Power kan intodelh loh chhan politician-te
Power pawimawh-zia chu sawi nawn a ngai lova, kan intodelh loh chhan tawite han ziah ve ka duh a.
UT aṭangin ram hruaituten hma chu an la ve ṭhin a, mumal deuha hma latu chu Brig. T. Sailo kha a ni. Ani khan tui lak, N. Highway, chaw a intodelh, rel kawng, thlawhna ṭumhmun, power lam te kha a sawi uar a. Power bikah phei chuan Serlui A a khuap mai a, reiloteah a zo mai.
Bairabi Hydel Project a buaipui leh a, ni 7.1.1982 khan Central Minister ABA Ghani Khan Choudhurry-a lungphum a phum tir a. Hei hian a entir chu he Project hi a thawh theih, a thawh tlak tihna a ni. Lungphum hma hian cheng nuai tel senga enfiah a ngai a, nasa takin hma a la a ni.
Kum 1984-ah PC Sorkar a tla a, Congress a lo Sorkar ve khan he tuikhuah hi anmahni bul ṭan a nih loh avang leh Brig. T. Sailo hmingṭhat an hlauh avangin an chhunzawm duh lova. Nuihza siam nan an hmang a, an hotute phei chuan “Ṭhenphunga dam lai lung ka phun dawn lo” an ti a. Hei hian Power a kan intodelh loh chhan Congress Politician te vang a ni tih chu a tichiang.
Kum 1984-a Cong-ress Sorkar khan Bairabi Hydel Project kha chhunzawm sela chuan kan hman khawp MW 140 chu 1990-ah kan nei daih tawh ang. Ṭhenphunga damlai lung ni lovin anmahni dam lai lungphunin hmingṭhat an hlawh kumkhua ang a, tun hnua sawi leh pawh nuam an ti hle ang. Mahse, a letlingin power duh lo, hnam hmasawnna daltu nih an thlang zawk si a ni.
Tunlai, 2008 aṭanga kan ram politician te hmalak dan hi chu a naran lutuk a, lui 9 laiah MoU an sign a, an duh tawk mai a. Lui lian deuh pakhat MW 400 (lung reng) chhuak thei tur khuap nalh sela, tih tak takin bei sela kan intodelh mai ang. Mipui bum nana MoU kan sign tih leh ringawt ṭhin hi chu Politician te hian sim tawh sela.
A taka thil an tih chuan mahni insawi-mawi ngai lovin mipui-in an fak em em ang.
Engineer te Official te chu Politician-te thutlukna ṭha taka bawhzuitu an ni mai.
Electric Power hi mipuiten mamawh lovin kan inhria a, a policy leh amah Pu Ṭhena chawpin kan chhang paih tawp zawk? Mipuiin power hi mamawh lova kan inhriat chuan tuna Rs. VBC 200/- State dangte eng lei nana kum tina kan hman pawh hi ti tawp ila, thimah awm leh ang u hmiang. He VBC 200 hi thil dangah hmang hlauh ila.
Power ṭulzia hi R. Thangkanglova leh Rualkhuma Hmar hian an ziak ṭhin a, mahse mipui hian pip e pup e kan ti lo hi kan fin hle vang nge kan at hle vang le?
- Zairema Sailo