Chawhmeh kharchhawngin khawpui min rawk

Ka ṭhianpa thil chinchang hre deuh chuan Aizawl bazara ṭhu ṭhinte hian loneitute aiin an hlep ṭha zawk a ni awm e. Chumi awmzia chu thosi leh vaihmite kara ni sen sa hnuaia hnathawk nileng ṭhinte aiin bazar hmun nuama thlai zuarte hian thlai aṭangin hlep an nei tam zawk. An chawhmeh hralhna man hi an lakna man aṭanga chhiar dawn chuan an hlawh (profit %) hi a sang zawk tihna a ni a, hei hi Aizawl khawpuia chengten "Chawhmeh man a to," an tih chhan tak hi niin a sawi.

Ka ṭhianpa hian a hre sual a nih pawhin a hre sual thuiin ka ring lo.

He system hi kan ram sorkar hian engtin nge a siksawi dawn? tih hi hun rei tak chu kan thlir tawh a, thil tih tum dan a nei lo hrim hrim a va han ang ta ve. MNF hunlai khan sorkar lamin mahni thlai tharte awmna tur hi khawpui bazar lunlaiah a siam lova, bazarah chuan khawpui nuho an ṭhu ṭhin a, an hlep pawh a ṭha.

Congress an sorkar ta a, a term hnihna an sorkar hnuah pawh bazar-a ṭhu chu a ngai vek an ni a, loneitu tak tak an ni lo.

Loneitu tam tak hi chuan nilenga bazara ṭhut ai chuan a hlawma pek hi an duh zawk ngei ang a, mahse a hlawma an pekte hian man to takin an zuar leh si a, a thartu aiin a khar chhawngtu (middle man) an hlawkna a sang ta si a, hei hi a tihreh dan in hre lo maw? Kharchhawn hi chu thil kalhmang pangngaiah kei chuan ka ngai a, kharchhawngte aia loneitute hlep (a percent-a chhutin) a tlem zawk tlat mai hian rilru a luah reng a si a, a tihdan thiam chuan rawtna siam se.

Mizoram University-a Economics leh Commerce lama Ph.D leh MA, M.Com rualte hian an tihdanglam theih loh chuan an zirna hi awmze nei lo a ni lek lo maw? tihte thlengin ka ngaihtuahna a vak vel a ni.