Keini leh online gaming

Online shopping lar vanglai, sumdawngte sumdawnna inthlakthleng hunlai, ṭhen­khat tana hlawkna, ṭhenkhat tana tlakrana boruakin Zoram a zem laiin leh khawvel thiamnain a hrin chhoh, Mizotena kan hmelhriat ṭan mek 'online dating' ṭhangtharten an buaipui laiin 'online gaming' chuan ṭhalaite mai ni lo nu leh pate thlengin nghet takin zung a lo kai reng tawh mai.

Chhungkaw tam tak buaipui leh nu leh pa tam tak timangangtu pakhat a nih miau avangin he thil awmzia hi kan hriat fiah ṭheuh a ngai awm e. Online gaming chu engnge? Online gaming chu internet kaltlanga computer hmanga game mipakhat aia tamin an khelhna hi a ni. Online gaming chu mi pahnih game khelh dunna aṭangin a inṭan a. Hetianga mi pahnih chauhva khelh chi 'multiplayer games' hi kum 1969 aṭang khan an lo khel ṭan daih tawh a. Cable hmanga computer thlunzawma khelh ṭhin a ni.

Kum 1970 aṭangin hmelhriat a hlawh ṭan a, hemi kum vek hian 'internet' khawvelin a hre ṭan bawk. Kum 1980-ah meuh chuan khawvel huapin online gaming hi a lar tawh a. Kum 1990 hnulama internet hmanlar a nih tak tak hnuin online gaming hi khawi hmunah pawh a darh chak hle a ni.

Mihring khawsakphung leh nunphunga thil thleng entawna siam a nih miau avangin leh ṭhalaite lawm zawng taka cheibawl a nih avangin heng game-te hian 'zun' an ngah hle a, 'addict' a awl em em mai bawk a ni. A nihna takah chuan thiam tak leh zei taka sumdawng leh mithiamten kan sum leh hun min ruksakna a ni. Chu thil chu hre lovin keini ṭhangtharte hian game chhuak thar awmna apiangah kan la awn dual dual a, kan ṭhangharh a hun hle mai. Heng game zuna uai tam zawk hi nu leh pate chawmhlawm ṭhalaite bawk kan ni leh si. Khawchhak serial film-in chhungkaw nunphung a tihbuai tluk zetin online gaming hian chhungkaw tam tak a tibuai ve tho mai le.

Mizoramah pawh a ni telin a kum telin game khel kan pung ta tial tial a, ṭhalai chang ni lo nu leh pa tam takin kan buaipui ru viau mai. Mi tam zawkin an buaipui hút hút laia a mik a mak hre lova lo uipui tuilian thlir reng zawng a ṭha lo e. Thuthlukna ṭha tak leh ngaihdan mumal tak heng game chungchanga i siam theih nan bengvarna ka han rawlruk ang che.

Game chi hrang hrangte hian khelhdan hrang ṭheuh an nei a, rimawi (music) 'genre' hrang hrang a awm ang hian game-ah pawh hian 'category' chi hrang hrang a awm ve bawk a ni. Chungte chu kan hriat atan han thailang zawr zawr ila. Action, Adventure, Arcade, Board, Card, Casino, Casual, Educational, Family, Music, Puzzle, Racing, Role Playing, Simulation, Sports, Strategy, Trivia, Word te an ni. Heng zingah hian 'strategy' game hian khelh a hlawh bik em em a, kan hriatthiam lehzual nan chung game helaia kan khelh ṭhin hming tlem azawng chu han tarlang leh ila. DOTA, DOTA II, WOW, LEAGUE OF LEGEND kan sawi seng kher lo ang. Thiamnate sang chho zelin khawi hmun aṭang pawhin online game chu mobile phone kaltlangin kan khel leh thei ta zel bawk a.

