MNF LEH BJP

Tunhnaiah India Hmar-chhaka Congress ni lo in-telkhawm NEDA Guwahati-ah din a ni a, chutah chuan MNF pawh telin BJP Central lama hotute pawh an lo tel a. Chu chu chang chawiin MNF leh BJP hmehbela chirh theh nan ZNP in an hmang a, Neutral article ni awm taka lang si MNF beih pah nana hmangin Lalmuanpuia’n Vanglaini 21.7.2016 chhuakah a rawn ziak a, Mizo Aw Editorial-ah ziah a ni bawk a, ni 25.7.2016 ah Vanglaini-ah vek Ramngaihsaka’n a rawn ziak leh bawk a.

ZNP Vice President Pu C.Laitanga’n a rawn bei hle bawk a. MNF hi a sorkar kan ring ta viau em ni? Hetia ruling ang maia kan beih rawn tak mai le? MKHC-ah Presbyterian an tam ber a, mahse Kohhran dangte kawng engkimah an thunun hauh lo ang hi a ni e, tih tehkhin thu dik takte pawh Party lian
ṭhenkhatin chirhtheh nan an hmang duh zel phei hi chu a awm ang lo deuh lo maw? Heti taka BJP hi kan duh lo emaw kan hua emaw a nih chuan Mizoram ah BJP Unit an awm a, Office te neiin hotute pawh an invuah vek a, chu chu BJP ngaimawh chuan duhlohna i lantir ang u hmiang.

India hmarchhaka hma-sawnna a chak theih nana Party hrang hrang intelkhawm kan ngaimawh dawn anih chuan Central a BJP sorkar khu zu dawr miah lo ila tha kan ti emaw chu. Ramngaihsaka’n Congress + ZNP + MPC a han tarlan hian thawhho an tum ru anih chuan, aruk lovin puang thuai sela, thil zahthlak pawh a ni hleinem. MNF hotute chuan kum 2018 ah Party mala din kan tum ti na na na a, BJP nen an thawkho ang lo tih luih talh hi chu a chhan puh tur avang hle. BJP lahin MNF nen kan thawkho ang an ti hauh bawk si lo.

MNF hi Congress thlak turin an khan ber si a, BJP nena hmehbel hian an boruak kal ṭha lai hi kan ti chawl thei deuh mahna tia lo beih lawkna a ang ber a. Hetiang rilru hi Zoram Politics hri chhia, MPF tan pawh ngaihvena zaidawh deuha hrilh chi a ni hial zawk ang. Inthlan puan a nih a rin loh taka an thawkho thut a nih chuan sawisel hun ala tam ang. Tuna lo beih lawk chiam hi chu buan a hmaa kherh mi fet zia mai a ni.

Thil kalphungah chuan Opposition te hian rorel lai hi an beih rawn thin a ni ngai a, tunlaia kan chetphung hi chu Neutral tan pawm thiam a har fu awm e.

BJP hruaitute tel ve na hrim hrim kan duh lo a nih chuan tuna Housing for All tihte pawh BJP Central a mite ngei duan chhuah a ni a, kan hnawl a va ngai duh awm ve. Tin, Cental ah BJP a sorkar mek a, kum 2019 thleng hun an la nei a, an telve na deuh hlir Policy dang pawh a la kal zel dawn a, chu chu hlauh inzirtirin kan hnawl vek thei ang emaw chu?

MNF hi MLA inthlan lehah an sorkar kan ring a, beih kan duh a nih chuan kawng dang sawi tur kan nei thlawt lo em ni ang. Miin an tum dan ni lo puia bawp lawka laka inchirhtheh nana hman hi chu a hmanlai tawh hle. Hetiang zawnga kan insawi duh a nih chuan Chakma District Council petu, vulh liantu pawlte nen thawhho duh lo thleng ta se, engtinnge kan insawifiah ang? Chakma District Council petu kan ni ve tihna a va ni mai awm ve.

A reng thu-ah BJP heti taka duh lo leh hlauhawma kan ngai a nih chuan heta BJP hruaitute hi bang vek tur leh an Office khar vek turin ngen mai ila, a hlang an awm sa reng alawm. Chumi ngaimawh si lova NEDA ah MNF an tel, BJP hotute pawh an tel tih avanga MNF zawk chirh theh vak vak hi chu a chuangtlai deuh a ni.

Kum 2018 MLA inthlana sorkar tum chuan mipui tana kan hmachhawp fiah takin sawi hlawm mai sela a tawk rih viau a ni. Mimal leh pawl tawngkam dengkhawng tak taka beih hi hruaitu ṭhenkhatin ṭhangkhat lian an ching tawh a, mipui lam vote-ah a thawk na lo tih hriat a hun tawh hle.

Ṭul lova inchirhtheh hi i bansan hret hret ang u. Kum 2018 ah pawh hian a sorkar tur chu an boruak a ṭha zawngin a kal chho zel mai ang. Mi dem hman a ni ta lo e, ni a lo kiam sawt em e.

- Rualkhuma Hmar