Khawpui laili-ah ngawlvei leh KS an tam

Zing khawvar hma deuh hian kan veng leh Sikulpuikawn inkar hi kein ka kal ve ṭhin a. Zan lam boruak chu ka hmu ngai lem lo a, zingkara Canteen Kual leh Aizawl Lei inkar boruak hi veiawm ka ti hle mai.

Canteen Kual bâwr vel hi a thim ruih zel mai si a. Kan khawpui laili laia ruihhlo ngawlvei, kal pawh kal ṭha thei lo, a ṭhen phei chu kawng sir a lo ṭhu mu leh hmun rem deuh laia bawlhhlawh hâla lo ai hmuh tur an va tam tak em.

Heng ruihhlo ngawlveite hian KS tam tak an chhawm tel leh zel bawk si a. Aizawl khawpui laili lai hi an tihzahawm loh bakah, zing karah hian hmeichhia mahni chauha tei chhuah a him lo chho ang tih a hlauhawm hle mai.

Tûk khat phei chu Canteen Kuala over bridge-ah hian mipa naupang kum 3 mi vel hian a pa leh a ṭhianpa No.4-a an inchiu lai an bul a dingin a lo thlir reng a, rilru a khawih duh ngei mai. Hetianga ualau taka ruihhlo hmanga lo inchiute hi han hauh deuh châng chu nei mah ila, hauh vek sen an ni lo.

Kumin January ni 6 aṭanga chawlhkar hnih chhung vel chu zinga kea ka kala ka chhiar ruk theih chinah an tam laiin tuk khatah ruihhlo ngawlvei leh KS hi mi 35 vel chhiar theih châng ka nei a; tlem duak tûk a awm a, mi 15 vel chauh chhiar theih châng ka nei bawk.

Transport department office kawt leh Vanapa Hall kawt phei vel hi MST bus chhuahna hmun a ni a, khualzin mi tam tak an awm a, chung khualzin ho karah chuan ruihhlo ngawlvei leh KS an lo ther ve fur bawk a. Aizawl Lei hnuai pawh saw an la hmang ṭangkai hle tih ka hmu. Tun hma kum 20 dawn kal taa Aizawl khawpui laili laia proxyvon ngawlvei leh zuar tei huai huai lai kha a ang leh ṭan ni berin a lang.

Heng ka thil hmuh ṭhinte hi mi dang tam tak pawhin an hmuh ve ka ring a, tu mah han dem leh han kawh bik ka nei lo. Kohhran hrang hrang, NGO, sawrkar leh mimal tin hian mutmawh hnarmawha kan neih a va hun em. Zan lama duty leh kohhran thalai, heng ruihhlo ngaite tana pên chhuak pawh kan awm nual ka ring; mahse, a la tâwk lo a ni.

- Joseph Lnta, Dawrpui