SORKAR HNA DUH SI, THAWK ṬHA PEIH SI LO

Kan rama sorkar hnathawk 50% vel hi chuan tuina tak tak nei lova hna hi an thawh ka ring. Hei hi a chhan bul ber chu kan rilru sukthlek dik tawk loh vang a ni.

Sorkar hna chauh hi hna a ni lo tih kan sawi ṭhin. Mahse, sorkar hna aia innghahna tlak dang hi kan ramah hian a tam si lova, chumi avang chuan sorkar hna awm ang ang hi a chuh takmeuhin kan inchuh ta ṭhin a nih hi.

Sorkar hna duh leh beiseiin kan dil a. Sorkar lai party unit, block leh district level lehkha nen kan ti a, bialtu MLA hriatpuina lehkha nen, a theih ang angin kan bei ṭhin. Kan han hmu ta cheng a, kan hmuhna hmunah pawh awm ṭha leh peih si lovin, insawn chhuah dan kan ngaihtuah leh a. Heti hrim hrim chuan thingtlang lam mite tan hian hmasawnna tak hmuh hi chu a har hle dawn a ni.

Political appointment vanga sorkar hna thawk ho hi, eiru hnawk kan tih ang chiah hian an hnawk. Sorkarin a dahna hmuhah pawh awm duh lovin, hmun nuam leh hautak lo zawka awm dan an kherh leh a, sorkar pawhin a tih ngaihna tak a hre lo! A chhan chu, duh taka political fitness vanga an lak an ni miau si a.

Aw le, kan ramah hian tuina tak tak nei lo sorkar hnathawk an tam chhan te hi, kan ram dinhmun chhiat vang te pawh a ni ve bawk. Sorkar hna chauh hi hnaah ngai lovin, hna dang pawh hi hna tak nia kan ngaih hun te, hna dang hian chhungkaw tan awmzia a neih tak tak hunah kan kalphung hi chu a fuh chho maiin ka ring.

- Biaksiamtluanga