Thuneitute u, ṭang mawlh teh u

Mizoramah January thla pum hi chu thlasikin a la huam turah ka ngai ngawt a, ṭhâl tak tak (ṭhâl vaekchâr) la ni lo chiah mahse ṭhâl a ni tel tawhah ka ngai ngawt bawk.

Kum 1997-a Mizoram state a nih hnua ṭhâl laia kawng chhe lutuk vanga Mizoram ni tin mamawh chi tinreng phur luttu truck-te tlan ngam lova an din tawp mai hi a la awm ngai lo niin ka hre ve ngawt a (dik tak maw?). Mahse, tunah hian kawng chhe lutuk vangin truck an tlan ngam lo mek chu a ni si!

Mizoram châk lakna national highway kawngpui pawimawh ber ṭhâl laia truck tlan ngam loh khawpa a chhia hi Mizoram tan a mualphothlak a, Mizoram mipui tan a zahthlak tak zet. Mawhphurtu inkâwk dawn ila, Mizoram sawrkar hi kawh loh theih a ni lo. Mizoram sawrkarah pawh PWD leh a enkawltu PWD Minister te hi kawh rawn theih an ni bawk.

Mizorama NH tam ber chu NHIDCL enkawl a ni tih kan hria a, Mizoram PWD-in tlem azawng enkawl chin an la nei. Tun dinhmunah Mizoram sawrkar leh PWD hian an enkawl chin NH kawngpui an enkawl hneh lo tak zet a, NHIDCL enkawlte pawh a ṭhat theih nan an vil hneh chuang lo.

NH kawngpui zinga a tam zawk hi sawrkar enkawl ni lo mah se, Mizoram chhunga mi, Mizoram ta, Mizote ta a nih miau avangin state sawrkar hian mawhphurhna lian tak a nei tho tho. Sawrkar enkawl a ni lo, tia insawi fihlimna tur a ni lo.

Nikum 2024-ah kawng chhe lutuk avangin truck an tlan duh lo a, an tlan duh lo ṭan chiah a, sawrkarin sum awm thei ang ang pawtin kawng chhe zualpui an siam nghal a, PWD Minister-in a hmunah a tlawh nghal bawk. A hma zawngin a tlawh thu chhiar/ngaihthlak tur a awm lo.

Kawng siam theih loh chhuanlama an hman ber 'ruah a sur' lohna hi thla 3 dawn a ni tawh. Hemi chhung hian Mizoram mamawh tinreng lak luhna kawngpui ber tal chu an siam mawlh mawlh tawh ang chu tih laiin, kawng chhe lutuk vanga truck an tlan dawn loh thu kan hre leh ta! Truck neitute'n thawm an nei chiah a, PWD lamin kawng an siam ṭan ve leh mai a, PWD Minister-in kawng siam a en ve leh nghal bawk a; a hmain a tlawh thu hriat tur a awm lo.

Truck pawl hovin thawm an neih loh laia kawng chhia ngaihsak lo, thawm an neih veleha che ve chauh ṭhin kan nei hi a lungchhiatthlak. Engati nge a hma khan an siam mai loh? A mak a ni. Thawm an neih ni lâ lâa an siam nghal thei a nih chuan, thawm an neih hma pawh khan an duh phawt chuan an siam thei a ni tih a chiang.

Sawrkara hamṭhatna, therhlo leh duhsakna eng emaw beisei mi ṭhenkhat an awm a ni mai thei; mahse, mipui nawlpui chuan chutiang chu kan beisei lo. Beisei erawh kan nei–kawngpui ṭha, power supply ṭha, tui leh ei tur (chaw–buhfai) hnianghnar, zirna leh damdawi lama inenkawlna ṭha. Hengte hi a ṭhat phawt chuan mipui nawlpui hi kan lungawi mai.

Mipui nawlpuiin Mizorama sawrkar ding tawhteah an beisei an an hmu lo va, chuvang chuan beiseina sang tak nen tuna sawrkar mek hi kan thlang tling. Mahse, a chunga kan sawi–sawrkar laka mipui nawlpui beiseite hi tun sawrkarah hian a thleng rêng em? Sawrkar kal tawh ṭhenkhatte ai mahin tuna kan sawrkar hnuaiah hian kan dinhmun a chhe zawk mah a ni lo maw? Ngaihtuah tham tak a ni.

Sawrkara thuneitute u, ṭang mawlh teh u.

- Zodinsanga