Chutia game kan khel ta sa sa, kan luhchilh ta rau rau a nih chuan khawvela hming lang larh khawpin khel ila, mi ramah te chuan game khelh thiam vanga hausa ta sawi turte pawh an awm a nia. Game khela eizawngte pawh an awm ve leh nawk hlawm bawk a, hengte hi online game khel ṭhinte an ni tlangpui. Heng games khelh ngaina ram South Korea leh Japan te hian sponsore-tu lian tak tak neiin kum khatah US dollar 100,000 an la lut ṭhin a ni. USA-ah khuan kum tin Major League gaming-ah game khel ṭhinte US dollar 250,000 contract a sign pui ṭhin bawk a ni.

Game khel ṭhinte thliarhran dan han tarlang leh ila. Pakhatna - Casual gamer. Khel ve mai mai, khel satliah, hun awl hnawhkhat nana khelho hi kan ti thei ang chu. Pahnihna - Core gamer; Mid-core gamer ti te pawn an sawi ṭhin. Khel kual deuh dun, thiam tak tak nei lo, thiam loh tak tak nei lo kan tih ang chi hi an ni. Pathumna - Hardcore gamer an awm leh a, hengho hi chu rilru leh tih tak zeta khel chin an ni. Action game an khel nasa a, an ṭang thei hle bawk. Game chhuak thar apiang an nei deuh zel. Palina - Pro gamer. Game awmzia zirchiang a, thiam tak leh nal taka khel ṭhin an ni. Hengho hi inelnaah te pawh an chhuak ṭhin a, sum an la lut hnem thei hle. Heng bakah hian gamer-hote nih duh loh ber category a awm veleh a, chu chu 'Noob' a ni.

Noob kan tihte hian eng game pawh khel se, a thiam lo pawlah an ṭang zel a, a chak lo pawl, a nep pawl sawi nana hman ṭhin a ni. Gamer-in Noob a tih che chuan haw hle ringawt mai rawh!

Whatsapp emaw facebook emaw phone khawih nasat avanga mit ṭha lo an tam tluk zetin game khelh avanga mit sawisel an tam phah a, mitin a tuar hle bawk a ni. Online game hian ei leh in chenin a nghawng a, duh huna ei a, duh huna mu ta mai an tam phah. Mithiamte chuan hetiang game khel avanga thau (over-weight) an tam phah an ti nghe nghe. Game khelh ṭhat lohna chauh tarlan hi a fuh ber awm lo e, ṭhatna pawh a nei ve nual tho mai. Tunlai khawvel changkang tawh takah hian rualpawl nan pawh a ṭha fu mai. Mi titi zawmpui phak loh fo hi a fuh ber tlat lo. Game khelh hian nasa takin mihring rilru a sawizawi a, rilru a tichakin ruahmanna ṭha tak tak ngaihtuah chhuah nan a ṭangkai viau mai.

Online game emaw phone emaw ṭha­laitena an khawih/ hman nasat chhan leh inlama tawmim tlat an tam nachhan hi han chhut cheuh cheuh chuan zalen taka lenkhawthawnna tur leh nuam titak hun hmanna tur an neih loh vang a ni deuh ber mai awm e. Ṭhangthar nula/tlangvalte hian zalen taka lenna, khawsak theihna tualzawl zau an mamawh a, chutih kawngah chuan thil chinchang hria, thuneitute leh mithiamte mawhphurna a sang hlein a rinawm.

Online Game pakhat 'Clash of Clan' ah chuan sipaite chu khawpui chhungah dah lovin khaw pawnah an dah a, chutiang chiah chuan kan chenna khawvel ram tinrengah pawh hian sipaite chu khaw pawnah an inkhulh hrang ṭhin a lo ni. Mahse keini sipai ve thungte chuan khawpui lailum an luah tlat mai le! Nu leh pa tam tak tena an hlamchhiah, naupang ṭhenkhatten sikul tlanbo phah nana an hman fo ṭhin, mi tam zawkin eng vak maha kan ngaih loh aṭang ringawt pawh hian thil tam tak zir tur a lo awm reng dawn a lo nih hi.