LUNGLEI HMANGAIHTU PI RINPUII
Kum tam tak kal tawh aṭangin Lunglei lam aṭang hian cabinet minister kan lo nei tawh ṭhin a, an fel em em rualin, beisei angin Lunglei khawpui hi an hmangaih tawk lo em ni tih tur an lo ni hlawm tawh ṭhin. Tunah erawh ZPM sorkarah Pi Rinpuii chu Cabinet Minister niin, Lunglei a hmangaihzia kan han hre chho a, a hnathawh hmuh tur a awm ṭan ta hi thil chhinchhiah tlak tak a ni kan ti thei ang.
Party ruihchilh pawl hi hmun tinah kutchang thleh nghauh nghauh tham an awm zel a. Tuna kan rama political party hrang hrangah ngei pawh a ruihchilh pawh chu hmun tinah an awm vek tho tiin sawi ila kan sawi sual kher awm lo e. Opposition an ni emaw, ruling an ni emaw, party ruihchilh pawl hi chu an awm vek tho mai a. Chutiangah pawh chuan ZPM party hi an sorkar hma leh sorkar hnuah pawh an ziaawm ber mai awm e, a tih theih hial ang. A chhan pawh hei kum khat an lo sorkar hnuah pawh an party worker inluling thawm a ring lo riau a, an awm lo erawh kan ti thei bik hauh lo ang a, party dangte ai thlawt chu an inlulin thawm hriat tur a tlem daih zawk.
Lunglei khawpui aṭanga chhuak politician zingah party ang zawnga sawi pawhin Congress sorkar laiin Pu Zodintluanga chu Cabinet Minister a ni a, Lunglei pa tho Pu Joseph Lalhimpuia pawh Congress sorkar laiin Parliamentary Secretary a ni. MNF sorkar laiin Pu C. Lalrinsanga chu Cabinet Minister a ni bawk. Tunah ZPM sorkarah Pi Lalrinpuii chu Cabinet Minister a rawn ni ve leh a. An hun chhung ṭheuh thlirin Pi Rinpuii kum khat emaw chauh Cabinet Minister a la ni chunga Lunglei tana a hnathawh hi a tam ber mai awm e a tih theih hial ang.
An kianga sawi chuan Lunglei hi an vei ṭheuh a, tu mah sual pawh an awm chuang lo nâin, Lunglei khawpui hian tun sorkarah hian hmangaihtu tak tak a nei ta chauh emaw tih tur a ni hi ngawi renga lo thlirtu tan hai rual a ni lo. Dik taka sawi phei chuan Covid-19 hripui len laia Rt-PCR khawl pakhat chungchanga kan ram hruaitute thil tih kha kan la theihnghilh thei lo a, kan theihnghilh pawh a rinawm kher loh ang. MNF sorkar laia thleng a ni. Pu Zodintluanga’n khawl a lei a, Lunglei Civil Hospital-ah a hlan a, lawm taka an dawn hnu lawkah lak chhuah lehnghal a ni te kha hriatthiam a har a, Lunglei mipuite tan hian a thinrimthlakzia kha. Khatih lai pawh khan Pi Rinpuii chuan Prime Minister hnenah lehkha thawnin, Lunglei leh a chhehvel mipuite manganzia a thlen a nih kha.
Pi Rinpuii hian tunah chauh Lunglei hi a hmangaih a ni lo a, kum tam tak kal tawh aṭang khan Lunglei khawpui chei dan tur pawh a lo ngaihtuah fo tawh ṭhin. Kum 2019 chhoah phei kha chuan ‘Lunglei Unique’ tiin Lunglei khawpui chhunga Tlaizawng par phun dan turte hi mutmawh hnarmawhah a lo nei tawh a. Chu a vei em em chu tunah puitlin thei turin hma a la leh mek a, a puitling ngei pawh beisei ila. Chutih hunah chuan khawpui dang tan thîk tham a ni hial mai thei a, khawpui dangte hian an la entawn ngei pawh a rinawm.
Ram hruaitu tam tak lo nei tawh mah ila Pi Rinpuii anga mahni awmna khua hmangaihtu tak tak hi an tam kher awm lo e. Ama bial chhung chauh a hmangaih lo a, Lunglei khawpui ngei pawh a hmangaih avang hian kan chhuang a, hetiang ram hruaitu kan nei hi vannei pawh kan inti hle. Pathianin hriselna ṭha tak pe zel se la, ram leh hnam tan thawk zel sela tih hi kan ṭawngṭaina a ni e.
- Ramherliana