TUIPUIRAL TOURNAMENT THLIRLETNA

Mizorama tournament upa ber, Tuipuiral Annual Sports Meet neih zawh tak kha a vawi 52-na a ni a, Samthang khuain hneh takin an thleng. Kum danga inelna item tel ngai lo–boxing, archery leh javelin throw-te belh a ni.

Kumin tournament-ah hian Sports Minister hmalaknain kum 2036-a India-in Olympics thlen a tum tinzawnna nen tournament buatsaihtu TG&SA leh Mizoram sawrkar hnuaia SYS Department leh MSSC te an thawk dun. He thawh dunnaah hian tournament-a inel ṭhinna pangngai football leh volleyball te bakah, boxing leh archery te belh ni se tih a ni a; heng item-a senso ṭulte hi Minister hova sawrkar ngaihtuah a ni nghe nghe. He thil thar hian Tuipuiral tournament awmze nei zawka kalna kawngah a pui thui thei hlein a rinawm a, nachang hria Minister leh a kaihhnawih department-te an fakawm. Inelna senso bakah tournament hmain thlan bik khaw ṭhenkhatah inzirna (training) kalpui a ni a, a concern sport discipline-a zirtirtu ṭha tak tak rawih an ni. Engtik ni-ah emaw chuan nghawng ṭha a la nei ngei ang a, Tuipuiral nula leh tlangvalte hi khawvela inelna lian leh ropui ber, Olympics-ah an la inlan suau suau lo vang tih tu nge sawi thei. Buaipuitute an fakawm e.

Javelin throw bik hi Pu Lalruata Sailo (1938-2020), Samthang tlangval chhuanawm hriatreng nana belh bawk niin ka hria a. Tuipuiral tlangval chhuantawlawl, kum 1966-a Bangalore khawpuia neih National Games-a javelin throw champion leh record holder hi chawimawi a phu a, ngaihtuahna hmangtu leh insengsote an fakawm.

Football leh volleyball buatsaihna atana senso leh ṭul dang atana sum sen tam ber hi chu bialtu MLA ngaihtuah a ni ṭhin a, kumin pawh hian a nih ka ring a. Tournament chhum lo chat lova a kal theih nana bialtu MLA apiangte an inhawng ṭhin hi a lawmawm.

TUN TOURNAMENT ZET CHU

Kum dang zawng aiin hlut a hlawh emaw a tih theih a, media khawvel a nih tawh miau avangin a hmuna en thei lo tan pawh kan ralkhat thlir ve thei ta a, thlirtu pawh an ṭhahnem ṭhin hle. Heta lang chiang erawh Mizorama tournament upa ber, rambuai leh hripui len lai pawha khél lova neih ṭhinah media partner kan la nei ṭha tawk lo va (kan nei lo hial zawk mai thei); a hmuna kal thei lo hluttu tam takte hrilhhai châng leh duhkhawp loh a tam hle. Kum tharah chuan ruahmanna ṭha zawk awm thei tawh se a duhawm ngawt mai. Kuminah mimal ṭhahnemngaiin an live a, hmun hrang hrang aṭangin live kan en theih phah a, a hlu hle mai.

Kum dang zawng aiin inelna a tam a, inel ṭhinna pangngai bakah Vision Olympics 2036 leh Pu Lalruata Sailo pual inelnate buatsaih a ni. Hmeichhe volleyball erawh kuminah kan hmu lo thung. Inelna zawng zawng a hlawhtling thawkhatin a hriat a, inelna belh tharte hlut kawngah duhthu la sam famkim lo mah se, hunin a herpui ang a, tun aia hlut leh hlawkpui a ni chho thuai turah ka'n ngai thung ngawt a.

THLENGTU KHUA SAMTHANG

A thlengtu khua Samthang inbuatsaihna a ṭha tih leh mikhual an dâwl zo hle tih tlangkam titi aṭangin ka lo hria a, Samthang nge nge tiin ka fak e. Khaw hmunhma nuam, zo vawt raih, hmun lailia awm a ni bawk a, tu khaw tan pawh pan a awlsam vang nge ni teh rêng, mikhual an tam hmel hle. Inkhel tinah entu an tlim hmur thei reng a, khati zat mihring dâwl zo reng tur chuan inbuatsaihna ṭha a ṭul a, khaw neitute tan zau a ngaiin, kawng tam taka tlawmngaih leh inpek a ṭul ang. Tournament hun chhung a rei a, ei leh in leh mutbu thu hlaah te, eizawnna ngaihthah luiha tha thlawn sèn leh ṭhulh a tam hle dawn a, mi hrang hrang pungkhawmna chu mizia leh nihphung inang lo pui pui an ni hlawm ngei dawn si a; chuti chungin ka hriat phak chin chu fakna hlir a ni. Samthang nge nge, malsawm dawng khawtlang lo ni rawh u.

VOLLEYBALL LEH FOOTBALL BIK KHA

Volleyball-ah back to back champion Khuangleng kan hmu a, Tuipuiral volleyball champion vawi 2 an nihna leh back to back champion inrual kha a mawi a, a tipui zual. Final-a ennawm tur bera mipui beisei, tun hnaia volleyball thiam bera ngaih Khuangleng leh Tuipuiral volleyball chanchina palian ber, vawi 13 champion tawh Bungzung final tlat kha–dream final a ni hawt a lawm le. An han khel a, ṭan bik nei lem lo, tournament hluttute mit aṭang chuan final duhthusam a ni. Set an inlak chhawk zak zak a, deciding match-ah inthlau lo tê-in Khuangleng an champion. Back to back champion kan hmu a, a tuka football final khelh hmabak nei zawk an chak miau avangin double champion beiseina nen football final a ti hot nghal em em ringawtte kha... kumin zet zawng a pui a ni.

FOOTBALL NGE NGE, A LO FUTBAWL BER MAI

Final-ah champion ṭhang, tun hnai ngawt pawha kum 3 final lut záwn thei, final-a win rate nei ṭha em em, Tuipuiral power house kan tihfiam fo Khuangleng leh vawi khat tê mah la champion lo Vaphai an intawng.

History aṭang ngawta teh chuan mi nawlpuiin Khuangleng chak turin an ring hial ang. 'Mahse' a awm, Vaphai game tin en a, an khel lo chîk tan champion turin history a pawimawh ber lo va, tuna an team dinhmun a pawimawh tih a fiah. Final ni a thleng a, champion tum ruh, trophy nena haw ngei ngei tum, zan mumanga mang tawh, zing thawh ruala thawhpui, khaw nâwta nomawi lawm tura inbuatsaihte game chu kan hmu ta. An phu ang ngeiin Phai khawpui an champion ta a nih kha maw. An khaw chanchina a vawi khat nan Tuipuiral champion an ni a, champion hming ziahna bu-ah an hming a chuang reng tawh ang.

- MKa