Awmpui zingah rahbehna tawk an tam

Awmpui zingah rahbehna tawk an tam tih thu kha ka lo chhiar a, ka lo ngaihtuah ve fo tawh ṭhin a nih avangin ka han ziak ve leh a ni.

Awmpuite hian an duh thlan takah chuan anmahni ina inthlahrung miah lo leh mi mitmei veng lova awm ve chu an duh ang. An harsatna avanga mi ina inhlawhfaa awm mai an ni. Kan awmpuite hi kan tu leh kan fate ni ta sela tia kan ngaihtuah fo pawh a
ṭha hle mai.

Awmpuite hian engkim min tihsak anga keini chu kan awm mai mai tura ngaih tur a ni lo. Kan tih sen loh leh kan tih theih loh min tih sak tura lo awm an ni. Kan theih ang tawk ṭheuh kan thawk tlang dial dial tur a ni. Chhiahhlawh angin kan en tur a ni lo a, chhungkhat angin kan en zawk tur a ni.

A awm apiang kan ei tlang ang a, in en hranna a awm tur a ni lo. An dam lohin an damlo enkawlna senso tumsak thei ila a ṭha khawp mai. An hlawh bakah an mamawh tihsak theih tawk neih tum hram ila. Kan hnenah hian mi sawm chuangin an thawk ve ta a, a tam zawk chu chhungkhatah kan siam ve zel a, kan hlim hle a ni.

Sawrkarin dan a siam kher ngai loin Kristian kan nihna ang leh kan Mizo nunmawi tak kha hmanga awmpuite nen kan awm ho theih chuan a ṭha ka ti.

- Sanglura Sailo