Media-ten mi retheite kan ngaihsak a tul

“Zalên tak leh tlang takin thu kan ziak a; nihmahsela mipui a thlen hmain kan siam tha leh thin” – Mark Twain

Media han tih hian Mizo ṭawng ang maiin kan hmang tawh a. Hetah pawh hian ‘media’ tih hian journalist leh media lama thawk zawng zawngte sawi nan kan hmang mai ang a. Media lama thawktute hian mi tupawh min en hrang lo tura beisei dan kan nei a, ‘media ethics’ aṭang pawhin a dik reng a. Mipa a ni emaw hmeichhia a ni emaw, mi rethei leh mihausate pawh thlirna thuhmuna min thlir turin kan beisei tlat a. Mimal inhuatna vang te, hnam, sakhua, vun rawng leh thil dang avanga thlauhthlak bik leh duhsak bik an neih loh hi an hlûtna tak pawh a ni ang.

Supreme Court Judge hlui Justice GN Ray-an, “chanchinbu mite hian kan zalênna kan hmang sual tur a ni lo. Pawn lam
aṭanga langtlang (accountability) leh chhiar theih (credibility) kan nih zel hi kal fawrna laka min vengtu leh khua leh tuiten kan duh zawng tak sawitheihna (freedom of speech) atan tihmakmawh a ni” a ti a. (G.N. Ray ‘Media Ethics’: Address by Chairman, Press Council of India on 18th January 2007 at IIMC, Dhenkanal, Orissa.) Hei hi kan ramah hian kan hmang tha thawkhat ta viau a. Tun hmaa Chanchinbu ṭhenkhatin ‘letter to editor’ an chhuah ṭha duh lo tih te kha hriat tur a awm ta lo va. A lawmawm hle. Chanchinbu mi, âwn lam nei rana lailak (neutral) thiam lo te hi Media ethics aṭang chuan journalist ni tlak lo an ni ang.

Media ten news item chauh duh tawk lo vang: Khawvel hmaah nalh tak takin inpho ṭhin mah ila, kan thawm khawvel lehlam thlengin thang chhuak pawh ni se; ‘mi rethei tamna ram’ tia min hriat vaih chuan ngaihdan tawk an nei ngei ang. Media ten kan rama retheihna tihtlem kawngah mawhphurhna kan nei lian hle. Eirukna te, rorelna dik lo te, chak lo zawk rahbeh chhanchhuahna kawngah te dikna hailan a nih theihnana beitu media lama thawk zingah mipuiten pasalṭha chawimawina nopui hlan kan chak reng. Nitin chanchintharah retheite harsatna leh kut hnathawktute lam hawi hi tarlan a ni thin a. A chhanchhuahna kawngah eng chen nge tan kan lakpui zui tih erawh ngaihtuah vang vang tur a awm.

Mi retheiten kan âw ber chu media mite an ni a. Hei hi min chhang sela; mi hausa leh thiltithei, politician, infiam mi, mi lar (celebrity) leh langsar sate chet hlekna kan tihlan (flash) zung zung lai leh kan umzui reng lai hian mi rethei, riltam leh buhfai leina tur nei lo te, ramsa leh khuarel chhiatna avanga an neih chhun ngawih ngawih chân ta te hian ngaihsakzui an hlawh em? mi bathlara chawhmeh chhe te te tlaivarpuite hian umzui an hlawh ve thin em? kawngpui tha tak tur, mi pamhamten an eiruk avanga accident hial kan tawhna kham leh suar iâng zo ta; mittui nena kan bual hnan te hi chanchinthar (news item) atan chauh ni lo hian “engtin tak ni dawn maw?” tih te hi sawihona (discussion) atan han chhawpchhuak hluai mai ila. Sawrkarin V.I.P-a a dah mi retheite hian kan lo sawi ve ang chu! Media hian âwn lam neiin leh a mawm lam chauh a bawh a nih ngai chuan mi retheite hmalam a thim dawn em mai.

