Tourist-te hmangin hnathawh tur siam ila, sum i la lut ang aw

Tourism chungchang hi a thara inhrilh vak kan ngai lo ve. Kan state sorkarah pawh hmun pawimawh changin department pakhat, budget pawh a hranpa ngat a dah a ni. Ram tam takah tourism hian GDP-ah hmun pawimawh a chang chho zel a, India ram GDP-ah pawh kum 2018 khan 9.2% (US $ 240 billion) lai thawk chhuakin, India ram pumpuia hna (job) maktaduai 42.673 lai a siam a; India rama hna awm zawngzawng aṭanga 8.1% lai a tling. Tamil Nadu, Maharashtra leh Uttar Pradesh te hian a state ang zawng chuan tlawhtu an ngah laiin, khawpui ang zawng chuan Delhi, Mumbai, Chennai leh Jaipur ten tlawhtu an ngah.

Zirchianna tam takah chuan khawvel pum huap zinmi (tourist) kan tihte hian Ssocial media leh information technology ṭhang chho zelah an zin duhna leh thil tawn duh an thlak nasa hle. Ram ropui tak tak tlawha thilsiam ropui tak tak, entir nan Eiffel Tower (Paris) emaw, Taj Mahal (Agra) te ai mah hian mi tam zawkin an la daidar loh hmun kilkhawr tlawh an intihhmuh nasa viau a. India ram leh khawvel hmun hrang hranga zinmite hian ram leilung leh sik leh sa danglam, culture danglam tak hmuh chak hi tam tak an awm a, sum leh pai sen pawh an huam hle.

Mizoram hian vanneihna em em kan nei. India ram state dangte aiin kan sik leh sa a nuam em em a. Kan ram tam zawk thing leh mau bawh chûk leh khâm leh tlang chhengchhe tak tak, ramsa leh sava te an hrâm chiah chiahna hmunte hi tourist tam tak hmuh leh tawn duh a ni a. Kan tribal ziarâng danglam tak pawh hi tourist hîp thei tur ṭha em em a ni. Mi changkangte leh tourist-te’n an ngainat em em paragliding tihna hmun tur India rama grade ṭha ber pawla an ngaih Dawngzawl ram, Serchhip district-ah kan nei bawk.

Eng thil nge tourist hîp turin kan buatsaih ang?

Mizorama Tourism Department hmalak tawhna ṭhenkhat thlir hian kan tum kan ṭhelh deuh a ang. Tourist-te hi sum leh paia buai lo, in leh lo pawh changkang tak tak nei leh hmun changkang tak tak aṭanga lo kal an ni tlangpui. Anmahni pawhin an hmuh ṭhan leh tawn fo, western style-a in sak nalh tak te, swimming pool leh picnic spot changkang tak takte hi chu an hmuh ṭhan leh neih ve a ni. Mizoramin tourist-te kan lo hlui tur chu tribal culture (hnam lâm, zai, etc), kan tribal chaw (food) leh chawlhna tur Mizo typical village (Zo khua) te a ni ang.

Khawi hmunahte nge tourist-te hahchawlhna hmun tur chu kan din tak ang?

Tun dinhmunah chuan Mizorama tourism hmasawnna atan hian hmun pathum–Reiek tlang, Serlui Hydel Project kam leh Serchhip Dawngzawl ram te hi thlan chhin phawt ni se. Heng hmunahte hian Mizo typical village a awm vek an ga, Zopa in 30 ṭheuh siam chhin phawt ni se la. Heng hmunah hian a hnuai tarlan ang hian ruahmanna siam ni phawt se la:

1) Reiek tlang: Zo khua in 30 sak ni se la. In sakna bul hnai têah Mizo cultural show neihna tur platform cum kitchen changtlung tak, Zo tak si a awm ang a, zan tin cultural programme hman a ni ang.

2) Serlui Hydel Project kam: Zo khua in 30 tho awmin, cultural show neihna tur platform a awm ve bawk ang a. Zan tin emaw, kar khatah zan thumte Mizo modern culture night hman a ni ang a. Tuikhuahah water sport tihna hrang hrang leh lawngleng te, speed boat thlengin a awm ang.

3) Dawngzawl ram: Zo khua in 30 vel bawk awm se la. Mahse, he laia programme awm tur chu paragliding chauh a ni ang.

