YES, WE CAN

Tripura-a airport awmchhun Maharaja Bir Bikram Airport khu a ṭha vei reuh khawp a. International airport niin, Tripura khawpui Agartala hmarthlang lam km. 12 hlaa awm a ni. Airport Authority of India (AAI) enkawl a ni a, India hmarchhakah chuan Guwahati Airport dawta lûn ber a ni an ti. Tripura Airport hi India independence hma, kum 83 kal ta 1942-a hawn a ni daih tawh a; an lal, an Maharaja, tuna airport hming putuin a din a ni. Indopui-II hun lai, kum 1943 khan British thlawhna sipai pawl, Royal Air Force (RAF)-te’n Burma lama supply pek nan an lo hmang zak zak tawh a ni. Khatih lai kha chuan Mizoram chuan British sipai hotu lar tak mai, 14th Army Commander Gen. William Slim-a din Lushai Brigade kan nei ]ṭan ve laih laih a nih kha! Zêp nâk emaw, khatih hun lai kha chuan Mizoram chu kan la hnufual par par viau mai. Kum 1938-a Mizorama zawlbuk kan tihtawp aṭanga kum 4-naah Tripura chuan airport an lo nei dîm diam tawh tihna a nih chu.

Tripura-in airport an neih aṭanga kum 56-na, kum 1998 December 12 khan Mizoram chuan Lengpui Airport kan nei ve chauh a, kan lo inthlau viau mai. Hetia sawi takah chuan, Lengpui Airport hi a hun lai khan airport siam chak ber record vawngtu a ni ve tlat tak asin! "Choak bak a ṭum lo vang" tia eptute’n hnehsawh taka an sawihnâwm bawih bawih chunga tumruh taka Congress sorkar Pu Lal Thanhawla kaihhruaiin cheng vbch. 979 senga kum 2 leh thla 2 lek chhunga an siam zawh ve ngat a ni. State changkang zawk airport-te nen chuan khaikhin hleih theih ni lo mah se, kan sual chhuah dan history-te ngaihtuah chuan Mizoram tan a hlu hle a ni.

Zêp nâk emaw, Lengpui Airport enkawl hi a hautak kan ti viau tak nâ a, a enkawlna leh a tihchangtlun zelna sum tam zawk hi chu Central sorkar sum kan hmang zel tho a nia! Tunah enkawl zo tawh thlâwt loa inngaiin Indian Air Force kutah ber kher hlan kan han tum leh ta nghal a ni awm a! Eng tak ang maw?

Kan ṭhenawm tho Manipur-a Imphal Airport kan tih mai, Bir Tikendrajit International Airport hi Mizoram buai (1966) hma daih, kum 1959-a hawn a lo ni daih tawh bawk a. Lengpui Airport aiin kum 39-in a la upa zawk ta reng reng bawk a nih chu! He Airport pawh hi India hmarchhaka airport lûn ber pathumna a nih bakah, a lian ber dawttu a ni ngat bawk.

Mizote hi hetia kan ngaih mai ai hian kan nau a nia! Kum 1972-a UT kan nih chhoh ve laih laih hma khan kan ṭhenawm state-te chuan airport an lo nei dîm diam tawh maw le. Medical institution lamahte hlei hlei hian kan in advance hleih. UT kan nih kum (1972) khan Manipur hian medical college (RIMS) an nei daih tawh. Tehkhin hleih theih loh khawpin kan in advance hleih a ni.

Chuti chung chuan Mizoram hian lei rem kan han rah ve chinah chuan kum 20/30 lek chhung lekin nasa takin hma kan sawn a. Han induhkhawp lo viau ṭhin mah ila, state kan nih hlim (1987) te ngaihtuah chuan hmasawn nasa tak kan ni. A nihna takah chuan ṭhenawmte ûm dawr dawr ngai khawpa káwlêk thai sa kan ni zawk. A chunga kan han tarlan state pahnih, kan ṭhenawm Tripura leh Manipur te hi January 21, 1972-a state puitlinga hlankai an lo ni daih tawh a, Mizoram aiin kum 15-in state an ni hmasa a. Rambuai vanga hmasawnna kawng kan zawh ve hman hmain kum 15 zet min lo tlan khalh vang vang tawh tihna a nih chu.

Mahse, heng kan ṭhenawmte hi Mizoram hian kan la lehpêl vek dawn! Tunah pawh hian kum 15 zeta min tlansan chungin min phak lohna tam tak an nei dêr tawh. Kan hmasawn chak dan en hian independent sual chhuak zo lo mah ila India rama state changkang ber kan la ni daih thei. Anni angin leilung hausakna–natural gas te, chinai (limestone) te, glass sand te, chromite te, green marble an tih mai serpentinite leh a dangte nei ve lo mah ila, an neih ve loh society leh culture duhawm tak, mipui thuawih tak, muanna hnuaiah social institution ṭha tak takte kan nei a; corruption hi 30% vel tal pawhin tlahniam thei phei se chu nasa takin hma hi kan sawn ngei ang.

In ring em? Kei chuan ka ring tlat. World class-te zawng la hla deuh mah se, Mizoram hi India rama state changkang ber, thianghlim ber, ralmuang ber, state nuam ber hi kan ni thei tlat. Kan thei ang. Yes, We Can!

- C. Lalhriatpuia