William Wordsworth-a poetical poetry ropui – London, 1802

Milton, tunah la dam ni teh la aw,

England chuan a mamawh êm êm che hi,

Dum, chirh uiha khat tlat ang lo niin,

A sakhuana, sipai chakna, thu hla,

A in ropui, a inchhuanna zawng zawng,

A hlimna kulhpui nen a chim tak hi!

Mahni hmasialnain kan khat ta bawk,

Tho la, kan hnenah lo kir leh teh khai,

Nun dan dik min han zirtir leh ang che,

Nang chu hmar arsi ang maia duhawm,

Tui fawn ri anga thu ropui sawi thei,

Vanthengreng anga thianghlim leh ropui,

Pathian hriatna nena laitual lêng ṭhin,

Inngaitlâwm taka thângchhuah i nih kha!

Milton! thou shouldst be living at this hour:

England hath need of thee: she is a fen

Of stagnant waters: altar, sword, and pen,

Fireside, the heroic wealth of hall and bower,

Have forfeited their ancient English dower

Of inward happiness. We are selfish men;

Oh! raise us up, return to us again;

And give us manners, virtue, freedom, power.

Thy soul was like a Star, and dwelt apart:

Thou hadst a voice whose sound was like the sea:

Pure as the naked heavens, majestic, free,

So didst thou travel on life's common way,

In cheerful godliness; and yet thy heart

The lowliest duties on herself did lay.

Hlahril puah dan

French Revolutuion sûlhnu râpthlâk tak takte hmuna a va hmuhpui hnuin, romantic poet ropui berte zinga mi William Wordsworth-a chu chau leh ngui takin London lamah a kîr leh hnak hnak a. Mipuite’n an chunga rorêltute an paihthlak dan leh, France ram hun tawn ropui leh chhinchhiah tlâk ber tih ngam mitthla reng chungin, a ram duh tak England leh tun huna a tlâkchhiat dan a ngaihtuah rauh rauh hnuin, he sonnet ropui tak hi a phuah ta a ni.

Hlahril kalhmang

He sonnet hi Italian hlahril phuah dan, Petrarchan Sonnet an tih hmanga rem a ni a, a rhyme scheme chu ABBAABBACDDECE a ni. Iambic Pentameter (unstressed/stressed) hmanga tlar tin rem a ni a; chumi awmzia chu, lambi hnih zela lambi hmasa zawk hi ri hniam, a lambi hnihna ri sang hmanga rem tihna a ni. Mahse, Wordsworth-a hian a hla tlara thumal ṭhenkhat erawh Iambic ni lo, Trochees (stressed/unstressed) zawka rem a nei nual! A hla bul ṭanna thumal, Miltton tih pawh hi Iambic ni lovin Trochess a nih daih hi! Mizo ṭawnga ka han lehlinna hi a lambi bikah lambi 10 hmang mah ila, metre leh rhyme erawh hman a ni lo thung tih lo hre ta ila.

Literary Devices hmante

Hla hril hi amah ngawtin a mawiin hna a thawk thei ngawt lo a. Hla rua leh hla chei mawina hmanraw chi hrang hrang ruai thiam apiangte hla hian ngaihsân an hlawh bakah, hlahril ropui an nih an hril ṭhin. London, 1802-ah pawh hian Wordsworth-a hian hla thu chei mawina chi hrang hrang thiam takin a leklam a; chung zinga langsar zualte chu–apostrophe, metaphor, symbol, enjambment leh metonymy-te a ni.

He hla hril bul ṭanna thumal, Milton tih hi apostrophe (mihring emaw thil dang, thi tawh emaw a tak awm lo sawina) a ni nghal a. A chhan pawh Wordsworth-a’n he hlahril a phuah lai hian Milton-a hi kum tam tak liam taah a boral daih tawh vang a ni. He hlahrila tlar thumna kan en chuan, England khawpui chu Wordsworth-a hian dûm nen a tehkhin thu kan hmu a. She (England) is a fen tiin, hlahril chei mawina metaphor kan hmu nghal a nih hi.

