Aizawl-in fai ber lawmman a dawng
Vanglaini 11 August 2016 chhuak-ah ‘Aizawl-in India hmarchhak biala khaw-pui fai ber lawm-man a dawng’ tih ka lo chhiar a, ka lawm hle mai.
Ka article Vanglaini ni 20 January 2016 a mi ‘Aizawl khawpui a fai sawt hle’ tih te kha min thlir lettir a. Rei lo te chhung chauh
ṭan kan han lak ve hlek pawh a, India hmar chhak khawpui zawng zawng zinga fai ber kan nih theih chuan tun aia nasa deuha ṭan kan lak chuan Singapore kan el ve pha mai turah ngai ila, ava nuam dawn em!
Hetiang a nih lai hian mi ṭhenkhat hnawmpaih motora paih loa mahni tuk-verh aṭanga paih ching kan la awm hi a pawi khawp mai. Kan Aizawl khawpui fai leh fai loh rawn endiktute hian kan kawmthlang lam en lovin kan kawt lam chauh an en vanga lawmman pakhatna dawng thei kan nih ring mi engemaw zat an awm. Chu chu a dik thei mai thei. An endik leh hunah chuan uluk leh zuala an en ringin theihtawp chhuah ila.
Dumping ground-in kawngpui a hnaih zel: Kan khawpui a fai tak viau lai hian kan khawpui aṭanga kan thiar chhuah bawlhhlawh kan sawngbawl dan erawh hi chu kan AMC-te hian enzui hram se ka va ti em? Tun hma zawng kha chuan hnawm paihna (dumping ground) hi Tuirial kawngah pakhat kan nei ṭhin a. Hmu phak lo mah ila, a kang khu rimin min ur erawh a na thei hle.
Tunah chuan he hnawmpaihna (dumping ground) hian kawng a rawn hnaih ta hle mai. Kawngpui aṭangin a lang ta uar mai a; Chu bakah a penna lai kawngpui chu a ṭawp hle. Hnawm paih tur atanga thil ṭha zawngtuten eizawnna an lo neih phah chuan a lawmawm kan ti mai thei a, amaherawhchu kawngpui ti tenawm lutuk a, kan Aizawl khawpui hnawm motor kawngpuia in zam ta nuaih mai hi chu ruahmanna fel zawk siam a ngai a ni.
Dumping ground-in Zemabawk a rawn hnaih ta: Dumping ground hi a thar kan siam belh ta em ni tih mai tur a ni ta. Zemabawk
aṭanga Tuirial pana i tlan chuan hnawm paihna hmun thar niawm tak pali lai i hmu thla ang. Hengah te hian hnawm paih motor ding leh an hnawm an hai laite i hmu bawk ang. Tunah chuan heng hnawm haina te hian Zemabawk a rawn hnaih ta hle. Heng hmunah te hian Aizawl khawpui hnawm an phurh te chu an thlauh zel zul mai a. Khawpui chhung kan thenfai lai hian kan kawngpui dung pawh kan thlir tel a pawimawh.
Kan hnawm paih leh khawpui lo fai ta hian a chengte tan hriselna a thlen ngei tura kan ngaih laiin, kawngpui dung an tiṭawp a, a rim a chhe em em a, kawngpui an tinâl a; lirthei kal velte tana hlauhawm khawp a ni ta.
Thuneituten rua-hmanna fel zawk an siam vat loh chuan Zemabawk khaw daiah hnawm kan paih thei mai dawn. AMC ten
ṭan lak a ngai e.
- Commissioner Lalkiamlova, Tuikual South