Tharum thawh lo zawngin le

Tharuma Lal Isua man leh tihduhdah leh thaha a awm lai khan, a zirtir Petera chuan tharum thawh vein, puithiam lal ber bâwih beng a sahthlaksak a. Isua Krista erawh chuan, “I khandaih kha a paiah khung leh rawh; khandaih ruaitu zawng zawng chu khandaih vêkin an thi dawn si a. Vantirhkoh sîngsarih leh sânghnih aia tam zawk min rawn tirhsak nghal turin Pa ka ngên thei lovin mi ring em ni? Mahse, ngên ta ila, hetiang thil lo awm tur sawina Lehkha Thu kha engtin nge a lo thlen theih ang?” a ti a ni (Mathaia 26.52-53; Johana 18.10-11).

Heng thute hian Isua khan râl doa tharum thawh duh se la chuan hnehna a chan thei tur thu chiang takin a tarlang. Tharuma hnehna chang thei tur dinhmunah awm mah se, tharum thawhna kawng zawha a lalna ram din tum lovin, tharum thawh lo (non-violence) kawng zawha lalram din a tum zawk thu a kâwk daih a ni. A sawi ang chiahin tharum thawh loha a lalram a din Kristianna chu kan mit ngeiin kan hmu ve ta a ni. Tharum chu tharum bawkin a chhan lêt tur thu zirtirna a ni bawk.

Isua non-violence kawng kha Mahatma Gandhi, Martin Luther King Jr, Nelson Mandela, Aung San Su Kyi, etc ten an zui ve a, non-violence kawng zawha an thiltumte hlawhtlinna hmuh an tum a ni. Mipui an tam avangin a karah tharum thawhna tlem a zawng awm ve ṭhin mah se, kalpui an tum dan chu non-violence movement a ni.

Tharum thawh lohna chu Isua Krista nun leh a zirtirna a nih tlat avangin, Kristianna leh tharum thawhna chu a kal dun thei lo. Nimahsela, khawvel mihring zawng zawng leh ram zawng zawngte hi Isua Krista zuitu an nih vek loh avangin, tharum thawhnate a thleng leh ṭhin. Mizoram pawh kan bâng bik lo. Kum 100 chuang, Kristian ram ni tawh mah ila, rinnaa puitling rih loh kan la tam avangin, hmun dang leh ram dangte ang bawkin tharum thawhna avanga hliam tuarna leh thihnate a thleng ve reng mai ṭhin zawng a nih hi.

Mizoram hi Kristian tamna ram kan nih avangin Isua zirtirna non-violence kawng zawhnaah a ti ṭha ber state nih kan tum tur a ni dawn lawm ni? Hmanlaiah chuan ram tam takah sawrkar dan bawhchhiatna sual avanga an mi mante emaw, rinhlelh thil thua an mi mante emaw chu dan leh thupek (law and order) kengkawhtute'n an sawisa a, vuain an dawp ṭhin a ni awm e. Tunlai khawvel sawrkarah erawh chuan chutianga tih chu an ching tawh lo. Indonaa an man an hmelma sipaite ngei pawh an sawisa tawh lo. An mi man, mahni inveng thei tawh lote kutthlaka thah chu Sapṭawngin ‘coldblooded murder’ an ti a, danin a phal lo. Chuvangin ram changkang deuhte chuan an ching tawh lo. India-ah pawh sawrkarin a khap tawh avangin police-te’n an mi mante leh an rinhlelhte takngial pawh an dawp tawh lo a ni. Sawrkar berin an mi mante leh rinhlelhte chungah tharum a thawh tawh loh chuan, Kristiante phei chuan Kristian rama NGO-te telin, tharum thawh lohna kawng zawhnaah hmahruaitu leh entawn ber tur kan ni dawn lawm ni?

Kan tlawmngai pawlte – YMA, YLA, MTP, etc te thawhrimna hi a fakawm a, a ropui hle. Chutihrualin, tharum thawh lo zawngin le. Mimal tharum thawh mah pawi tih tawh nâk alai a, pawl hming chawia tharum thawhna a awm ṭhin hi chu a lungchhiatthlak hle. Kan tlawmngai pawlte hian an hnampui, an Kristianpui, an ṭhalaipui, an khaw mi leh an mihringpuite chungah tharum an thawh ṭhin hi ṭhansan a hun tawh tak zet a ni. Chuti lo chuan, Airfield Venga thil thleng ang kha a thleng leh lo vang tih a sawi theih loh. Kha thil thleng kha inzirna atan hmang ila, ‘learning lesson the hard way’ a nih pawhin, wakeup call atan i hmang ang u. Mi mante leh rinhlelte chu thu leh hlain ṭha taka zawhfiah thei a ni a, an thiam lohna hmuh chhuah a nih chuan police kuta hlan ni se, dan angin sawrkarin an chungah ro a rel mai tur a ni.

Tlawmngai pawlte kutah dan leh thupek dah pawh hi thil ṭha ber a ni lohzia kan mithiamte'n an ziak a, an sawi tam tawh a. Dan leh thupek chu tlawmngai pawlte mawhphurna a ni lo, sawrkar mawhphurna a ni. Chuvangin, kan sawrkar hian dan leh thupek chak taka a kalpui theihna atan sum hmang tam zawk se la, ṭul leh mamawh zat police neiin, veng tinah police beat post-te dah se la. Police hotline number pawh nei vek se la, an duty-na khua leh veng ṭheuhvah a chhun a zanin taima takin vil se la, kan ṭha chho ve zel mai ang.

Chuvangin, tlawmngai pawl hminga tharum thawhna nun hi Kristian tamna ram, Mizoram angah chuan i ṭhansan tawh ang u. Police leh sipaite pawhin tharum thawh lo zawngin civil mite chungah dan leh thupekte ṭha tak leh chak takin an kengkawh thei a ni.

I ramah chuan râwng taka che thâwm a reh ang a, tichuan i ram chu chhiain a ram hek lo vang. I bangte chu ‘Chhandamna’ i vuah ang a, i kawngkhâr chu ‘Fakna’ i vuah bawk ang (Isaia 60.18).

Mi nunrâwng chu awt suh ang che, a awm dân pawh zui suh (Thufingte 3.31).

In nunna thisen chhuahtu chungah, ramsa an ni emaw, mihring an ni emaw, kut ka thlâk ang. Mihring nunna thisen chhuahtu chu, mi dangin a thisen an chhuahsak ve ang, mihring hi Pathian anga siam a ni si a (Genesis 9.5-6).

LALPAN mi felte chu a fiah ṭhîn a, mi suaksualte leh nunrâwngte erawh chu a hua (Sam 11.5).

- Laiu Fachhai