Sikul ṭan hma ang khata hrut rual kan zo lo
Ram tin hian kalphung kan nei ṭheuh a, a ṭhen ram lumah chengin a ṭhen ram vâwta cheng kan ni. Zing thawh hun a inang lo a, zan men rei chen a inang hek lo. Hetiang khawvela cheng kan nih chhung chuan chin dan phung ṭha ber a awm thei lo. Sikul kai hunbi pawh khawvel hmun dang leh India ram state danga ṭha viau kha, Mizoramah chuan a ṭha ber lo.
Mizoram sawrkar chuan April ni 1, 2015 aṭang khan sikul kai hun sawn hma a, ban hma tir chu a takin a hmang ṭan a. Thla hnih leh a chanve dawn a liam meuh pawhin dodaltu an la tam hle. Natna thuhmun rengah mi dawmdawi ei ang kan ngeih zel kher lo ang hian, ram danga remchang leh ṭha em em kha, kan ramah chuan a ṭhat lohzia kan tawng chho mek. Kan khawsak mil tawk ang zela kan inrelbawl thiam a pawimawh takzet a ni.
Mizorama sikul kai hun sawn hma chhan ber nia MSU ten an sawi, Traffic Jam tihziaawm nan tih hi chhuanlam tling lo tak a ni. Sikul ṭan hma avanga Traffic Jam kan pumpelh thu hriat tur a la awm lo. A bikin Aizawl khawpui chhim lamah chuan traffic jam a nasat phah zawk. Naupang chumchiap tak tak Nursery chauh la zirte chu a bikin kaihthawh hma an har a, thingtlang mite tan pawh phurrit a tling zual. An bang hma a, an haw hma a, naupang thununtu nei lote chu an duh dan danin an khawsa ta ṭhin a ni.
Chhungkuaa chawei hun inang lo zut maite hi khawsak harsa zawkte tan phurrit a tling a, gas thlengin a hek phah. Naupang zing chaw ei hman mumal lote hian nakin lawkah chuan pum ṭha lo an nei mai ang tih pawh a hlauhawm. Mizoram hmun kilkhawr tam takah chuan naupang sikul kalna te a hla tham a, ke ngata khaw ṭhenawmah km.5 dawn laia hlaa sikul kal ṭhin naupangte chu an ngaihtuahawm zual a ni.
Sikul kai hun sawn hma hi kan tidanglam thei lo a nih pawhin, office kai hun pawh zing dar 8:00 ah sawn hma mai ila, naupangte pawh tun ang em ema buai lovin nu leh pate rualin an che chhuak ve thei ang.
Champhai te, Samthang te, N.Vanlaiphai lam leh Thingsai tlangdunga chengte chuan thlasik an la nâ hle a, chuti chunga ang khat veka kaltir chu a remchang lo hle a ni.
Kan khawsak danin a la zawh hauh loh, keini aia ram changkang zawkte kal dan entawna kalphung thara kal tum tlat pawh harsatna min siamtu mai a ni.
Sikul ṭan hma chungchangah hian kan sawrkar hian a ring tikhawng lui tlat lo se. Ṭan hma a buaithlakna bik hmunah chuan ṭan tlai mai se. Aizawl leh thingtlang khaw chengker ang khata hrut rual a ṭul lo e.