Ṭhalaite mamawh hmasawnna leh thil ṭha tih

Ṭhalaite han tih hian school, college leh university kal laite kan chhiar tel thei a, United Nations-in a sawi angin, kum 15 leh 24 inkarte chu a huam vek a ni. Khawvelah hian ṭhalaite hi an pawimawh em em a, ram hmasawn nan phei chuan mi ṭangkai tak, ram chhung chauh pawh ni lo, ram pawn nen lama inzar pharha min tihmingṭhatute an ni. Mahse, pawimawhna thuk tak nei chung si hian thatchhiatnain a bual ât hi an tam em em a. Hmasawn tur chuan taimakna leh tumruhna kan inhualtir tlat a ngai a, mi hlawhtling ni tur chuan kawng harsa tak tak paltlang a ngai a ni. Hlawhtlin kan châk vek a, mahse, hlawhtlinna kawng hi kan dai leh ngam ṭhin si lo. Awm mai mai paha vanneihna hmanga hlawhtlin thut kan tumna hian nghawng ṭha lo tak neiin, kan hma hun zelah pawh inchhirna tur min siamtu a ni.

Mizoram hi ram naupang tak ni chung si hian hma a sawn chak em em a, kawng hrang hrangah hmasawnna hmuh tur a awm a. Heng hmasawnna zingah hian ṭhalaite hi a thawh hlawk berte zinga mi an ni. Hmasawnna peng hrang hrangah ṭhalaite hming hmuh tur an awm nual zel a, hengte hian ram hming a tiṭha em em a ni. Mahse, hetia zawi zawia hma kan sawnna kawngah hian hei ai pawha hmasawn chakna leh hmasawnna puitling zawk, hmasawnna rau rauah pawh daih rei tur chi nei thei tur chuan kawng hrang hrang a awm bakah, thil reng reng a êng lam zawng zela thlir thiam chung zela hmasawn duhna thinlung nei chunga thil ṭha tih kan tum tlat a ngai a ni.

Hmasawnna dik tak chuan thil ṭha tih duhna hi a keng tel tlat a, keimahni kan inhriat chian a, kan thiam lohnate leh kan dik tawk lohna te, zir belh tur kan neih laite kan inhriat chian hian hmasawn duhna thil ṭha tih duh zelna thinlung min neihtir phah ṭhin. He thil ṭha tih duhna hian min chen chilh tlat tawh chuan, thil dik lo kan ngaithei lo a, siam ṭhat theihna lai lai mahni tawkah siam ṭhat kan tum ve vat ṭhin. Thil ṭha kan tih ṭhan chuan tih leh zel duhna thinlung kan nei tam tial tial a. Thil ṭha tih zel duhna thinlung aṭang hian mi dangte hnenah pawh nun dan mawi leh tih dan ṭha kan kawhhmuh ve zel phah thei a ni. Mi pakhat lek pawhin hetiang zawnga nghawng ṭha a thlen zel chuan rei lo te chhungin chhungkaw ṭha, khawtlang ṭha, ram ṭha kan siam chhuak zel dawn a ni.

POLITICS HUANG CHHUNG

Politics kan han tih hi awlsam têa sawifiah dawn chuan sawrkarin ro a rel dan, ram hmasawnna tur leh a ram mipuite tan a mumal tak a inrelbawl nana dan a siam leh sawrkar hnathawh hrang hrangte a ni mai a. Politics kaltlang hian thil tam tak a siam ṭhat theih ṭhin. A bik takin India ram phei chu democracy ram, ram zalen leh mipuite’n an theih ang tawka ram siam ṭhatna kawngah sorkar a puih theihnate leh thiamnate hman ve theihna ram a ni a. Chuvang chuan mi tu pawh, nu leh pa, pi leh pu, a bik takin ṭhalaite tan phei chuan politics tlem tal hi chu hriat ve a ngai a ni.

Politics kan tih hian party politics ngawr ngawr hi a sawi tum a ni lo va, ram hmasawnna tura ram inkaihruaina pawimawh tak lam a kâwk a. Party politics hi chuan mahni pawl leh thawhpuite nena ram hmasawnna tura an thawhhona lam a kawk zawk a. Politics hmanga ram siam ṭhat tum an tam telh telh a, a ngaih pawh a ngai reng bawk a. Ram rethei tak tung ding tur chuan sawrkar ṭha tak neih a ngai a ni. Hengah hian ṭhalaite hi an pawimawh em em a, kum naupang tak an nih lai aṭanga hmasawn duhna thinlung nen thil ṭha tih tum rilru puitling tak neiin hma an la ve thei a ni. Hetia zawi zawia an insiam tan chuan nakin zelah pawh mi puitling tak, dikna duh mi, ram tana mi ṭangkai, ram ṭha, ram changkang zawk siamtu pawimawh tak an ni chho zel dawn a ni.