Mak kan tih hi a tam ta!: Mizo ṭawng pawha lam hleitheih loh ennawm kan thlir zozai hi vun sen (Red Indian) hovin vun varho (English) chet rawva duh dan mak an tih ang leh an ram chhuhsaktu tia an hriat ang maiin keini hian mak thlirin kan thlir a. Ram leh hnam humhalh kan tih mek lai hian kan tawng ral mek thlenga pawikhawih thei thil a tam ta deuh em? Keini thingtlang mi retheite tan chuan en leh chhiar tura min pek hrang hrang hi a awmzia kan hriat loh tam tak a awm ta. Hmaia an hnawih leh ziah ran zozaite, thawmhnaw man to tak takte hi kan tan hmuhnawm a tling ve lo va. Fashion show an tih te, eng style style emaw ni - an disco dancer te hi khawia hman tur ni maw kan lo ti mai a! pawisa tam tak chawia rimawi nena an insawizawi thup thup kan hmuh te hian mak kan ti a. Kan sawhthing hmunah rawn feh ve sela, dulkiar te chuan kar khat pawh a awh hauh lo vang. Kan lo free vek ang.

Media thiltihtheihna hmanga kan thluaka lut zozai - kohhran ngaihtheih lohna te, zu do chu mimawl leh ngaihtuahna hmang zau lo anga ngaih theih tura tarlan zozaite hi awih lo ngawt dawn ila, a lehlam sawifiahna leh hrilhfiahna kan dawng tawh si lo va. Kan tu leh fate pawhin, “kohhran hian a tih loh tur a ti a ni” an tih lang lang tawh hi! Kan thluak sukin a awm zo va, a mak mang e aw tih mai loh chu sawi tur reng reng kan hre ta lo. Kan thlahtute aṭanga thinlunga kan vawn tam tak ‘dik nia kan ngaih lungphum’ a nghing mek laiin a dikna zawk min petu an awm lo va. A dik lo lam an hmuh renga, a dik lam an ngawih reng si chuan kan tu leh fate ngei ngei pawh kan hneh lo a nih si hi. Ngawih reng hi rangkachak tluk em mawni dawn tak ni? Rangkachak nen kan la ral riai riai dawn chu a nih hi maw!

Mi retheite kan chep tial tial: German theologian, Nobel Peace Prize dawngtu Albert Schweitzer-a khan “Ethics kan tiha pawimawh hmasa ber chu lungmuang taka midangte nena nunho hi a ni ang” a ti a. Lungmuang tak hian kan nungho hleithei tawh lo chu a ni ber lawm ni? A nei leh nei lo inkar a hla ta hle a. A nei lo tan a nei zinga lungmuang taka nun a harsa tial tial. Nitin inhlawh chawpa eizawng ṭhin tan he ram Lalpa zawnchhuah ramah hian eikhawp thawhchhuah a harsa tulh tulh a, mi retheite chu mi hnawksak kan chang zo a nih tak hi.

Kan Jerusalem Aizawlah, Inrinni bazara kawngpui kama zing vawikhat ṭhutna tur tlaivara hauh lawk te; ni a lo tlangsana kan hnawh darh leh ṭhinte hian eng nge an mamawh? An sual vang nge ṭhutna tur dang a awm lo? Mi rethei zawkte hian khawiah nge hmun an neih ve ang? Bazar-a dawr ak ṭhin te kalbo tura kan um kan umho te hi an luhlul vang nge? Mi hausaten motor nalh tak tak dahna (parking area) tur an neih laiin mi retheiten nitin eikhawp hlawhve na tur hmun chang lo va an tlanchhe chawn chawn hmuh hian a fair mawlh lo - pum chhunga awm a che dat thei a sin. Heng mi retheite hian ‘Free wifi’ an hre lo; retheihna ata chhanchhuaktu erawh an hre khawp ang.

Journalist ṭha kan duh: Mi retheite ngaihsak leh khawngaih ber ang ziazanga thlan pawn lama hnawihvarte an tawng lai hian an tih tur zam (policy) chu kan ti zo vek tawh. “Sawhthing ching rawh u” an ti a, kan ching a; a hralhna awm leh si lovin a ṭawih hnephnup a nih kha!

Khatih lai khan Journalist tam berte hi khawiah nge an awm? Engah nge kan thlavang min hauhsak ve loh? Kan lakhuihthei hralhna tur kan hriat loh laia kawngsira kan tian hnek hnuk lai khan a chin chhuaka min zawt journalist chu tlemte an ni! Tung ching rawh u; mau ching rawh u; sapthei ching rawh u an ti. Kang damdawi (Jetropha) thlengin kan ching a. Kan dinchhuahpui hleithei si lo a nih hi.

