AADHAAR - SCHOLARSHIP HMELMA HI
India Sorkar chuan tun ṭum chu tribal scholarshiop hi aadhaar card tel lovin a dil theih loh an ti bur niin Mizo zirlai pawl, MSU chuan a tar lang a. Ministry of Minorities pawhin July 14 khan India rama zirlaite scholarship dilnaah Aadhaar card thil tel ngei tur tiin order a chhuah bawk niin tarlan a ni.
Kan hriat ṭheuh angin Aadhaar hi UPA-II rorel laia din a ni a, mi tam takin an duh lo. He Aadhaar hmang hian sorkar laipui hian an duh duhin an hmang sual ang tih an hlauh vang a ni. Chu bakah puanhnuaia kan thil thuhruk hriat an rawn tum thei dawn a, sorkar laipui chang ni lovin he Aadhaar siam tura company an chhawrte leh foreign company ṭhenkhatte pawhin mimal chanchin an rawn hre thei dawn bawk si a.
Hei vang hian Supreme Court-ah dilna theh lutin Aadhaar hi tihluih theih a ni lo, mimal fundamental right a bawhchhia a ni tiin an zualko a. Chipchiara hre duh chuan SC Writ Petition (Civil) No 494 of 2012 leh a dangte in en dawn nia.
Nikum August 11-a Supreme Court thu tihtluk, PDS leh cooking gas sem nan chauh hman theih a tih kha, MGNREGA leh pension schemes leh employees GP Fund leh PM’s Jan Dhan Youjna atan voluntary a hman a phal belh leh ta a. Supreme Court chuan chiang takin thutlukna final-a a siam hma chu purely voluntary basis-in hman zui a remti a. Aadhaar card scheme hi hman theihna dan la siam loh a nih bakah Parliament remtihna lak a la ni lo tih an sawi lang bawk.
Supreme Court hian hearing a neihnaah Sorkar Attorney General hnenah zawhna a zawt a: ‘Suppose we decide that Aadhaar is purely voluntary and any attempt to make it mandatory would be treated as contempt of court... are you ready to give an assurance or make a statement to this effect?” tiin. Ani chuan ‘aw’ tiin a chhang. Chu bakah tihian SC chuan a sawi chhuak leh a: “India khua leh tuiten an hmuh tur an hmuh theih nana Aadhaar kher hi a ngaih a ṭul lo” a ti. Sap ṭawngin: “The production of an Aadhar card will not be condition for obtaining any benefits due to a citizen.” Tin, Aadhaar card hi neih ngei ngei tur tihna a ni lo tih hi a zau thei ang berin chanchinbuah te, TV-ahte mipui hriatah puan darh tur a ni tih court hian sorkar a hrilh bawk.
Tuna a tawi zawnga kan han tar lan en hian MSU-in Mizoram sorkara an thil phut hi eng chiah nge ni ang aw a tih theih a. Sorkar chuan dan hremite a nei a, tih dan tur chu an hre mai ang a.
A reng reng thuah, Prime Minister Office (PMO) hi RTI dan anga information an dil, a bik takin PM zinna a a pawisa sen information an dil pawh an chhang duh ngai lo va. Modi a Prime Minister hnu hian ram hrang hrang a tlawh nasa a, India ram a rawn tlawh ve zeuh zeuh chauhin an sawi
ṭhin. Mipui pawisa heti em ema a hmang hi hriat tumin RTI danin information an dil ṭhin a, thehmeh ang hmak a ni zel a ni tiin Outlook chanchinbu hian a tar lang tawh. Tun thilah pawh hian Supreme Court thu hi a ngai pawimawh vak dawn lo mai ang tih a hlauhawm.
Phur takin kan nupain Aadhaar card a tih hmasak ber ṭum khan kan dil a, ka ṭhiannu chuan rang takin a hmu mai a. Kum hnih a hnaih tawh hnu pawhin ka la hmu lova. DC Office-a a siamtute hnena ka va zawh pawhin an chhui chhuak thei lo. Midang tam takin he buaina hi an tawng ve tih hriat hian min thlamuan chuang hlei lova.
Mi ṭhahnem ngai pawlten hmalak dan tur an hriat chian zawk theih nan he thu hi ka rawn ziak a ni e.
- S.L.Sailova