Simile leh metaphor hi tehkhin/khaikhinna hmanrua ve ve mah ni se, hriat pawlh awl tak an ni roh a. Rose pâr a iang e, rose pâr ang a ni (She is like a rose) tia tehkhinna hi simile a ni a, (She is a rose) metaphor nena a danglamna kan hmu thiam thei ang. Hlahril tlar 9-naah pawh Thy soul was like a star tiin, Milton-a chu vanthengrenga arsi danglam leh êng bik nen a rawn tehkhin a nih hi. Tlar 10-naah pawh a voice whose sound was like a sea tih kan hmu bawk.

He hlahrilah vek hian Wordsworth-a hian England chu mihring angin a rawn personify bawk. England hath need of thee: she is a fen, tiin England chu hmeichhia angah a rawn chhuah a nih hi. Hlahril chei mawina kan hman thiam loh pâwl tak tur, sentence laklawh laia chawlh awm miah lova thu chheh dan, enjambment an tih pawh Wordsworth-a hian a hla tlar hnihna–she is a fen leh tlar thumna Of stagnant waters sawi chhunzawm nan a hman dan khi in hmu thiam em?

Tlar hnihna tawpah hian comma (,) a dah miah lo a nih hi! Tlar 5-na tawp leh tlar 6 bul ṭannaah pawh a hmang bawk tih i hmu thiam tawh mai em? Hlahril chei mawi nan hian hla rua hmanga thil ṭhenkhat, an hming hmerh hmang si lova ṭawngkam dang hmanga an nihna sawina ang hi metonym an ti a. Wordsworth-a pawhin England kohhran, sipai chakna leh a thu leh hla (literature), a in leh lo sawi nan–altar, sword, and pen, fireside tih thumalte a rawn hmang ta a ni.

Hla hril chungchang

Aw le, he hlahril ka han lak chhuah chhan hi, tun huna kan ram dinhmun thlir chunga kan ram sûnna hla phuah hran tawh lo va, Wordsworth-a hlahril hmanga lungngaihna han puan chhuah ka duh vang liau liau a ni! Industrial Revolution kha 1970 aṭanga rawn inṭan a, kum 80 vel lai daih hmasawnna kawnga mihringte kan ṭhanharh lai hun a ni a. He hunah pawh hian England kha nasa takin a ṭhang lian a; mimal nun a ṭhang a, vantlâng nun pawhin chak takin hmasawnna lamtluang a zawh bawk. Chutih mek lai si chuan, mihring chhûngril nunah tlâkchhiatna nasa tak a rawn thleng tel ta tlat si a ni!

Kan ram pawh chak taka hmasawnna lamtluanga ke a pên zawt zawt lai hian kan chhûngril nun a tlachhe nasa êm êm lawi a. England mipuite ang bawkin mahni hmasialna leh duhamnain kan khat tlat emaw tih mai tur a ni zo ta a nih hi. Dûma tui chu khawiah mah a luang chhuak thei lo a, tui lo luang lut lah a awm hek lo. Chuvangin, rei rial lovin dûma tui leh chirhte chu an uih thâng huam tawh mai a ni. Chutiang chiah chu England leh a chhûnga cheng mipuite nihna a nih thu Wordsworth-a hian min hrilh ta a. Mizoram leh Zo fate nen danglamna rêng kan awm lo!

Changkanna leh hmasawnna hnuaiah nunphung hloh zovin, mihringa ṭhatna leh duhawmna awm ve zawng zawng, felna leh dikna, thianghlimna leh rinawmna zawng zawng nen, diriam tak leh lainatna nei hauh lovin kan nun ata khawlaiah kan ui thisâwn paih hmak hmak a. Chutiang dinhmuna England a han ding ta mai chu Wordsworth-a hian a thlir liam ngawt thei lo. Mangang takin a hûi pap pap a, a tawpah kum zabi 17-na hun laia hla hriltu duhawm ber pakhat, John Milton-a thlarau chu chhanchhuahna hna rawn thawk turin a au ta lawm lawm a nih hi!