SOCIAL MEDIA HI

Tunlai khawvelah chuan social media hi chanchin inhrilh nan leh engkim pawimawh tak tak aṭanga pawimawh lem lo thlengte pawh inthawn tawn nan kan hmang tawh a; a awm lo chuan kan awm thiam kher tawh lo ang. Social media kan tih hian mi dang nena kan inbiak theihna kawng a awm nual a, Mizote hi chuan Instagram, Whatsapp leh Facebook te hi kan hmang ṭhang deuh bik ang. Social media hi hman thiam a pawimawh em em a, ram hmasawnna tur politics ngaihtuahna chungchangah pawh tih dan ṭha leh kawng ṭha zawk inhrilh tawn nan a ṭangkai em em a ni.

Tu pawh hian smartphone kan nei vek a, a man to ber ber chi ni kher lovah pawh social media a hman theih deuh vek tawh a. Mahse, hman dan dik leh dik lo kan thliar thiam a pawimawh hle mai. Hun khawh ral nan leh rilru hrisel lo lam tarlan nan kan hmang nasa palh ang tih hi a hlauhawm hle. Chuvang chuan, a tel loa kan awm thei ta lo rau rau, hman dan dikin hman zir zel ila, a hmang nasa ber ṭhalaite phei hi chuan hmasawn nan, rilru leh thluak tihzau nan, thil ṭha tih nan hman tum zel a ṭha.

HUN AWL HMAN ṬHAT

Ṭhalaite tan a thil pawimawh deuh pakhat chu hun âwl hman ṭhat hi a ni. Kan ni tin thil tihah hian a tlachawpa insiam rem ringawt ṭhin lovin, thil tam takah inhmakhua theih a ni a. Chuvangin, kan hma lam hun hman dan tur ṭha taka kan lo inruahman lawk ṭhin a ngai. Ruahmanna ṭha tak nena kan chet chuan, kan hun neih chhun chhunah ṭha takin hna kan thawk thei dawn a ni.

Benjamin Franklin-a, United States ram dintu zinga mi, an ram tana mi ṭangkai leh pawimawh em em chuan a hun awlte a hmang ṭha em em a, ni tina a hun hman dan tur a ziak lawk vek ṭhin. A ni tin hun hman dan tur a ziahnaah hian thil pawimawh tak pahnih a tel a, zing thawh hun, chaw ei hun leh mut hun a ziah mai bakah, ni tin a zing thawh veleha a ngaihtuah ṭhin chu, ‘Vawiin hian eng thil ṭha nge ka tih ang’ tih a ni. Hei hi duh tawk mai loin, zan a mut dawnah inngaihtuah lehin, ‘Vawiinah hian eng thil ṭha nge ka tih’ tiin a inzawt fo ṭhin. Heng hian hun awl a hman ṭhatzia a tarlan bakah, ni tina thil ṭha tih a duhzia leh mi dang tana thil ṭha tih duh mi a nihzia a tarlang a, hengte vang hian mi zah a hlawh a, mi ropui tak a nih phah a ni. Mizo ṭhalaite pawh hian tiang ang hian ni tin mai hian thil ṭha tih tur zawng rengin kan ni tin nun hi hmang ila, uluk takin inruahman lâwkna nen hmasawn kan tum tlat tur a ni.

PATHIAN TELNA TLAK

Engkim kan tihna kawngah hian thil pawimawh deuh pakhat chu Pathian tel vena tlak a ni em tih hi a ni. Ṭhalaite hi kan pawimawh a, mahse, kan ni tin chetna kawng hrang hrang hi Pathian tel vena tlak a ni em tih hi kan inzawt nawn fo tur a ni. Mizote hi zaa za Kristian kan inti ṭhin a, heng kan Kristianna kawngah hian a lang chinah chauh nge, a lang lo chinah pawh kan Kristianna nun hi kan vawn dik ang. Mi dangte hmuh phakah chauha fel hmel tak a awm a, a ruka thil ṭha lo tih ching kan nih leh si chuan, ringtu der, lemchang kan ni mai dawn a; a pawi thui hle dawn a ni.

Kan dam lai hunte hi a rei lo em em. Mihringte hian kan thih hun tur tu mahin kan hre lo a, chuvang chuan kan ni tin nun hi kan hman ṭhat a, a ṭha thei ang bera kan hman thiam a ngai a ni. Ṭhalaite phei chuan kan nun kan uluk a pawimawh em em a, kan ram hma hun zel atana mi ṭangkai tak ni thei kan ni a, kan thil tih engkimah Pathian telna tlak zela nun thiam a ṭul. Ringtu nunah chuan thil ṭha tih duhna a tel tlat a, kawng dik zawh duhna thinlung a tel tlat a ni.

Tu mah famkim kan awm lo va, mahse, theihtawp kan chhuah a, insiam ṭhata hmasawn kan tum a, thil ṭha tih kan tum tlat chuan, hmun thim leh chhengchhiaah pawh pangpar mawi taka a par meuh chuan hmun mawi leh nuam tak a lo ni thei ta ṭhin ang mai hian, mi ropui, mi dang tana malsawmna ni thei tur khawpin hma kan sawn thei dawn a ni.

- Joel Lalnunpuia Sailo, MA Political Science 4th Semester, ICFAI University, Mizoram