IAF KUTA LENGPUI AIRPORT HLAN
Chanchinbu thenkhat atangin Mizoram Sawrkar chuan Lengpui Airport IAF kuta hlan tumin hma a la mek zel a ni tih hriat a ni a. Airport neih hi a harsat tehlul nen engtizia nge ZPM sawrkar hian IAF kuta Lengpui Airport hlan hi a duh a, an hmanhmawh viau le? ti tein ka ngaihtuah a. Kan Chief Minister kal chhuak ta Pu Zoramthanga khan Mizoram House pakhat Ballygunge Kolkata ami a lo hralh tawh bawk a. He Mizoram House hi Pu Ch. Chhunga ten harsa taka an lo lei kha a ni a. Mizoram house kan neih tawh zawng zawng a upa ber a ni mai thei. Kolkata hmun laili a awm anih avangin Kolkata Mizo awm te tan inhmuhkhawm leh thil tihkhawmna remchang tak a ni bawk a. Chuvangin khatianga hmun lailiah khan building tha lei tur kan hmu tawh kher lo ang. Hetianga sum kan duh lutuk avanga kan thil neih tha kan ti ral zel dawn chuan kan in hralh kawt vek ang tih pawh a hlauhawm ta a nih hi.
Pu Lal Thanhawla (Ex- CM) kha chuan Mizo mipuite tana rotling siam hram hram a tum thin a. Tuna hmun hrang hranga Mizoram House kan neih te pawh hi ani Chief Minister a nih laia kan neih vek kha a ni ti ila a sual tam lo ang. Lengpui Airport siam kan tum lai khan Pu P.C Bawihtluanga kan Revenue Minister niin, Pu Liansuama kha G.A.D Minster a ni a. Anni pahnih kha Lengpui Airport siam kan tumna a ram neitu te lo hre veka an ram airport siamna tura dil tura tih an ni a. Kan politician zinga an ram pe ka la hriat reng te chu Pu Lal Thanhawla, Pu R. Zamawia leh Pu Sainghaka te an ni. Tin, officer an ram pe ka la hriat reng te pawh Pu M. Lalmanzuala, IAS, Dr. Selbuanga leh Pu Hauthuama te an ni. Hetianga an ram sawrkara an rawn pek hian an ram man chu pek an ni lo anga, an thlai chin leh an thei chin te man erawh chu chhut chhuah sak a pek a ni ang tih hriattir an ni a. Airport siam hnathawk tur hian BRTF hotu te rei fe kan dawr a, anni hian cheng vaibelchhe 70 in airport siam hna hi kan thawk zo thei ang an ti a. Hetih lai hian kan PWD hotute pawhin Airport siam hna hi thawh an lo in huam ve a. Chutichuan Airport siam hna chu Mizoram PWD kutah kan dah ta a ni. Hetia PWD kuta kan dah hian airport siam nan hian Cheng Vaibelchhe 100 chuang kan sengin ka hria.
Hetiang hian sum tam tak sengin Lengpui Airport siam hna chu kan thawk zo thei ta a. Airport kan neih hnu hian Kolkata te, Delhi ah te, Guwahati-ah te, Shillong-ah te, Imphal-ah te kan thlawk ve zung zung ta a, a lawmawm hle. Delhi atangin Lengpui pawh darkar 2 leh minute 10 ah kan thleng thei ta mai a ni!!
Hetianga harsa taka kan neih kan airport neih chhun hi IAF kuta hlan a tha a ka rin lohna chhan te chu hengte hi an ni :
• Thuampui Helipad pawh saw hmanah chuan sipai ho nen kan hmang tawm thei a nih kha. Tunah erawh chuan sipai ho in civil tan hman an phal ta lo a. Union Minister-te Delhi atanga lo kalte pawh khilaiah khian kan tum tir thei ta lo, Rajiv Gandhi Stadium bul lamah kan tum tir a ngai ta a ni. Sipai kuta thil kan hlan chu Aizawl khawpui atangin Assam Rifle ho pawh kan chhuah tir a harsa ta hle a nih hi.
• Lengpui Airport hi sipai kutah hlan ni ta se, Indona a lo awm chuan kan hmelma ten target hmasaah an rawn hmang ngei bawk ang. Hengte avang hian IAF kuta Lengpui airport hlan hi a him tawk ka ring lo.
Mizoram NGO-te intelkhawmna, NGO Coordination Committee-in IAF kuta Lengpui Airport hlan an remtih loh thu August ni 9, 2023-a an puan tawh hnu leh MNF leh Congress party-te’n IAF kuta hlan an duh loh thu an puan tawh hnua ZPM sawrkarin IAF kuta hlan tuma hma an la la zui zel hi chu hriatthiam a harsa tawh khawp mai! Lengpui Airport siam lai khan ZPM hi party ang pawha a la pian loh vang a ni ang em le?
- C.L. Ruala