Zêp leh ih nei hlek lovin, a ram hmangaih England chu mualpho thei ang berin, a suahsualna zawng zawng nen chhun ên vanglai takah a phawrh mualpho ta a! A nungchang mawi lo leh tenawm ber berte pawh khuh mawisak tumna pakhat mah a nei bawk hek lo. England-in a lo chapopui, sakhaw mi tak a nihna te, indo thiam tak a nihna, thu leh hla thiam a nihna, a in leh lo ropuina zawng zawngte chu a chhûngril nun a tlâkchhiat miau si avangin engmah lo mai an nihzia leh, chung a ropuinate chuan a tànna chirhdûm aṭanga an chhanchhuah theih si lohziate lam Milton-a hnenah hian a phawrh fai ta lêng mai a ni!

Tichuan, Milton-a hnenah ngenna urhsûn tak a thlen ta a, England leh a chhûnga cheng mipuite chu nun dan dik leh ṭha, khawsak mawi leh zahawm rawn zirtir thar leh turin Milton-a a ṭahawh ta ngawih ngawih mai a ni! William Wordsworth-a’n he hlahril a phuah (1802) aṭanga kum za chuang a liam hnuah, hmâna ram ni tla sêng lova rorêltu Kumpinu kha tunah chuan ram narân satliah ve maiah a lo chang ta a nih hi. Kohhran member-a a tam pâwl chu 30-te emaw lekte an ni ta!

Sipai chakna emaw, thu leh hla lamah a ni emaw, in leh lo ropuina lamah pawh ni se, ram tenau zawk leh a awp ṭhin ramte ngei ngei khan tunah chuan chak takin an lehpêl fua fua tawh mai! Insiamṭhatna kawng a zawh duh loh man, Wordsworth-a ten theihtawp chhuaha insiamṭha tura a lo turnate chuan awmzia rêng an neih loh rah an seng ta a ni. Nakin lawkah phei chuan Muslim rama an la chhuah mai a hlauhthawnawm thu sawi a ni ta! Pathian aia khawvel a tlanna rah kal zel chhiatzia chu khawvelin a hre ta a nih hi.

England ram tlûkchhiat hma lawka a nun ngei kha tun huna kan ram dinhmun dik tak a ni ta mêk. Suahsualnain in tin min luhchhuah a, duhamnain chhûng tin min rûn a, min hnehlâk zo ta mek bawk. Veng tinte chu biak in ropui tak takin hung chhuak vek mah ila, sual a tawmim phah hlek lo. Kan sumdawnna a lian tual tual a, kan duham tulh tulh si. Hriselna kan ngai pawimawh tial tial a, natna khirh vei kan pung tulh tulh si. Kan inkhawmpui a ropuiin a felfai tulh tulh a, kan inkhawm a ro tial tial thung. Nasa takin Pathian ṭihna leh ngaihsakna a tlahniam a, suahsualna kawng hrang hrangah kan ninhlei tulh tulh ta. Mipat hmeichhiat hman khawlohnaah nasa takin kan tlan a, nawhchizawrhna industry nasa takin a ṭhang lian mek bawk.

Thuthlung Hlui huna Israel fate suahsualna tinrêngte chu kan ramah hai rual lohin hmuh tur an awm ta vek a. Zawlneite'n ram rorêltu, sakhaw puithiam leh mipui an demna zawng zawngte chu demawm kan nihna a ni zo ta bawk. An suahsualna avanga Pathianin an chunga hremna chi hrang hrang a thlentir zawng zawng pawh kan ramah a thleng ta zawih zawih mai.

Chuvangin, chhantu kan ngai a, chhanchhuah kan mamawh ngawih ngawih ta. Milton-a anga mi dik leh ngil, sualnain a thlêm thlûk zawh loh mihring, sakhaw puithiam leh ram rorêltu kan va mamawh êm! Chutiang mi chu mi dangah zawng mai lovin, mahni ṭheuh hi kan ram chhan chhuaktu kan ni thei vek tih inpawm ngam a, ke kan pên a va hun ta em! 

- Lalremliana Pachuau