Dawl zawrin an zawr leh ta!

A kamkeuna

Mizovin ‘dawl" kan tih hi ‘Araceae’ tih a ni a, Arum chhungkaw zinga mi, thlai hming a ni. Colocasia esculenta tia hriat a ni bawk. A hnah hi thlangra tia tia niin, sai beng pian ang deuha teng sawl bial deuh a tih theih a, chhumin a zawr duh hle a, bawrhsaiabe ang maiin a nâl kawi zak ṭhin. Chuvangin, insual changa a chak lo zawk sawi nan ‘dawl zawrin a zawr’ tih ṭawngkam hman ṭhin a ni.

Tu nge dawl zawra zawr chu

Naupang ṭahbelh huaibâk nawrh chingte hian an duh zawng an neih theih nan ṭap chunga nuarin theihtawpin pangchang takin an nu leh pa an nawr ṭhin. An thil ngen nu leh pate'n an pek hma chu an ṭap ṭhin a, an pek veleh ṭahlai banzai relin lungawi takin an awm ṭhin.

Khawvel sawrkar hrang hrang awp hnuaia mipuite pawh hian sawrkar nawr nan kawng hrang hrangin nawrhna an huaihawt ṭhin. Mizoram hmun hrang, a bikin Aizawl leh Silchar kawng siam hna thawh Mizoram Truck Owner Association chuan an duhkhawp loh avangin January 23, 2024 aṭanga tiam chin awm lova an lirtheite tlantir loh an tum chu an tum ang ngeiin an hlen ta kha a ni a. Hetihlai hian All Mizoram Petroleum Dealers Association (AMPEDA) President chuan tuialhthei phurte chu an ding ve dawn lo va, mipui chiai lo turin a ngen.

Nikum June aṭanga October chhung khan Kolasib leh Sairang inkarah motor 100 chuang kawng chhia avangin a tlu hman a. Hei hi Pu Hawla Ministry aṭang daih tawha kan buaipui tawh ṭhin kha a ni. Kawng chhia siam ṭhat a nih theih nan lirtheia ei zawngtute'n sawrkar kar nan nawrh an huaihawt kha a ni a, sawrkarin kawng chhia siam ṭhat ngei tuma a intiam avangin nawrhna kalpui zui zel a ni ta lo. Mahse, a intiamkam anga sawrkar a awm tak si loh avangin 23.01.2025 khan nawrhna kalpui nawn leh a ni a, sawrkar lamin a tlawn lungawi leh a, 24.1.2025 aṭang khan MTOA chuan dawl zawra an zawr leh tak vang nge, nawrh an titawp leh ta.

A tlangkawmna

MTOA hian nikuma nawrh an tum an ṭhulh leh hnuah kumin Jan. 23, 2025-a nawrhna an kalpui leh pawh chu a tuk maiah an sût leh a ni. Sawrkarin a thutiam anga a taka engmah a kalpui loh avangin nawrhna hi kalpui nawn leh ngai ta a ni tih chiang taka hre reng chung siin MTOA hian sawrkar a inbâwltir nawn leh dawn ta mek niin a lang.

Tuna kawng chhe siam mek nia a insawi leh ṭha taka siam chho zel tura a intiam ang hi rin a har tawh hle. Nakin lawkah sawrkar hian a intiam ang hian kawng hi ngaihthah leh ta se, nawrh huaihawt leh a ngai ang a, a hma ang bawkin sawrkar hian a vawi thum nan MTOA hi a bâwl kual leh dawn tihna em ni ang le? MTOA hi dawl zawrin a zawr hma lutuk deuh a ni lo maw? Chawlhkar khat chhung tal han châwl ṭhup ngam se’ng chuan a ṭha ni mai tur? MTOA hi an tlâwm rang ṭhin lutuk a, dawl zawrin an zawr hma mah mah ṭhin niin a lang.

Chutihlai karah AMPEDA lah chuan MTOA-te hi an la thurualpui thei lo zui bawk vei nen, kawngpui ṭha neih a van harsa dawn tehlul em.

- Dr. C. Lalrampana