Politics-ah ka beidawng ṭan
Kan innghahna ve ber MNF-in BJP lam an âwn leh tak avang hian, Congress rorelnaa lungawi lo tan tlan tauhna tur a vang ta hle mai, heti reng reng chuan a ngai bawk hi an sorkar leh rinna a lian ta khawp mai. Congress hian tihchhiat langsar tak nei lo mahse min hruai danah hian duhthusam lo a tam em em a, tun anga kal leh hi zuam lo mah ila kan kal leh dawn a niin a lang ta e.
Mizoramah Congress-in ro an rel rei tawh a, anmahni rau rauvah chuan tun
ṭum hi an tihṭhat ve ber ṭum a ni. Tun hmaa an rorelna phei kha chu han keu let dawn ila, ram tana ro tling tur hnutchhiah nei lovin ro an rel kha a ni ber a, tuna kan hmuh mek hi anmahni rau rauva an hmasawn ve hret hun a ni tawh a, kan beisei sang thei lo.
MNF-in sorkarna an chan khan mipuiin beiseina sang tak nen, "Congress thlaktu" tiin kan lawm a, Congress kha mawng sawh dawp khawpin an tla a, Mizoram tana lu chhum ban chhum huama ramhnuaia pen chhuak rual an ni bawk a, Mizoram tana thawk tura beisei an ni. Mahni nunna pawh hlan hial duh khan Mizoram hmasawnna tur pawisa hi hlep ruk chu sawi loh an pek belh duh zawk hial kan lo rin nen, "power corrupt' an tih hi a taka tidiktu mai an lo ni. Kan ram tana inpe em ema ramhnuaia silai kengtute khan chu ram enkawlna vawn fung an chelh hnuah pawisa an inchuh a, ram hmasawnna tura hna awm chu an inchuh a, contractor siam chawpah an inchhuah a, silai nena ram chhan duhtute khan pawisa nen kan ram an suasam ta a ni ber a, tichuan mawngsawh dawpin an tla.
Congress-ah bei-seina neiin mipuiin kan hawi lam kan han thlak leh a, anni lah tun hma aiin an ṭha hret tih mai a ni a, ram ropui min thlen tur khawpin an ṭha tawk lo tih he kum 8 chhung hian kan chiang tlang tawh si. Kan kal lehna tur chu MNF a ni a, anni hi tihsualah in siam ṭhain an rawn 'comeback' theih kan lo beisei nen, tunah BJP-in an lo baptist ve leh chiah a. NEDA-ah BJP kaihhruai turin an inziak lut ta a, kan politics kal dan hi a chiri tawlh tawlh dawn a, kum 2018 inthlanah hian neutral tan hawina lam tur hriat a harsa dawn a ni.
- Lalzarliana