Lengpui Airport hum hrâm a ngai

Tunlai hian Mizoram sorkar chuan Lengpui Airport chu mi dang kuta pek a rilrûk a, chumi tipuitling tur emaw, a ṭha dawn em tih ngaihtuahtu committee pawh a siam hial a. Nasa takin chu committee chuan hma a la mek a, mahse, thutlukna a la siam lo a, siam pawh a harsa viau dawn a nih hmel.

Lengpui Airport hi India rama airport 130 zet zingah state sorkarin enkawl awmchhun a nia sawi a ni a, state dangte pawhin min awt em em tih hriat a ni. A lo pian chhuah danah pawh Chief Minister hmasa Pu Laldenga leh Pu Lal Thanhawla te an pawimawh em em a ni tih Wg.Cdr. J. Lalhmingliana chuan chiang takin a sawi ṭhin a, anni pahnih pawh a fakna a sawi chhuak nghe nghe a. Khatih hun laia Lok Sabha MP, tuna Chief Minister ni mek Pu Lalduhoma hming pawh a lam tel ṭhin a, an lo fakawm ngawt mai.

Pu J. Hminga sawi angin state sorkarin a puala airport a neih chhun hi a hek zawnga chhût pawhin kum tin cheng vaibelchhe 2.87 vel Mizoramin a seng a, Tripura Airport chuan kum tin vaibelchhe 438 zet a seng. Heti khawpa airport hlu hi Airport Authority of India (AAI) emaw, Indian Air Force kutah emaw a awm hi a phalawm loh ta viau a ni.

Lengpui Airport hi sorkar laipui pawisaa Mizoram sorkarin a din liau liau, cheng vaibelchhe 213 a senna a ni a, tunah hian IAF kutah hlan ni ta se, hetiang hian kan duh duhin kan hmang thei dawn lo tih a chiang a, ram venhimna atan chauha hman a ni thuai ang tih a hlauhawm em em a ni.

Wg.Cdr. J. Lalhmingliana chuan heti khawpa a bul aṭanga a tawp thlenga Mizoram sorkarin a din, tuna ṭangkai taka hman mek mi dang kuta hlan chu a uiawm thu a sawi uar hle a. Sorkar lai hotute pawhin an hre chiang lo palh a nih a rin thu a sawi rualin, an hriat loh vangah a ngai a, hre chiang se chuan hetiang hian mi dang kuta hlan an tum loh a rin thu a sawi bawk.

Kan sorkar hrawn mek hian uluk taka Lengpui Airport mi dang kuta hlan a tumna hi nasa takin dodalna a awm ngei dawn tih hi a ngaihtuah thar leh a ngai viau a ni. Lengpui Airport Forum pawhin nasa takin an zir chiang a, IAF kuta hlan a ṭhat lohzia a puang tawh hial nghe nghe. Chuvangin, Mizoram sorkar leh Mizoram mipui hmakhua ngaiin mi dang kuta hlan chu beng sikin ngaihtuah ṭha leh se, a zir chiangtu committeee pawhin uluk zawkin zir se, a hre zawkte pawh zau zawkin kâwmin râwn se a ṭha ang.

Hah thikûla kan hruaitu hmasate'n an lo beih leh an sual chhuah he Lengpui Airport hi mi dang kuta hlan mai chu Mizoram mipui hian engti kawng mahin kan phal dawn lo tih pawhin ngaihtuah tel hram teh se. Uluk taka ngaihtuah a ngai a, beng sika ngaihtuah chungin thutlukna siam hram se a ṭha hle ang. Mipui thinrim an tawng baw palh ang tih a hlauhawm hlel lo e.

- Melissa Pa