Pizawn/ puzawnte koh dan tur

Mizote hi Pizawn/ Puzawnte koh dan chungchangah kan ngaihdan a lo inang lo viau mai. Pizawn/ Puzawnte hi ka nu/ ka pa tia koh tur alawm tih leh ka pi/ ka pu tih zawk tur alawm tia inhnialna hi a awm reng a ni.

Hemi thuah hian kan Mizo pipute aṭanga kaihhruaina fel tak kan nei lo ni awm tak a ni. Mi ṭhenkhatin ka nu/ ka pa an ti a, ṭhenkhatin ka pi/ ka pu an ti. Pizawn/ puzawnte koh dan tur tak kan chian loh avanga pizawn/ puzawnte ko hreh ta pawh hi kan awm nualin a rinawm.

Hetiang a nih avang hian Mizoram Upa Pawl pawhin pizawn/ puzawnte koh dan tur tichiang turin an inkhawmpui lianah pawh sawi-hona an nei niin ka hria a. He thil hi thil pawimawh tak a ni a, fimkhur pawh a ngai viau.

Thil pawimawh tak chu kan in koh dan turah hian makpa leh pizawn/ puzawnten inthlunzawmna nghet tak an neih theihna tur, an inngainat theih dan ber tura in kohtir kha a ṭha berin a rinawm. Hmanlai tih dan hriat theih hla ber chhuichhuaha an inkohdan ang khera inkoh tir tum kha a ṭha ber chuangin a rinawm lo a. Makpa leh pizawn/ puzawnte inpawhna ṭha ber tur ang zawn kha a fuh berin a rinawm.

Ka lo hriat ve dan mai maiah chuan tunlai hi chuan mi tam ber hian pizawn/ puzawnte hi 'ka nu/ ka pa' tiin an ko tlangpui - an inlaichinna ṭhat theih dan tur bera an hriat hmangin an inko niin ka hria. A nupuiin ka nu/ ka pa tia a koh laia a pasalin ka pi/ ka pu a lo tih leh daih si chuan nupa ni si kha mi hrang angin an lang lo thei lo a. Nu leh pa ber kha an nupain koh dan inanga ka nu/ ka pa tia an koh dun khan an lang pumkhat zawk a ni.

Makpa in a nupuia nu leh pa chu ka pi/ ka pu tiin ko ta ang sela, a fate pawhin ka pi/ ka pu an ti ve dawn bawk sia. Faten ka pi/ ka pu an tih laia pa berin ka pi/ ka pu lo tih ve ai chuan ka nu/ ka pa tia koh mai a fuh zawkin a rinawm.

Pu C. Vanlallawma, Hrangbana College-in Vanglaini Dt. 26.8.2014 a a ziak te, Pu R. Chhawntluanga, Chhawrtuiin Vanglaini 23.9.2014 a a ziak te, MUP General Assembly-in rorelnaa an sawi-hona tlangpui Pu Vanlalchhunga, Venghnuaiin MUP Tlangau, July 2016 a a rawn tarlante han chhiar pawh hian pizawn/ puzawnte hi ka nu/ ka pa tia in koh nana hman hi a fuh hmel khawp mai.

Chuvangin, hman-lai aṭanga kan lo inkoh ṭhin dan a ni emaw ni lo emaw lam chhut loin pizawn/ puzawn te leh makpaten rilru hmunkhat an puta an lo inpumkhat theih zawk nan makpate hian pizawn/ puzawnte hi ka nu/ ka pa tia an koh mai hi a ṭhain a dik ber mai awm e.

- Sanga Ralte, Luangmual Vtg.