BIAK IN LEH I

Pathian kan biakna in hi kan ziah duh dan a inang lo hlawm hle mai - Biak In, biak in, biak-in, Biak-In tih te a ni nuai mai a; a ṭhenin eng style emaw nite an nei a ni awm e.

Verb modified form leh 'in' chu hetiang hian ziah tur a ni: êk in, zun in, biak in; chutiang bawkin noun leh 'in' pawh ni se - bâwng in, âr in, adt, tia ziah tur a ni.

A Sapṭawng lamah chuan - house of ADONAI; hous of the LORD; temple tih te a ni hlawm ang a, a Greek ṭawng emaw, a eng ṭawng pawh ni se a lêm chuang lo; kan ṭawnga kan ziah dan zawka hi a pawimawh. Mizo Bible (O.V. Ref)-ah hian "LALPA in" tih te, “Pathian biak in” tih te, “biak in” tih te hi hmun tam takah a awm a, khawiah mah “in” hi a hmaa mi nen an ziah zawm lo a, an ziak hrang zel a; phur châng chângin 'in' tiha 'I' hi hawrawppuiin an ziak ngawt lo bawk.

Hawrawppui han tih hian proper noun hi a lo lang hmasa
ṭhin a; proper noun a nih chuan hawrawppui chu heti hian an hmang ṭhin: Kan Choka; Hotel Naran; The Dawrz (dawr hming); A Na Lua; Bible Thlirna (lehkhabu hming); Bethel Presbyterian Biak In (biak in hming)

Hawrawppui hi mahni ṭhahnemngaih vang emaw, a ropui ta riaua hriat vang emaw, chhiar a nuam zawk tih vang emaw-a duh duhnaa hman chi a ni lêm lo. Chutih laiin Pathian kan biakna hmun a ni a, tih avanga hawrawppui lo hman hi... a ṭul ngang a ni mahna le!

Biak in ang deuh bawk hian Pathian sawina 'pronoun'-ah hawrawppui hman mai ching an tam hle. Pathian hi Kristiante Pathian a nih chuan P hi khawi hmunah pawh hawrawppui tur a ni; LALPA tih te phei chu hawrawppui hlanga ziah a tam em em! Khitiang khi a nih avangin Pathian sawina tho, "a, amah, ani" tih ang chi-ah ṭhenkhatin hawrawppui (A, Amah, Ani) an hmang ṭhin a,
ṭhahnem an ngai ve a ni chêk ang.

Hawrawppui kan hman chhan leh a ṭobul chu thu dang lo ni se, pronoun chu pronoun a ni tih kan hriat a ṭha. Pronoun-ah hian hawrawptê hman tur, sentence bulṭanna leh hawrawppui hmanna chi ve rênga a awm fuh hrim hrim a nih loh chuan, sentence karlakah chuan thumal dang ang bawkin hawrawptê vek hman tur a ni. Mizo ṭawng lehkhabu zingah Mizo Bible tluka hawrawppui leh hawrawptê an hman dik felfaina a awm lo ang, Bible-ah pawh Pathian sawina pronoun chu hawrawptê vek a ni. Bible-ah hian ziah zawm leh zawm loh
ṭhenkhat erawh tunlai ziah dan aṭanga chhûta dik ta lo erawh awm zawng a awm ve e.

Mahni ṭhahnem-ngaihna vang emaw, Pathian tiha 'P' haw-rawppui a nih vang emaw, ani hi chu a ropui bik tih vang emaw, chhiar a nuam zawk tih te, hriat hran a awlsam tih te vang emaw, style neih hran duh vang emaw-a "Ani, Amah, A" tih vel lo tih hawrawppui ve ngawt thil tih chi a ni lo e.

- Rempuia R. Lûtmâng