. Amahin a sawi dan takin, traffic jam-ahte hian a ke thlak thlak loh a tum tlat vel a. Ṭum khat phei chu a hnunga tlante’n, “I va khalh thiam ve” an tih avang ringawta kawng kuala a kual tâk rikngawt (a thiam tihlan a duh) thu a sawi nghe nghe.

A u ve thung chuan a khawih duh miah lo va, a nau hnungah lungawi takin a chuang mai ṭhin. A upa zawk leh an naupan lai pawha cycle khalh thiam hmasa zawk a nih tehlul nen, scooty khalh a tum lo chu mak kan ti ṭhin hle. Ṭum khat chu an unauva an inphurh ṭum hian kawng nâl em em maiah a nau hian a tlukpui a, a u chuan a khup leh ngal velah hliam a tuar a, a nau, a khalhtu zawk chu a him hlauh thung a. A u zawkin min hrilh chu, “Nu, kei ka zak em em a, thei leh thei lovin hliam chungin scooty ka tung a, ka nau chuan min lo nuih a, ‘Tlûk dawn chuan zawi vek tur tih ka hria a, ka zawi lawk vek alawm’ a ti daih maw le,” tih hi a nia. A u ka khawngaih rualin a nau chuan ka nuih a tiza phian.

Ka fanu upa zawk chu a hna avangin Aizawl khaw pawnah a awm a ngai ta a. A awmna hmasa ber aṭanga an sawn chuan eng emaw harsatna a thlen tak avangin scooty secondhand leiin a inzir chawp a, ni tin a hnaa kal nan a hmang chho ve ta a. Thiam nâl lo a intiin a fimkhur em em a. Ṭum khat a kalna kawng chhe nâl lutuka loh theih lova a tluk tih loh chu chetsual a la nei lo, Pathian zarah.

Hmân ni deuh, kawng chhiat em em lai khan Governor gate hmar lam chhak deuha kawng khuar lian angreng tak mai bulah sawn mi ka nghak a; traffic police duty nen kan titi luam a. Chu lai kawng khuarah chuan scooty khalh an tlûk nasat tawhzia thu leh hnawh a ṭulziate min hrilh bawrh bawrh a. Khalh thiam tak tak chuan an tluk phah lem lo va, petek nawk nawk mah se, a thlangah an insiamrem leh mai thei tihte kan hmu bawk a.

Ka ngaihtuahnaah scooty leh a chhehvel chu a awm zui ta rauh rauh a! Scooty hi a hmei a pain kan leklam ta khawp mai. Aizawlah phei chuan chhungkaw awm zat aiin scooty awm zat hi a tam zawk tawh hial mai awm asin. Chhung khata pakhat neih mai duhkhawp lo kan tam viau tawhin a rinawm hle bawk.

Scooty leh a chhehvel aṭanga zir chhuah theih hi awmin ka hmu leh tlat pek a!

A man a tlawm a, a bá thlauvin a lei theih bawk tih avang ngawta inleisak, kan fate duhsakna avanga lei hi kan tam hian ka ring. A hmanna tur leh a ṭangkaina tur sawi em em tur awm lo, rualpâwlna atan maia lei pawh hi a awm theih ngei ang. Ka fanuin a tira pânhnah sema a man thawh chhuah a intiam kha, a intiam loh hnua lei lovin, a intiam lai khan lei ila, amaha mawhphurhna neih phah nan a hmang ang em tih hi ka zawhna chhanna awm ta lo chu a ni. Hetiang hian kan ni tin nunah a hun ṭha lai bawhpelh hi kan nei nual hlawm lo’ng maw? Tuna tih theih, nakina tih atana kan khêk avanga hloh kan neih theih hi chhiar thiam a va ṭul em!

Hetih rual tho hian, rilru inpeih hma chuan thil tih emaw, neih emaw hi hmanhmawh loh a him hle tih ka fanu upa zawk scooty neih ve dan hian min zirtir thung a. Rilru puitling a put hma khan lo thiam ve ni se, tun ang hian a fimkhur tâwk lo thei ve tho mai. Thil thar leh mi tam zawkina an tih/neih hi mahni lam rilru inpeih lo chunga lo tih/neih ve ngawt hi a ṭha ber lo thei a, kan tan malsawmna aiin ânchhia a ni ve thei tho tih hi hriat a pawimawh awm e.

Scooty khalh thiam nazawng hian kawng chhia leh nâlah an thunun thei vek lo tih han hriat hian, kan hringnun zirlai pawimawh tak a chhawp chhuakin ka hria. Kawng ṭha leh máma chesual lo tawk leka kan thiamna hi a ṭangkai a nih chuan, kawng chhiaah kan tluin kan chesual lo thei lo vang.

Kan nunah hian engkim hi eng lai pawhin a tluang vek ngai dawn lo va, hun harsa leh khirh kan tawh hunah scooty khalh thiam tak takin a vawnbân thlah hauh lova a insiamrem thei ang hian, kan tawnhriat aṭanga vawn ngheh tlat tur, kan tlu tur min chelh thei kan zi rchhuah a ṭul tak zet. Tlûk leh chetsual pawha hliam na em em tawk lo tur leh tho leh nghal thei tur khawpa mahni insiamrem thiamte hi ka nunah hian a va pawimawh tehlul em!

Scooty hi kan la lei zelin a la lar chho zel ngei ang a. A chhehvela hringnun zirlai inthup awm hi chhiar thiamin inzir nan hmang ila a va ṭha dawn em.

- Dikteii Hnamte