Mizoram inthlan chungchanga MPF hmalak dan bihchianna

Mizoram People Forum (MPF) hi June ni 21, 2006 khan din a ni a, Mizorama inthlanna (election) chungchangah thil felhlel leh dik lo a awm nia rinhlelhna lian tak a awm a, he thil bawhzui tur hian MPF hi din a ni. Mizorama kohran lian ber Mizoram Presbyterian Church hmalakna hmangin MPF chu bul ṭanpui a ni a, a hnuah Mizorama pastor bial hrang hrang leh non-governmental organization (NGO) pangate insuihkhawmna aṭangin din a lo ni ta a ni.

Mizoram People Forum chu Mizoram Societies Registration Act, 2005 hnuaiah ziah luh a ni a (Act no. 13 of 2005). Sawrkar inthlanna kalphung (electoral process) dik taka bawhzui a nih theihna tura vawng nungtu ni turin MPF hi din a ni.

Democracy (mipui thlan) inthlanna neih pawimawhzia

Inthlanna hi khawvel democracy hlawhtling taka hnathawh theihna tur lungphum pawimawh ber a ni ti ila a sual awm lo ve. Inthlanna kan tih hi khawii ramah pawh a pawimawh tlang vek a, mipui vote thlak (popular voting) emaw, ṭawngkam danga inthlanna (election) emaw kan hman hian mipui aiawha dingte tan mipuite rinna a hlawh awlsamtir a ni.

Australia ram kan thlir chuan inthlanna an ngaih pawimawhzia a lang awm e; mipuite chu vote an thlak ngei theihna turin thuneitute chuan dan zawm tur (policy) an siamsak a. Inthlannaa vote thlak lote hrem theihna dan an siam a, pawisa chawitir emaw, vantlang hmun tihfai emaw hmangtein hrem theih an ni. Mipuiin dik taka an thlan sawrkar chu ram hmasawnna siam kawngah a ṭangkai hle a. Democracy kalpuina rama vote thlak dan kalphhung dik lo neih hi ram tan pawha ram hnufual nihna lian tak a ni.

Sawrkar inrelbawlna chu a democratic tak tak em tih kan tehna chu roreltute emaw, thutlukna siamtute emaw chu inthlanna dik, rinawm leh hunbi neia thlan chhuah an nih hian a ni. Chutiang inthlannaah chuan candidate-te chu inelna thianghlim tak neiin vote an inchuh thei a, democratic election a nihna ang takin ram mipui kum tling tawh zawng zawngte chuan vote an thlak ṭhin. Chuvangin, inthlanna zalen leh felfai tak neih chu democracy thupui ber a ni a. Khawvela representative democarcy neih theihna tura hmanraw ṭangkai ber leh rintlak ber a ni.

Mizoram People Forum thiltum bulpui

Mizoram People Forum thil tum ber chu Mizorama inthlanna zalen tak leh fel taka kalpui a nih theih nan te, sum leh pai emaw, thuneihna aṭanga nawr luihna emaw, thununna awm lova kalpui a nih theih nantea hmalak a ni. Hei hi Mizoramah a pawimawh bik hle a, a chhan ber chu Mizote hi kan hnam nunphung leh khawtlang nunphung (cultural and social fabric) hi sawrkar inrelbawlna dan nen inthlun zawmna a neih ṭhin vang a ni.

MPF hian Election Commission of India (ECI)-in Model Code of Conduct a siam chu kalpui a tum a, hei hian political party leh candidate zawng zawngte'n inthlan campaign-naah ethical guidelines set khat an zawm vek theih nan hmalak a tum a ni. MPF hian vote neitute chu an dikna chanvo leh ethical voting pawimawhzia zirtirna atan programme hrang hrang a buatsaih a, chu chuan democracy kalphungah mipuite a hma aia nasa zawka tel theihna a tipung a ni.

MPF hnathawh chhinchhiah tlak tak dang leh chu inthlanna kalphung dik lo, vote hralh tura inthlêmte leh vote inleisak ṭhinte enfiah lam hna nasa takin a thawk a. Heng hian inthlanna kalphung dik tak neih theihna tur kawngah nasa takin a pui a ni.

MPF hmasawna rahbi a siamte

Mizoram People Forum hmalakna pawimawh tak pakhat leh chu, Mizorama political party lian tak tak–Mizo National Front, Indian National Congress leh party dangte nena Thawhhona Thuthlung a ziah pui kha a ni. He Thawhhona Thuthlung hian inthlanpui neih chhunga MPF leh political party-te pawhin rinawmna leh innghah ngamna zawk tur inthlanna an neih theihna tura an zawm tur kaihhruaina a tarlang a. Political party-te chu sum hmanga infuih leh campaign dan dik lo pumpelh turin a fuih a, hei hian inthlanna dik vawng reng tura thawhhona boruak a siam.

MPF hian mipuite leh candidate-te tana inpawh taka khawtlangah inhmuh khawm theihna tur kawng a siam reng a, heng hmalaknate hian electoral reform chungchangah mipuite hriat chianna hun a siamsak a, mipuite chu an vote a hlutzia hriattir chu a ngaih pawimawh hle. Candidate-te'n eirukna kawnga an inhnamhnawih loh nan nasa takin hma a la a, campaign-na kawngah pawh a rinawm lo zawng leh a intham zawnga hma an lak lo nan nasa takin ṭan a la bawk.

