Designation Plate a hnawksak lo

Tun hnaiah officer ni ve lem lovin officer-te motor-a designation plate an vuah sawiselna kan chhiar ta malh malh a, officer-te hi sorkar hnathawk an ni a, an tan au chhuah a rem lo. Kei officer pawh ni lova sorkar hnathawk pawh ni lem chuang lo hian ka chhan lo thei lo a ni. Sorkar motor-a designation plate tar hian hnawksakna a nei lova, ṭangkaina hlirin a khat zawkin kei chuan ka hria.

Officer motor-ah hian an nihna hi tar lo ta se mimal thilah an duhtawkin an hmang thei dawn tlatin ka hria. Hetianga designation plate tar hi sorkar motor provate thila hman tur venna ṭha takah ka ngai a, hei hi a sawiseltu lamin an hmuh hmaih chu a ni. Sorkar motor a ni a, sorkar motor a ni tih chhinchhiahna a nih bakah a kawltu hian dan dik takin a hmang nge hmang lo tih endikna remchang tak a ni bawk. Sorkar motor ṭha taka hmang tura invenna leh inhung bingna angin kei chuan ka ngai a, hei pawh hi vuah chhan tham niin ka hria.

Ka hriat sual loh chuan tlemlai deuh khan sorkar motor ni si sorkar motor a nihna chhinchhiahna Department hming leh a kawltu nihna designation plate pawhthla an awm a, an sawisel tlatin ka hria. Kha pa/nu khan sorkar motor a kawl kha a mimal ta ang maia hman a duh avangin a chhinchhiahna a paih ta a ni lo maw? tih hi tuna ka ngaihdan leh ka pawm dan chu a ni ta a ni.

Tichuan designation plate neih a ṭhatna dang leh chu officer-te an pawimawhna hmunah an nihna ang takin en an ni thei dawn tihna a ni. Chumi sawifiahna atan chuan heti hian ka han sawi ang e - thingtlangah BDO-in a motor-ah BDO tih a tar chuan a kalna apiangah zah a hlawh a, sorkar hnathawk awm vete pawhin a motor an hmuh rualin an awm dan an siam ṭhat phah thei. Tin, an bial chhungah zahawmna a keng tel a, BDO an ni tih an tar hi an tar loh ai chuan huhang a neih bakah an pawimawhna nemnghettu a ni tih hi ka pawm dan a ni. Minister-te pawh hi an motor-ah Minister tih tar lo se khawi lo chhuahnaah mi naran ang mai mai an ni ve thei tho.

A chhan chu Minister tam zawk hi chu mipui hian an hmel hi kan hre lem lo a ni, an motor hi an Minister nih kan hriat hran theihna a ni zawkin ka hria. Chutiang chiah chuan officer-te pawh hi an officer nih pawimawhna hi an hmelah a lang thei si lova, officer 90% vel hi mipui hriat loh an nih ka ring bawk si a, an motor-a zahawm taka an nihna an han ziak vang a, chuta ṭanga an rawn chhuak hi chu kan en dan a dang daih tawh ṭhin a, kan zah em em tawh a ni zawk lo maw?

Miin an tar chuan a ṭangkaina a awm a ni mai. Chief Secretary-in a lak thlak avang hian a lathlatu hi fak mai ni se, a lathla ve lote dem zawnga Mizoram chanchinbu darh zau berah te lai lai thu ziah vak vak hi kei chuan a ṭha ka ti loin ka pawm thei tlat lo a ni. Designation Plate hi a hnawksakna aiin a ṭangkaina a tam zawk.