'Zopa in, a bang leh a chhuat dâp, a chung di, tapchhak leh Mizo pa ina awm tur ang awm vekah Mizo chaw eiin dâp chhuatah ngat zan han riak se la. Kan Mizo hnam lâm leh zai hrang hrangte chhimin Reiekah han châm se; water sport item hrang hrang leh Mizo modern culture program hrang hrang Serlui Hydel Project kamah nuam ti takin han cheng se la. Dawngzawl ramah paragliding hmangin han thlawk kual leh se la. Tourist tam tak, Mizoram lo tlawhtute tan an kumkhaw sawi a tling ngei ang le.

Engtin nge hma kan lak ṭan ang?

A pawimawh hmasa ber chu web publishing a ni. Kan ram mawi em em leh sik leh sa nuam, Zo khua atana kan cheibawl zawng zawng hi Silchar aṭanga London thlengin awlsam takin miin an hmu thei tur a ni. Zo khua tur Reiek tlang, Serlui Hydel Project kam leh Dawngzawl ram te kan buatsaih zawhah internet website changtlung leh rintlak, tunlai sumdawng lian tak tak business retail firm Amazon.com, Flipkart.com, etc. ten an neih ang hi kan siam tur a ni. Smart phone-a install theih turin Android leh iOS application install tur a awm bawk ang. Information kimchang, Mizoram hmun mawi ber ber thlalak leh kan Zo khaw din thlalak mawi tak tak te, video thlengin a en theih tur a ni.

A tawi zawngin han sawi ila; England aṭanga zinmi pakhatin kan website enin Mizoram tlawh a châk a. England aṭang khan kan Zo khua pathum a khawi in ber emaw ṭheuh kha payment-in booking a rawn ti vek ang a. Chu chuan Mizorama a cham chhunga a chaw eina zawng zawng man tur, Lengpui Airport-a temporary ILP lakna man tur, Lengpui Airport aṭanga a thlen duhna hmasa ber Zo khua a thlenna tur leh a cham chhunga a kal kualna tur motor changkang man a tel vek ang. Kan website hmingah hian 'Come2Zoram.com' tih a ni ang.

Mizoram tan eng nge a ṭangkaina ni ta ang?

1) Job creation: Tun dinhmuna kan ramin harsatna a tawh lian tak pakhat chu khawvel ram dang zawng zawng pawhin an buaipui 'unemployment problem' a ni. Keini state phei chuan business firm lian leh company lian kan nei lo va, sorkar hna hi innghahna tlak kan neih chhun a la ni. Kan ṭhalai tam tak foreign-ah chhiahhlawh turin an kal chhuak a; a vanduai deuh phei chuan inhlawhna ṭha pawh hmu lovin bawlhlawh bâwma mi chaw nawi paihte hial an chhar khawm a, hrehawm takin an inhlawh a ni. Kan ram tourism hi 'Come2Zoram.com' hmangin han inpho chhuak ila, mihring 150-200 vel tal chu mamawh tur chiang sa a ni. 'Come2Zoram.com' hian conveyance (motor vehicle) a khawih tel dawn chuan driver leh mechanic, etc nen staff ngai zat a la pung viau awm e.

2) Promotion of organic farming: Tourist-te tana ei tur kan buatsaih hian thil pawimawh hmasa ber chu an ei tur kan hluite a thianghlim em tih a ni. Ram changkang leh state changkang tak tak aṭanga lo kal turte hian chemical nena sawngbawl thlai leh sa an ei duh dawn lo tih chu a hriat sa mai awm e. Sorkar tharin kan ram loneitute chawikanna program a buatsaih chhoh mekte nen hian ṭangruala chhungkaw tam tak tan eizawnna tlak organic farming hmang hian kan siam thei ngei ang. Tun dinhmunah pawh mi tam tak chuan phai aṭanga lak luh tomato, zikhlum, hmarchapui, etc tlawm zawka lei ai chuan a leta to zawk Mizo greenhouse thar kan lei nasa em em tawh a ni.

3) Promotion of handloom industry in Mizoram: Tourist-te’n kan ram leilung an luh phat aṭanga an hmuh tur chu Mizo dress dik tak (kawrchei leh puanchei, etc)-a inchei receptionist leh office attendant nalh tak tak te, airport-a lo dawngsangtute an ni dawn a. Hetiang thoa inchei tour guide-te’n an tlawh duh hmasa ber an thlenpui hunah hetiang bawka inchei kan nula leh tlangvalte’n an han buaipui ang a; advertisement hranpa a ngai tawh dawn lo. Kan ram aṭanga haw dawnah chuan anmahni hâk tur emaw, an chhungte hâk tur eng emaw zah chu an order duh tlangpui tura ngaih a ni. Kan Mizo typical dress hi ram dang leh state dangah hmuh tur a awm ve loh avangin kan ngaih ngawt ai hian tourist-te’n an ngai hlu dawn. Kan handloom industry hi tihlen leh thuam ṭhat a ngaih ngei a rinawm a, sorkar tan revenue siamna ṭha tak leh thawktu tam zawk siamtu niin, ‘unemployment’ tikiamtu ṭha tak a ni ngei ang.

