Party Politics inchirhthehna
Hun lo la kal zel turah ṭhangtharte’n thu dik an hre lo ang tih hlauhawm khawpin kan politician ṭhenkhatte hian thu dik hrulah thu dik chanve an sawi duh ta zel mai. Party politics inchirhthehna ang chi, mipui mimir tana thu dik zawk hriat hleih theih loh a tam hle. Thil pahnih politician-te sawi dan inang lo han tarlang ila:-
Mizoram hi India ram bung khat a ni: MNF ni lo, political party ṭhenkhat chuan, MNF chu India Union hnuaiah ‘Mizoram hi India ram bung khat’ (integral part of India) a ni ngei e, tiin an inziak lut tawh a. Mizo nationalism hi sawi ve tawh tur an ni lo, an ti ṭhin.
He thu hi India leh MNF inremna, Memorandum of Settlement (MoS)-ah khan tarlan a ni lo. Amaherawhchu, remna leh muanna ken neih hma, July ni 1, 1976 khan MNF leh India sorkar chu Shillong-ah inbia-in, MNF aiawhin Pute Laldenga, Tlangchhuaka, Chawngzuala, Biakchhunga, Biakvela, Zoramthanga, Rualchhina te an tel a. India aiawhin SL Khurana, Home Secretary, S.K Chhibber, Lt. Governor, M.L Kampani, Jt. Secretary te an ni.
MNF aiawhte chuan Mizoram chu ‘integral part of India’ a ni tih pawmin India Danpui hnuaia inbiakremna neih an pawm - hei hi Shillong Agreement tih a ni. (Shillong Agreement, 1976 No.2: The MNF declaration acknowledged that Mizoram is integral part of India and conveyed to the Goverment of India their resolve to accept a settlement of all problems in Mizoram within the framework at the Constitution of India). Pu Denga leh S.L Khurana ten hming an ziah hnan a. He Agreement hi hnam sipaite leh hruaitu tam takin an pawm theih loh avangin Pu Denga chu Arakan lamah MNF President aṭanga paih a ni nghe nghe a nih kha.
Inner Line Regulation/ ILP: ILP chungchangah hian thu inchuh a awm leh a. Chu chu, ‘he dan hi India sorkar pawh hian Mizoram sorkar rawn lovin a ṭhiat emaw, a siam ṭha ngawt thei lo, hei hi remna thuthlungah nghet taka dah a ni, an ti. He thu hi MNF Sr. Vice President Pu Tawna chuan August 13, 2016 khan Republic Vengthanga MNF party inkhawmah a sawi a, nitin chanchinbu leh LPS 1-ah a lang bawk. Tin, he thu vek hi MNF President Pu Zorama chuan Govt. Kolasib zirlaite hmaah tunhnai khan a sawi tawh bawk. ‘ILP hi remna avanga kan rawn hawn a ni’ ti ang thawthangin a sawi.
Tuna Inner Line Regulation kan neih mek hi remna avanga kan neih a ni lo tih hi chiang phawt ila. Sap hovin min awp lai, kum 143 liam ta khan Bengal Eastern Frontier Regulation, 1873 avanga kan neih kha a ni. Remna thu-thlung (MoS)-a inziak, kan thu inchuh lai ber chu - Mizoram sorkar rawn hmasa lo chuan tihdanglam emaw, paih emaw a ni tur a ni lo, tih hi a ni a. Mizoram sorkar a rawn ang a, Mizoram sorkar remtihna tel lo pawhin an tidanglam emaw, an paih emaw thei tho tih hi thudik tak, MNF leh India inremna sawi bawrhban tumna a ni lo tihah hian chiang tlang mai ila a ṭha awm e. (MoS III.4-ah hetiang hian ziak:- The Innerline Regulation, as now in forces in Mizoram, will not be amended or repealed without consulting the State Government).
- Roṭhuama Sailo