Aadhaar Card - a pawimawh tehreng nen!

India sorkarin identity proof-na tura a buatsaih UDI/ Aadhaar Card chu Mizo­ramah pawh kalpui a ni ve ta. Chhungkuaa lak tur an tih avangin innghakkhawmin kan chhungkua pawhin thla kan la ve a, information mike-ah Aadhaar Card a lam theih an tih chuan ka chhungte an zuk kal a.

Hall-ah chuan dawhkan pangaah YMA section inṭhen danin card chu an lo dah a, an lo bawr tuau tuau hlawm a. Card hmute chuan an hawpui nghal zel a, tuman signature an pe lo. Engmah chhinchhiah a ni lo. Lehkha pawimawh la chhuaktuin signature a pe lo hi a felhlel hle.

Ka chhungte chuan keima card chu an hmu lo ta bik a, dawhkan dang pawh an hai vek a ni. Ṭhiante bula ka sawi chuan midang hmu lo pawh an awm nual thu ka hre ta a. Card sem dan a mumal loh chhante pawh ka hre leh ta zel a.

Aadhaar card buaipuitute chuan kan veng Local Council chu card semchhuak turin an rawn pun a; amaherawhchu a buaipuitute hian contract-a thawk an ni tih hriain anmahni contractor ngeite hian sem se a ti.

Ni khat chu dakah address mumal awm loin parcel lian a rawn thleng a, dawr pakhatah an dah ta ringawt a. Parcel ṭet aṭang chuan card lo lawr chu tu emawin a phawi a, tichuan midang pawhin an rawn phawi ve ta sup sup a. YMA hruaitute chuan a dik dawn lo tih hriain, a bo loh nan, tlawmngaih chhuahin information mike-ah an puang ta ringawt a. Card-te chu YMA section awm danin an thliar a, mahni card zawn chawp turin an buatsaih ta ringawt a ni. Card lam loh chu a bo loh nan VDP kutah dah chhunzawm a ni.

Veng ṭhenawma awmte card pawh kan vengah a lo thleng nual a, YMA hruaituten tlawm­ngaia la khawmin an vengah an thawn. Kan vengah hian card dawng lo kan la awm nual a. Kan card-te hi veng dangah a thleng ve em ni le? Rawn thawn ve nachang hria se ka va duh em!

Tin, ka hriat chinah pawh Aadhaar Card-ah hian hming dik lo te, hawrawp dik lote pawh a awm nual. Kan chhungkua pawhin address chi hrang pathum kan nei. Engtia siam ṭhat tur nge ni ta ang le?

Aadhaar card thla la tur pawha nasa taka puanzar, sorkarin a ngaih pawimawh em em hi a buaipuitute pawhin theihtawp chhuahin hma an la ngei ang. Felfai takin thla an la a, anmahni pawh dawr an nuam. Amaherawhchu, an fel ziktluak lo hle mai!

Card an sem chhuah dan hian an hnathawh ṭhat zawng zawng kha a thaichhia ka ti lo thei lo! PAN Card, mimal postal addres-a a rawn thleng ang hian, Aadhaar card - lehkha pawimawh bik hi rawn thleng ve tur chu a ni asin!

Aadhaar card hetiang taka pawimawh leh sum senna hi, a semchhuah dan aṭang hi chuan a va pawimawh loh hmel ve! A mawhphurtu hian pawisa an ren mah mah em ni? A bul tumtu hi zawn chhuah ni rawh se, a pawimawh tehreng nen!