Inthlan neih chhunga MPF hnathawh dan langsar zualte

Mizoram People Forum chuan election zalen tak leh dik taka kalpui a nih theih nan election neih hun chhung chuan nasa tak hma a la ṭhin a. Volunteer an neihte chu polling booth-ah dahin, vote thlak tura kalte an theihnaah an lo pui ṭhin. Voter list-a an tel leh tel loh tel loh ensakin, vote thlak dan tur dik takin an thlak em tihte an lo enfiahpui ṭhin a. Kum upa lam leh rualbanlote mamawh an phuhruksak bawk a, inthlannaa an tel theihna kawngah an lo pui ṭhin.

Political party zawng zawngte campaign-na kawnga an hmalaknate uluk takin a vil reng a, Thawhhona Thuthlung hnuaia kaihhruaina tarlante an zawm leh zawm loh thlengin a enfiah reng a. Hei hian campaign-na atana sum hman dan tur tihkhawtlai emaw, tihchingpenna awm tur a veng a, mipui pawh an vote an tihchingpen loh nan a theihna kawngah a vil reng a ni. Mipuite nen a an inhmuh khawmnaah emaw, vantlanga an campaign-na hmunah emaw MPF hian candidate zawng zawngte'n an ngaihdan tlang taka an sawi theihna tur platform a siamsak ṭhin a; chu chuan buaina a tiziaawm a, candidate-te tan pawh inelna boruak boruak thianghlim zawk a pe a ni.

MPF hmalaknain a nghawng

Mizoram People Forum hmalaknate hian Mizoram inthlannaah nghawng thui tak a nei a. Hmalak dan langtlang leh rintlak tak an kalpui avangin mipuite chuan inthlanna kalpui danah rinna an nghat chho zel a ni. Inthlanna felfai taka kalpui a nih theih nan MPF hian Mizorama rorelna kalpui dan chungchangah dik taka an kalpui theihna turin a thawh hlawk hle a, democracy hi ethical standard-a vawn tlat a ngai tih ngaihdan chu a thupui ber a ni.

MPF hmalakna hi Election Commission of India hriat lohva hmalakpui satliah mai mai a ni bik lo a, EC chuan inthlannaah ethical practices tihhmasawn kawngah MPF hmalak dan hi ṭha a ti hle a, kalpui chhunzawm zel turin a duh a ni.

MPF-in harsatna an tawhte

Mizoram People Forum hian hlawhtlinna tam tak nei mah se, inthlanna dik taka kalpui an tumna kawngah hian harsatna tam tak an tâwk a. Thawhhona Thuthlung kalpui an tum chungchang pawh party tam zawk chuan a hlimthla ang mai maiin an kalpui a, an hnuai zawm tur zâwm lem loa kal party tam tak an awm. Hetih lai hian, party ṭhenkhat chuan theihtawpa zawm tumte pawh an awm ve bawk a. Sawrkar hnuai ni lova pawl din a nih avangin sum lamah harsatna an tawk nasa a, MPF hian sum tlemte hmangin hma an la ṭhin a ni.

Heng hian duh angin hma a sawntir thei lo a, an tum ber mipuite puih kawngah a tihkhawmuan phah a. Ethical voting chungchanga mipui zirtirna pek tumin hmalak a nih laiin, mipui ṭhenkhat chuan hnam ang zawnga lak an la ching em em a, vote hlutna hre hauh loa hralh mai ching pawh an la tam! Hengte hian MPF hmalak tumna kawngah nasa takin harsatna a thlen a ni.

Hma lam huna MPF ṭangkaina

Mizoram People Forum hian hma lam hun lo awm turah tun aia a hmalaknate a chak zawk theihna tur leh mi tam takin an ṭangkaipui theihna turin nasa takin hma a la zel a. NGO leh civil society pawl tam takte nen thawhhona a siam zel a. Hengte hian election lo awm zel turah endik kawngah te, zirtirna an pek chhuah kawngah leh ethical election process hum an tumna kawngah nasa takin a pui a ni. Digital platform siam hian inthlan dan chungchang hriattirna awlsam takin a theh darh thei a, chu chu ṭhalai vote nei, naupang leh putar thleng tan pawh bengvarthlak tak a ni ṭhin. MPF-te hian inthlannah chak zawka hma lak zel an tum a, democracy tichangtlung zual zel turin dan zawm tur siamna kawng hrang hrangah theihpatawpa inhnamhnawih ve zel a tum a ni.

A tawp ber atan chuan, MPF-in inthlanna zalen zawk leh thianghlim zawk kan neih nana nasa taka hmalakna aṭang hian a pawimawhzia a chiang awm e. A thil lo hlen chhuah tawhte leh a hmalakna en chuan democracy tihchak kawngah a thawh hlawk ber pawl ti ila, Mizoram huam chinah chuan kan sawi sual awm lo e. Mizoramin inthlanpui kan neih chhoh zel turah pawh hian, inthlanna kalphung dik, langtlang, leh mipui rinna kawnga kaihhruaina lamah MPF hmalaknate hi a pawimawh leh hle dawn a ni tih rinhlelh rual a ni lo.

- F. Vanlalruati, Master of Political Science, 3rd semester, ICFAI University, Durtlang