Civil service combined prelims exam

Kumin February 22-a Manipur Public Service Commission-in lecturer lakna atana exam a buat­saihaah Physical Geology question paper-ah chuan zawhna 20 chuang kha University of Wyoming-in entrance test a buatsaih ṭuma question 40 chuang UPSC-in website

aṭanga a lo copy tawh zinga a copy chhawn ve leh a ni a, hei hi Democratic Students’ Alliance of Manipur (DESAM) chuan nasa takin a dodal a nih kha. (The Sangai Express, IMPHAL, Feb 26)

June 19 khan MPSC chuan mem­ber thar hnuaiah combined exam prelims hmasa ber a huaihawt a, Mizoram mipuiin beiseina sang tak nen kan thlir reng laiin exam question set danah Manipur-a thil thleng ang deuh khi a thleng a, social media lamah sawi zui a hlawh hle.

Civil Service Com­bined exam pre­lims Paper-II-ah khan interpersonal communication bikah zawhna 15 a awm a, Booklet A-ah chuan zawhna 15 aṭanga 29-na thleng a ni. Kha zawhna kha he website http://wps.ablongman.com a interpersonal communication study site aṭanga a ngai ngaia lak deuh vek a ni.

Hei thil hi question set-tu inthlahdah zia tilangtu leh combined exam ngaihpawimawh lohzia tilangtu a ni a, Mizoram pumin MPSC member ruat chungchang leh nasa taka chairman pian kum kan khel hnua thilthleng atan chuan a inhmeh lo hle. Mizoram sorkarin MPSC member atana pastor a duh chhante thlirin exam beitute leh mipuiin MPSC chungah rinna sang tak an neih laia MPSC exam ngaihpawimawh tawk lohna thil a thleng ta hi a pawi a, thleng nawn tawh lo se a duhawm hle.

Zirnaah inelna a sang tawh a, MPSC exam beitute pawhin nasa takin sum, hun leh tha sengin, exam-a tling tumin an bei ṭhin. Exam buatsaihtu lam aṭanga ngaihpawimawh tawk lohna anga lang awm ta hi thil ṭha lo chu a ni a, zirlaite tihnualtu a ni thei a ni.

Website aṭanga copy paste turin mi­thiam tak nih a ngai lo a, internet khawih thiam chin chuan an thiam vek a rinawm. Sorkarin mipuiin sum tam a sen chhanah kan chiang lo ṭhin hi a pawi a, MPSC enkawl tur hian sorkarin mipui sum ṭhahnem tak a sen bakah question set-tute pawh mipui sum tho a pek a rinawm. Zirlaite hian an zir hah phu tawkin question set-tute tih tak takna leh beihna hi question-ah langchhuak ve se tih an beisei let a ni.

MPSC meuhin combined exam ques­tion set tura a ruatte chuan syllabus zau tak aṭangin an irawm chhuak zawhna an siam thei ngei ang tih ka ring tlat.