3) Promotion of talented artists in Mizoram: Kan state zîm têin kan intodelh leh eizawnna tlak tak tak si loa kum tin kan neih belh ṭeuh ṭeuh chu zaithiam, lamthiam, fashion model, musician, etc te an ni awm e. Mizote hian talent kan nei ṭha em em a, mahse, kan talent ṭhat anga sum lak luhna erawh kan nei si lo. Talent nei ṭha, mahni inenkawl nan leh thuamhnaw, etc atana sum tam tak sen ngai si, sum hmuhna nei mumal si lo tam tak kan neih belh reng ti ila kan sawi sual awm lo ve. Serlui hmuna kan Zo khuaah platform ropui tak, zaithiam te, musician te, lamthiam te, kan model nalh tak takte’n hlawh ṭha tak neiin an thiamthil leh talent an show thei tawh ang a. Chu chuan ṭhalai tam tak, lukhâwng nei si loa talent nei ṭha tak tak kan hai chhuahsakte tan a ṭha zawngin nghawng lian tak a nei ngei ang. 'Come2Zoram.com' hlawhtlin dan azirin eizawnna ṭha tak an lo nei ve thei dawn a ni.

4) Income from bamboo and thatching grass: Kan ram mau leh di, Mizoram original mai piah lamah sorkar programme hnuaia lo chin tawhte hi Zopa typical house sakna hmangrua ber tur a nih avangin an hlu hle dawn a. A sak nan mai ni lovin, thawm ṭhat ngai reng tawh tur a nih avangin sum chang thlai a lo ni tawh ang.

5. Income for the state sovernment: A chunga kan sawi tawh ang hian kawng tam takah kan sorkar tana revenue siamna tur kawng a inhawng dawn a. Sorkarin tourist-te aṭanga 'Come2Zoram.com' kaltlanga hlêp tam tak a neih theih dawn piah lamah hian handloom industry te, organic farming, etc ringawt aṭang pawh hian kan state sorkar chuan income head kan la neih ngai loh a neih belh nual ang. Hei hian kan state GDP pawh nasa taka a tihpun ngei theih beisei a ni.

Hengte hi a bul kan ṭan maia hlawkna lang thei tur a ni a, 'Come2Zoram.com' hlawhtlinna hian lukhâwng tam tak a nei chho ngei tura ngaih a ni. Mizo typical village siamna atana hmun duhawm tak tak kan la neih ho pawh cheibawl chhoh zel bakah, ramhnuai leh ransate tualchhaina Zawlnghak ram (Vankal bul) te, Phawngpui tlang te hi tree house hrang hrang siama tihchangtlun te, Reiek tlang leh Mawmrang tlang (Pawlrang bul) khamte mihring riah theih tura ker kuaka chei te, kan hydel project leh tuikhuah liante water sport hub siama tihhlut lehzualte leh, kan lui tuite humhalha tourist-te sangha manpui theihna tur khawpa kan chei chhoh zelte a la ngai hial awm e.

'Come2Zoram.com' chu engtia kalpui nge ṭha ber ang?

‘Come2Zoram.com’ hlawhtlin theihna tura thil pawimawh em em chu ṭhahnemngai leh neitu tak tak anga enkawlna tur management felfai a ni. Private firm enkawl emaw, public undertaking pawh ni se la, a enkawltu department kutah pawh awm se la, management hranin a awm a pawimawh tak zet. Kalphung thar, enkawlna ṭha bika enkawl a nih loh chuan kan ram tan a hnemhnânpui a nih theih loh a hlauhawm em em. Hemi tur hian a tui leh ṭha bikte lak khawm a, hnathawktu tam ber chu ṭhalai lehkhathiam, fit ṭha contract basis-a lak ni se a ṭha ber awm e.

Note: Ka thuziah hi kum 2018 daih tawha mi a ni a, kan sorkar leh mithiamte cho chhuah nana ka tih ve a ni. Thil tih theih loh leh harsa tak tak a awm nual mai thei e. Kum 2018-a sorkar thar kan neih khan Tourism Minister, etc. kha a copy ka pe ve a, an chhiar ta em ka hre lo. Engpawhnise, sorkar tharah mi ṭhenkhatin ngaihdan ṭha zawk an lo neih phahna a nih takin ka duhthusam suangtuahna hi kan phochhuak ve tawp a ni e. 

- Dza Ralte