Mi retheite hian a dikna kan duh a. Kan dinchhuahna tur tak tak kan duh ta. Journalist ten a ngaihna an hria ang tih kan ring. Min pui turin Superman kan mamawh lo; Journalist tha a ni kan duh ni. Zoram titi (issue) tur - ‘retheite dawm kân dan tur’ min siamsak ve ulangin, vei tur dik hi vei tlang ila. Kohhranhote pawhin hei aia nasa hian Isua hmangaih mi retheite hi kan bulah an awm a, ṭanpui an ngai a, hla taka hnam dang ngal sang zawkte vei thulh chuang si lo hian tih dan kan thiam lehzual mahna! A tuate tan pawh “kan kovah Lalpan a nghat” tih tluk zetin retheite ngaihsak lehzual tura harhna dik chang turin Kelkang kal kher a ngai lo. Chutianga mipui sukthlek tidanglam dawrh thei chu Journalist tha te an ni.

Kan tan hmun a awm ve lawm ni?: Thingtlang aṭanga damlo hmanhmawh taka damdawiin lo tlan lut, chhung leh khat nei lo te hi khawiah nge an thlen ṭhin media te hian kan hria em? Tam tak hi chu an vakvai titih fo a sin! Damlo na tuar, thi put leh rimchhe tak chung chuan chhungkhatte pawh belh a inthlahrunawm tehlul nen, chhungkhat nei ve lo te tan chuan a va manganthlak ṭhin em! ha chang thial mai aiin bialtu MLA te kan bel a. MLA kan neih fuh loh phei chuan chuti hlauh a sin!

Mi rethei berh te te tan kan Jerusalem - Aizawl hi a ngaihawm thlawt lo va. Min hip ta lo chu a nih ber hi! Naktuka thi mai tur, beidawng taka mittui nena vaivut khu kara tlaivara rawn inphur rum rum thinte hian Aizawl - Delhi direct flight tih te, 7th Pay Commission tih te kan mamawh lo; chawlhna tur, hahdamna tur, kan mittui phihfaina tur khualbûk te hi a sin kan mamawh em em zawk ni! Kan mamawh, kan beisei te hi a len loh thin vei nen hian; keini mi retheite rah ngai reng reng loh tur khualbuk - Shillong, Guwahahti, Kolkatta, Delhi leh a dangtea Mizoram House kan neih that tehlul nen, kan Jerusalem Aizawl ngeiah ‘kan tan hmun a awm ve si lo’ tiin van Jerusalem thar kan ngai ngawih ngawih a nih tak hi!

Inthlakthleng (change) hmuh kan duh e: “Eng nge ka pek chhuah ang?” tih aia “eng nge ka dawn ang?” tih rilrua than hnan tura politician ten kan tapchhak zâwl luhchhuaka min hruai sual mek lai leh sum therhlo te te ît lo thei lova retheihnain hruihrual anga min zêm chiât lai hian; mi retheite âw chuan vote hlu tak kan pekte beng a thangkhâwk pha lo va, an hnuai, hnuai leh te hnuai pawh a thleng hleithei tawh lo a nih hi. Mi retheite beidawng au râwl hian kan media hi luah tam ve sela. Journalist, mi retheite chhanchhuah hna thawk tur he ram hian a mamawh a nih tak hi!

Mi retheite chauhin he retheihna hi kan tuar lo; kan zavaiin min nghawng vek a ni tih hi Karl Max te, Max Webber te râwn ngai hauh lo vin kan hria. India Prime Minister Narashimha Rao a nih laia LPG policy avanga kan ram dinhmun inthlak dawrh te kha a la ngaihnawm reng. He ram hian thlakthlengtu, chhanchhuaktu a mamawh a, sawrkar te, NGOs te leh kohhran pawhin kan mamawh. Chutianga mipui zirtirna kawngah te, retheihna tih tlem kawngah Media ten ke kan pen phawt chuan mipuite hi chuan kan zui thin tih hi thudik awmsa a ni.

Media ten kan duh chu kan siam lian a, zai thiam lo pawh kan tih lar tlat chuan kan hmu zaithiam thuai a. Hmel puak vak lo pawh chawisan (promote) an nih chuan “ka hâng naa, ka nalh a nia” tih ang deuhin model nalh tak leh to tak an nih thuai thin hi maw!

- Zonunsanga